VOV4.Êđê -  Hlăm 2 hruê 26 leh anăn 27/7, Hdră klei pơ̆ng nưh Việt Nam thŭn 2022 mkŏ mjing dŭm mta bruă ti ƀuôn prŏng Huế, čar Thừa Thiên Huế. Hdră anei mkŏ mjing mơ̆ng hruê 19/7 truh kơ hruê 3/8 ti 9 čar, ƀuôn prŏng hŏng klei nao hgŭm mơ̆ng 108 čô bi ala hlăm ênuk thŭn mơ̆ng 16 – 24, bi ala kơ phung mda asei Việt Nam ti ala tač êngao wĭt mơ̆ng 25 ala čar.

Ti Huế, phung hgŭm hlăm hdră anei nao hlăm lu mta bruă msĕ si bi lông klei yăl dliê, nao čuă sang yơng Linh Mụ, Đại Nội Huế, mđup brei hnư mnơ̆ng, mjĕ êrô hŏng klei hlăp lêñ ti hang êa ksĭ Lăng Cô. Êpul dưi thâo lu mta mnơ̆ng ƀơ̆ng jăk yâo ti Huế leh anăn lông mñăm dŭm mta êa čê sang mtao Huế. Yap mơ̆ng thŭn 2004, hdră anei dưi iêo mthưr giăm 2000 čô hđeh êdam êra, hđeh sang hră gưl prŏng mnuih Việt Nam mơ̆ng êbeh 30 ala čar leh anăn alŭ wăl nao hgŭm. Phung bi ala nao hlăm hdră anei jing phung kdlưn hĭn hlăm klei hriăm hră mơar, mjuăt ktang asei mlei, klei yăl dliê leh anăn mâo klei đru mguôp hlăm bruă mkŏ mjing yang ƀuôn.

Y-Ƀel pô mblang