VOV4.Êđê- Ƀri bi hdơr 11 thŭn hrue awa Hô đuĕ nao duah êlan sua mă klei êngiê kơ lăn čar, bi hdơr 75 thŭn Hrue kahan êka êkeh, phung êngiă asei, aguah mbrue (4/8), ti Sang dăp pioh ngăn drăp Hồ Chí Minh, Êpul khua bi ala sang mđung asăp blŭ Việt Nam, mâo knơ̆ng khua gĭt gai Sang mđung asăp blŭ Việt Nam Đỗ Tiến Sỹ nga khua êpul nao čuh leh brui mngưi, dưm kwang mnga bi hdơr kơ Awa, bi hdơr kơ phung êngiă asei ti msat phung săn asei ƀuôn prŏng Hồ Chí Minh.

Hŏng klei mpŭ Knơ̆ng khua gĭt gai sang mđung asăp blŭ Việt Nam Đỗ Tiến Sỹ, lehanăn phung khua bi ala hlăm êpul pioh leh sa mnĭt kkui kŏ, lehanăn čuh brui mngưi bi êdah klei hdơr knga kơ khua gĭt gai Hồ Chí Minh, mnuih jih klei hdĭp duh mĭn kơ lăn čar, kyua klei êngiê kơ djuê ana, klei hluh lir lăn čar. Leh knăm bi hdơr kơ Khua gĭt gai Hồ Chí Minh, êpul lŏ nao čuh brui mngưi ti msat phung êngiă asei ƀuôn prŏng Hồ Chí Minh ti kbuôn amâo mâo anăn hlăm ƀuôn prŏng Thủ Đức, anôk dơr truh giăm 14 êbâo 500 čô phung êngiă asei./.

Pô mblang: Y-Khem Niê