Êpul kahan êa 129 hrăm mbĭt hŏng êpul kahan êa hlăm dŭm plao ksĭ, pra êa pui thâo ƀuh leh anăn bi kdơ̆ng gang mkhư̆ mơ̆ng đưm, mơ̆ng dŭm bruă ngă mơ̆ng ala tač êngao čhŭ hlăm êa ksĭ, plao ksĭ mơ̆ng ala čar drei. Amâo djŏ knŏng mâo klei tŭ dưn kơ bruă lĭng kahan, hgao klei dleh dlan, 45 thŭn êgao Êpul kahan êa 129 kjăp păn hlăm êa ksĭ, hlue ngă jăk bruă klam mkra mjing mnia blei, jing phung ba anăp hlăm êpul kahan êa hlue ngă bruă klam răng mgang čar kwar leh anăn mđĭ kyar bruă duh mkra mđing kơ êa ksĭ.

Hlăm dŭm hrue knhal jih thŭn 5, Êpul kahan êa kdrŭn ksĭ 129 ti ƀuôn prŏng Vũng Tàu mjhĭt m’uăt knuă druh, lĭng kahan mnuih ngă bruă hlăm hô̆ pui, kŭmpăn mprăp jăk nanao kơ jih bruă knuă, hiu suang êwăng hlăm êa ksĭ, plao ksĭ.  Jih jang phung knuă druh jing lĭng kahan kkiêng hlăm wưng thŭn 90 mâo leh knhuah bruă kđi čar hŏng klei kjăp, ti anăp klei dleh dlan mơ̆ng êa ksĭ. Khădah gưl hiu suăng hlăm êa ksĭ tăp năng sui hrue, tuôm hŏng lu klei dleh dlan lehanăn klei huĭ hyưt, ƀiădah hŏng ai tiê klei gĭr prŏng.    Thượng uý Hoàng Xuân Thành Lập, Khua hô̆ pui 732 lač.

 “Nao ngă bruă hŏng adiê amâo mâo jăk, êa poh ya prŏng, ƀiădah jih jang lĭng kahan hlăm hô̆ mâo nanao klei thâo săng, yap anei jing bruă klam yuôm bhăn brei bi leh hŏng klei jăk bruă jao”.

Trung úy Vũ Văn Trường, Khua bruă mkra mjing pui kmlă hlăm hô̆ mrô 746, êpul 922, hlăm kahan êa 129 yăl dliê: Jing pô nao ngă bruă hlăm êa ksĭ, tuôm hŏng adiê amâo mâo jăk, angĭn ktang êa ksĭ poh yă, tăp năng tuôm hŏng klei huĭ hyưt snăk, ƀiădah grăp čô kahan dôk nanao hlăm klei mprăp ai tiê kơ klei bi blah, săn asei mlei kyua bruă răng mgang klei dưi êngiê êa ksĭ, plao ksĭ lăn čar.

        Hô̆ pui hmei, hlăm lu thŭn leh mtam mâo bruă čuăn kiă kriê krĭng êa ksĭ nah dhŭng êjai lehanăn ngă bruă êa pui êwa čuh. Khădah hnơ̆ng đuĕ hiu amâo mâo mdei hlăm êa ksĭ, ƀiădah bi klă anei jing bruă čuăn snăn lŏ bi kjăp hĭn ai tiê klei mĭn knuă druh lĭng kahan hơĭt ai tiê ngă bruă, siă suôr hŏng êa ksĭ. Kâo čang hmăng srăng dưi đru mguôp lu hĭn hlăm bruă rŭ mdơ̆ng lehanăn răng mgang lăn čar hŏng ao kahan êa anei”.

