VOV4.Êđê -  Tlam mbruê 3/4, Êpul ngă bruă mơ̆ng phŭn bruă lŏ hma leh anăn mđĭ kyar krĭng ƀuôn sang nao ksiêm dlăng bruă mgiah msir klei hmăi kyua hjan prŏng ti čar Quảng Bình. Hlăm 3 hruê êgao, čar Quảng Bình mâo klei hjan prŏng. Anei jing gưl hjan amâo jăk ngă truh klei hmăi kjham kơ bruă lŏ hma, boh nik jing wưng buh pla mnga. Hjan prŏng ngă truh klei êa lĭp êbeh 5.900 ha mdiê lŏ, hlăm anăn kdriêk Lệ Thuỷ giam 3.700ha, kdriêk Quảng Ninh êbeh 1.000 ha. Čar Quảng Bình mâo êbeh 910 ha anôk rông kana hlăm lŏ, lu anôk rông briăng leh anăn dŭm pluh war rông kan jhat rai. Khădah hjan hrŏ leh, ƀiădah dôk mâo lu ênhă pla mjing mdiê, boh kroh dôk hlăm klei êa lĭp ti dŭm kdriêk Quảng Ninh, Lệ Thuỷ. Čar Quảng Bình mâo klei kčĕ kơ phŭn bruă lŏ hma leh anăn mđĭ kyar krĭng ƀuôn sang đru mkăp brei mjeh ana pla mjing, mnơ̆ng rông čiăng krŭ wĭt klei ngă bruă. Bi kơ mgi dih, čar mñă kơ gưl dlông đru mkăp brei ngăn prăk čiăng mkŏ mkra guôi gang êa leh anăn êlan mđuê̆ êa hlăm dŭm krĭng mâo klei hmăi kjham, đru mkăp brei ngăn prăk čiăng mkra wĭt dŭm anôk mâo klei hyưt dlưh lăn čiăng kơ mnuih ƀuôn sang mâo klei hơĭt hlăm klei hdĭp, krŭ wĭt klei ngă bruă.

Y-Ƀel pô mblang