VOV4.Êđê - Aguah mbrue (8/4), ti sang bruă kƀĭn ala, Êpul ksiêm dlăng bruă truăn “Hlue ngă hdră bhiăn kơ bruă drông phung ƀuôn sang, lehanăn mghaih msir klei kčŭt hưn mơ̆ng hrue 1/7/2016 truh hrue 1/7/2021” mâo k’iăng khua bruă kƀĭn ala Trần Quang Phương ngă khua êpul mă leh bruă hŏng Phŭn bruă mnuih ngă bruă, phung knap mñai. Êpul ksiêm dlăng akâo bi mngač phung ƀơ̆ng prăk đru ba mnuih mâo bruă tŭ dưn, mghaih msir bi sĭt bruă anei. Hlăm klei hâo mdah, Phŭn bruă mnuih ngă bruă, phung knap mñai brei thâo, mâo drông leh êbeh 14 êbâo 300 gưl čô mnuih. Bruă drông mnuih ngă bruă anei mâo čih pioh, lehanăn ngă wăt phần mềm kiă kriê klei phung ƀuôn sang bi kčŭt, kñăm bi mguôp hŏng anôk bruă ksiêm dlăng mơ̆ng knŭk kna kơ klei bi kčŭt. Êpul ksiêm dlăng mtă brei ngă bi mngač jih jang klei kčŭt dôk hlăm knua Phŭn bruă mnuih ngă bruă phung knap mñai klam bruă, boh nik hlăm bruă đru kơ mnuih mâo bruă tŭ dưn, lehanăn bruă ênua yang ƀuôn truh giăm 90%./.

Y-Khem pô mblang