Klei bi lông hriăm jih gưl 3 thŭn anei čar Kon Tum mâo 5.028 čô bi lông, hlăm anăn mâo êbeh 1.700 čô hđeh mnuih djuê ƀiă. Kluôm čar mâo 12 anôk bi lông klă sĭt hŏng 224 adŭ bi lông leh anăn 9 anôk bi lông mkăp hŏng 184 adŭ bi lông. Hruê 27/6, Êpu ksiêm dlăng kơ bruă gĭt gai, dlăng klei bi lông leh anăn bruă ksiêm dlăng klei bi lông hriăm jih gưl 3 thŭn 2023 mơ̆ng Phŭn bruă sang hră mtô bi hriăm kyua Thiếu tướng Nguyễn Văn Thế, K’iăng Khua bruă Đảng sang hră gưl prŏng Nguyễn Huệ, Phŭn bruă lĭng kahan ngă khua êpul nao mă bruă hŏng Êpul hgŭm bi lông Knơ̆ng bruă sang hră mtô bi hriăm čar Kon Tum, mbĭt anăn ksiêm dlăng boh sĭt ti dŭm anôk bi lông. 

Êpul ksiêm dlăng lač, čar Kon Tum mprăp leh kơ klei bi lông hriăm jih gưl 3 êđăp ênang, jăk. Êpul hgŭm bi lông Knơ̆ng bruă sang hră mtô bi hriăm čar Kon Tum ksiêm dlăng leh anăn hlue ngă jăk hră mơar gĭt gai mơ̆ng Khua knŭk kna, klei bhiăn, klei ktrâo lač mơ̆ng Phŭn bruă sang hră mtô bi hriăm kơ klei bi lông hriăm jih gưl 3 thŭn 2023 djŏ hŏng boh sĭt. Êpul mă bruă srăng bi hgŭm kjăp hŏng bruă djŏ tuôm hmao msir mgaih tơdah mâo klei amâo jăk čiăng đru kơ klei bi lông êđăp ênang./.