VOV4.Êđê - Hruê mbruê 22/4, ti anôk bruă knŭk kna, k’iăng Khua knŭk kna Phạm Bình Minh tŭ drông leh k’iăng khua bruă hŏng tač êngao Vatican, Miroslaw Wachowski ƀri wưng hriê ti ala čar Việt Nam nao hgŭm leh anăn hrăm mbĭt gĭt gai klei kƀĭn gưl tal 9 êpul ngă bruă lu mta Việt Nam – Vatican. K’iăng Khua knŭk kna Phạm Bình Minh bi êdah klei hơ̆k mơak ti anăp dŭm klei đĭ kyar hlăm klei mjĕ giăm plah wah Việt Nam leh anăn Vatican. K’iăng khua phŭn bruă Miroslaw Wachowski lač jăk kyua klei tŭ drông mơ̆ng knŭk kna Việt Nam leh anăn mñă klă Khua gĭt gai klei đăo khop Francis leh anăn Sang yang hmăng hmưi nanao klei mjĕ giăm hŏng Việt Nam ƀrư̆ hruê ƀrư̆ đĭ kyar, mkŏ mjing klei găl čiăng kơ êpul êya phung đăo khop Việt Nam đru mguôp hlăm klei đĭ kyar ala čar. K’iăng khua phŭn bruă ăt tŭ ư dŭm hdră êlan mtrŭt mđĭ klei mjĕ giăm plah wah 2 tĭng hlăm hruê mmông kơ anăp, boh nik jing mđĭ hĭn klei mjĕ êrô plah wah 2 tĭng leh anăn rơ̆ng dŭm klei ksiêm êmuh dôk mâo ară anei.

Y-Ƀel pô mblang