VOV4.Êđê- Tlam hruê 12/1, Êpul mă bruă mơ̆ng Anôk bruă ksiêm tĭng knŭk kna mâo Trần Sỹ Thanh, Khua hlăm Anôk kiă kriê bruă Đảng gưl dlông, Khua knơ̆ng ksiêm tĭng knŭk kna ngă khua êpul mâo leh mmông mă bruă hŏng phung khua kiă kriê čar Dak Lak kơ bruă hluê ngă klei klah čŭn bruă ksiêm tĭng mơ̆ng alŭ wăl. Hưn mthâo hŏng êpul mă bruă, Khua bruă Đảng čar Dak Lak Nguyễn Đình Trung hưn mdah leh dŭm boh tŭ dưi mâo mơ̆ng čar hlăm wưng êgao, hlăm anăn, dŭm gưl, dhar bruă pŏk hluê ngă leh kjăp klei gĭt gai mơ̆ng gưl dlông, knŭk kna, Khua knŭk kna, hluê ngă “Mta kñăm mdua” mđing mđĭ kyar bruă duh mkra, mnia mblei, rơ̆ng kjăp klei êđăp ênang ala ƀuôn lehanăn rơ̆ng boh tŭ hdră gang mkhư̆ klei ruă Covid 19.

Blŭ hrăm ti knăm anei, Trần Sỹ Thanh čih yap lehanăn bi mni dŭm boh tŭ mâo čar Dak Lak dưi mâo hlăm wưng êgao, boh nik hlăm bruă jak iêu hdră duh bi liê lehanăn đru kơ anôk bruă duh mkra. Boh nik, Dak Lak brei mđing msir mghaih pral dŭm bruă dôk bluh mâo hlăm Klei hưn mdah bruă ksiêm tĭng bruă ngăn prăk alŭ wăl mơ̆ng thŭn 2016 phă êlâo mâo Anôk bruă ksiêm tĭng knŭk kna bi mklă leh./.

Pô mblang: H’Nêč Êñuôl