VOV4.Êđê - Hrue mbrue (4/3), êpul ngă bruă mơ̆ng Êpul Gơ̆ng bruă djuê ana hlăm Bruă kƀĭn ala mâo Y -Thanh Hà Niê Kdăm, Khua kiă kriê Êpul Gơ̆ng bruă djuê ana hlăm bruă kƀĭn ala, ngă khua êpul mâo leh mmông ngă bruă hŏng Knơ̆ng bruă sang čư̆ êa čar Sóc Trăng čiăng ksiêm dlăng tĭng mkă bruă hlue ngă hdră mtrŭn mơ̆ng khua knŭk kna lehanăn hdră mtrŭn mơ̆ng Dhar bruă djuê ana kơ dŭm bruă djŏ tuôm hŏng krĭng mnuih djuê ƀiă ti čar Sóc Trăng. Tui si klei hâo mdah mơ̆ng knơ̆ng bruă sang čư̆ êa car Sóc Trăng, klei hlue ngă hdră mtrŭn anei hlăk dôk hlăm wưng tal êlâo snăn knơ̆ng bruă sang čư̆ êa čar mjing leh djăp klei găl kơ dŭm alŭ wăl hlăm bruă bi klă đơ knua hlue ngă hdră êlan djuê ana ti wưng mrâo. Blŭ hrăm ti anôk ngă bruă, Khua Êpul Gơ̆ng bruă djuê ana Y Thanh Hà Niê Kdăm lač, mơ̆ng dŭm bruă čar Sóc Trăng bi êdah leh, êpul srăng čih pioh, ksiêm dlăng lehanăn êmuh klei mĭn mơ̆ng dŭm phŭn dhar bruă djŏ tuôm čiăng mơ̆ng anăn mâo klei akâo kơ knŭk kna đru kơ dŭm alŭ wăl ngă jăk hĭn djăp hdră êlan hŏng sa hdră jăk lehanăn tŭ dưn hĭn./.

Y-Khem pô mblang