VOV4.Êđê- Leh êbeh 3 hruê hmaĭ mơ̆ng Gưl angĭn êbŭ mrô 2 ngă mâo adiê hjan prŏng, hlăm ênhă prŏng, dŭm êtuh boh sang, dŭm êbâo ha mdiê leh anăn djam tam mnuih ƀuôn sang ti dŭm alŭ wăl hlăm čar Gia Lai luič liê kyua êngăp hlăm êa. Hlue si klei ksiêm yap mơ̆ng Anôk bruă gĭt gai gang mkhư̆ klei yan adiê ngă leh anăn tui duah phung mâo klei truh čar Gia Lai, mơ̆ng hruê 7/8 truh aguah 10/8, să Ia Piơr, kdriêk Čư̆ Prŏng mâo 125 boh sang êngăp hlăm êa. Tinei, ăt mâo lu ktuê êlan êngăp hlăm êa, ngă bi ktlah, bruă sang čư̆ êa alŭ wăl mbĕ đuê̆ 24 gŏ êsei mnuih ƀuôn sang. Mbĭt anăn. 1500 ha mdiê leh anăn djam tam mnuih ƀuôn sang êngăp hlăm êa.

Hlăm anăn, dŭm alŭ wăl mâo ênhă ana  pla mjing êngăp hlăm êa lu hĭn jing Phú Thiện hŏng 447 ha leh anăn kdriêk Čư̆ Prŏng hŏng 368 ha; dŭm kdriêk ƀuôn prŏng mkăn msĕ si Ia Pa, Čư̆ Pưh leh anăn wăl krah Ayun Pa ăt mâo dŭm êtuh ha mdiê leh anăn djam tam mnuih ƀuôn sang hmăi djŏ. Ară anei Anôk bruă gĭt gai gang mkhư̆ klei yan adiê ngă leh anăn tui duah phung mâo klei truh čar Gia Lai leh anăn dŭm kdriêk, wăl krah khăng mđing hmư̆ klei hâo hưn, gĭt gai dŭm alŭ bi doh wăl hdĭp mda ti dŭm anôk êngăp êa, leh êa hrŏ./.

Pô mblang: H’Zawut Ƀuôn Yă