VOV4.Êđê - Aguah 29/3, ti čar Quảng Ninh, Êpul hgŭm ksiêm hriăm gưl dlông mkŏ mjing Klei bi kƀĭn tal 3. Klei bi kƀĭn bi trông, mguôp klei blŭ hlăm 2 hră čih hưn, kčĕ, anăn jing Klei hâo hưn kčĕ: “Dŭm bruă ksiêm hriăm - boh sĭt hlăm 15 thŭn ngă Hdră mtrŭn gưl dlông mrô 7 gưl X kơ lŏ hma, ƀĭng ngă lŏ hma, krĭng ƀuôn sang”, hâo hưn kčĕ “Dŭm bruă ksiêm hriăm - boh sĭt mơ̆ng 20 thŭn ngă Hdră mtrŭn gưl dlông mrô 5 gưl IX kơ klei lŏ dơ̆ng mlih mrâo, mđĭ kyar leh anăn mđĭ klei tŭ dưn bruă duh mkra êpul lu.

Blŭ hrăm hlăm klei bi kƀĭn, Khua Êpul hgŭm ksiêm hriăm gưl dlông Nguyễn Xuân Thắng mñă klă: Dŭm klei tŭ dưi mâo yuôm bhăn snăk. Leh 35 thŭn mlih mrâo, bruă lŏ hma mâo klei bi mlih ktang jing mkra mjing mnơ̆ng dhơ̆ng, ba yua kdrăp mrâo mrang, mđĭ hnơ̆ng jăk leh anăn klei tŭ dưn, lŏ dơ̆ng jing kmeh gơ̆ng bruă duh mkra; bruă duh mkra krĭng ƀuôn sang lŏ dơ̆ng mđĭ kyar, hdră mkŏ mkra krĭng ƀuôn sang mrâo mâo lu klei tŭ dưn yuôm bhăn.

H’Zawut pô mblang