Jing êpul êya ngă bruă lĭng kahan, mguôp hŏng bruă duh mkra, hlăm anăn mâo bruă răng mgang klei êđăp ênang jing phŭn, Êpul kahan êa mâo bruă klam ktang phĭt hiu suang êwăng mprăp nanao kơ ai tiê bi blah ti djăp hnơ̆ng, amâo mâo lĕ hlăm klei kdjăt, klei amâo mâo ypŏng răng ôh, Êpul kahan êa mrô 129 ăt ngă hlăm bruă mă êa pui, msĕ si bruă mkŏ mkra pui kmlă doh hlăm plao ksĭ, mkŏ mkra sang pra, mkra wĭt hô̆ mran jhat hlăm êa ksĭ, lehanăn hŏng lu bruă rŭ mkra hlăm plao ksĭ jing mơ̆ng lĭng kahan sơăi. Boh nik hlăm dŭm thŭn giăm anei, êpul lĭng kahan êa lŏ klam ngă bruă mkra wĭt, mkra mđĭ kdrêč đung amâodah kdrêč kngam sang pra anôk ktir mă êa pui ti DK1 hlăm êa ksĭ. Đây Anei jing knhuang đĭ kyar hĭn êdi leh hlăm êpul kahan êa mâo ngă. Thượng tá Bùi Quang Tú, Khua knơ̆ng kiă kriê êpul kahan êa mrô 129 lač: Čiăng bi leh jăk bruă čuăn duh mkra mbĭt hŏng bruă răng mgang klei êđăp ênang hlăm wưng mrâo, dăl hlăm dŭm thŭn êgao, êpul kahan êa mâo nanao klei gĭr, hŏng mnêč pral dưi bi leh djăp mta bruă jao:

Čiăng bi leh jăk bruă lĭng kahan lehanăn bruă duh mkra, êpul kahan êa mâo ngă leh jăk bruă mjuăt bi hriăm lĭng kahan, mjuăt bi hriăm bruă kđi čar, kiă kriê mjuăt bi hriăm klei bhiăn, mkŏ mjing êpul lĭng kahan knhăk ktang, rơ̆ng kjăp klei êđăp ênang. Mprăp djăp ênŭm kdrăp yua djăp ênŭm pioh kơ bruă kđi čar, kơ klei hdĭp lĭng kahan, lehanăn kơ jih jang bruă knuă hlăm lĭng kahan. Mđĭ ai phung knuă druh, mnuih ngă bruă mâo nanao klei mĭn mbruă ngă bruă hŏng klei knhăk, hlăm klei duh mkra mnia mblei”.

Ară anei, boh klei hlăm êa ksĭ dôk găn lu klei dleh dlan, amâo mâo thâo tĭng knăl, snăn bruă čuăn mơ̆ng êpul kahan êa mrô 129 jing knư̆ hrue knư̆ ktrŏ hĭn bruă klam, ngă bruă hlăm anôk prŏng hĭn, mbha nao hlăm lu anôk krah êa ksĭ lă lia, đuĕ hiu sui hrue, hŏng jih jang kdrăp hô̆ pui jing mrâo mrang... snăn hlăm dăl 45 thŭn đĭ kyar, êpul kahan êa mrô 129 đĭ hriê kơ prŏng amâo mâo mdei mđrĭng hŏng klei lăn čar đĭ kyar. Phung knuă druh, lĭng kahan mnuih ngă bruă hlăm êpul kahan êa anei păn kjăp nanao bruă jao, čŏng mghaih msir djăp mta klei dleh dlan, hŏng klei gĭr jih ai tiê, hlăm klei mĭn knhăk kiă kriê êa ksĭ lehanăn bi leh bruă jao. Bi kơ bruă duh mkra ăt bi leh êgao ênoh čuăn. Dưi ba wĭt ngăn prăk thn êdei lu hĭn kơ thŭn êlâo, klei hdĭp mda lĭng kahan mâo nanao klei bi mlih.

    Jih jang boh tŭ dưn êpul kahan êa mrô 129 mâo leh hlăm dăl 45 thŭn rŭ mjing, lehanăn đĭ kyar mâo bi mguôp leh klă kơ bruă mơ̆ng lĭng kahan duh mkra mnia mblei, ba wĭt nanao hlăm klei mđrĭng boh tŭdưn duh mkra hŏng răng mgang lăn čar djŏ hŏng knhuah gru “Klei thâo bi mguôp, mghaih msir klei dleh dlan, gĭr jih ai tiê kiă kriê êa ksĭ, bi leh jăk bruă jao răng mgang klei êđăp ênang, mbĭt hŏng bruă duh mkra”./.