VOV4.Êđê- Hrue mbrue (19/5), Khua knơ̆ng gĭt gai Sang mđung asăp Blŭ Việt Nam Đỗ Tiến Sỹ mbĭt hŏng êpul bi ala sang mđung asăp blŭ nao cuă lehanăn čuh brui mngưi ti sang yang Trầm, să Phụng Châu, kdriêk Chương Mỹ, ƀuôn prŏng Hà Nội ƀri bi hdơr 132 thŭn hrue kkiêng kơ khua gĭt gai Hồ Chí Minh. Anei jing anôk sang mđung asăp blŭ Việt Nam mđung “Klei iêo mthưr kluôm ala kgŭ krŭ kdơ̆ng” mơ̆ng khua gĭt gai Hồ Chí Minh hlăm mlam hrue 19/12/1946. Ti anôk čuh brui mngưi, Khua knơ̆ng gĭt gai Sang mđung asăp blŭ Việt Nam Đỗ Tiến Sỹ mbĭt hŏng êpul sang mđung asăp blŭ lehanăn phung khua kiă kriê să Phụng Châu, kdriêk Chương Mỹ čuh leh brui mngưi ti sang yang phŭn lehanăn ƀăng k'ưp Trầm, lŏ bi hdơr jih jang bruă mâo hlăm sang yang Trầm mâo hŏng anei 76 thŭn. Ti anôk nao čuă, lehanăn mă bruă hŏng phung khua kiă kriê Knơ̆ng bruă sang čư̆ êa să Phụng Châu, kdriêk Chương Mỹ, ƀuôn prŏng Hà Nội, Khua knơ̆ng gĭt gai Sang mđung asăp blŭ Việt Nam Đỗ Tiến Sỹ mâo leh klei lač jăk kơ knơ̆ng bruă sang čư̆ êa să Phụng Châu mâo đru mguôp leh hŏng knhuah gru ƀang k'ưp Trầm, sang Yang Trầm, anôk sang mđung blŭ Việt Nam myun dưi mkŏ mjing anôk bruă tal êlâo hlăm ênuk phŭn kgŭ krŭ kdơ̆ng bi blah răng mgang lăn čar./.

Pô mblang: Y-Khem Niê