Leh 15 thŭn hlue ngă Asăp mtrŭn mơ̆ng Anôk dlăng bruă Đảng gưl dlông kơ klei mđĭ ktang hră ênua mdrao mgŭn hlăm boh klei mrâo, truh ară anei ênoh blei hră ênua mdrao mgŭn ti čar Kon tum mâo êbeh 93%.

Hlăm anăn, ênoh phung blei hră ênua mdrao mgŭn gŏ sang mâo giăm 16%, êbeh 85% ênoh mnuih ƀuôn sang hlăm čar dưi mkra mjing, kriê dlăng hră mơar klei suiah pral điện tử leh anăn 100% anôk mdrao mgŭn să ksiêm mkă, mdrao mgŭn hlue si hră ênua mdrao mgŭn. Vũ Thanh Mai, K’iăng Khua Anôk bruă mdrao mgŭn gưl dlông, lač, êngao kơ klei đru mơ̆ng gưl dlông, čiăng krơ̆ng kjăp leh anăn lŏ dơ̆ng mđĭ ênoh blei hră ênua mdrao mgŭn, Kon Tum brei mđĭ klei hâo hưn, mtô mblang kơ hdră êlan leh anăn boh tŭ hră ênua mdrao mgŭn, mđĭ kyar bruă mdrao mgŭn nah gŭ, boh nik kƀĭn mđĭ hnơ̆ng ksiêm mkă, mdrao mgŭn, mjing klei găl kơ mnuih ruă dưi dưn dŭm hdră mdrao mgŭn.