VOV4.Êđê- Anôk čhĭ mnia kpŭng ƀơ̆ng knăm mlan pŭr ti čar Gia Lai dôk mtlŭk mtlak hŏng lu mta mnơ̆ng dhơ̆ng lu jơr, jăk ală dlăng. Thŭn anei, phung mkra mjing kpŭng ba ti anôk čhĭ mnia lu mta kpŭng ƀơ̆ng mơ̆ng ênoh man dưn truh kơ ênoh yuôm, čiăng bi mâo djăp ênŭm klei čiăng mơ̆ng phung blei ba yua.

 Thŭn anei, wăl anôk čhĭ ƀêñ Trung thu mâo mơ̆ng hnưm. Mơ̆ng akŏ mlan 7 hruê mlan ƀlĕ, lu anăn knăl ƀêñ msĕ si Kinh Đô, Yến sào Khánh Hòa, Richy… ba čhĭ leh ƀêñ ti dŭm ktuê êlan phŭn mơ̆ng ƀuôn prŏng Pleiku, mâo lu mnuih nao blei. Grăp thŭn, ƀêñ mơ̆ng ala čar Malaysia, Đài Loan dưi čhĭ dưm ti pra mbĭt. Ƀiădah thŭn anei, lu anôk čhĭ ƀêñ mđing ba čhĭ mta ƀêñ dưi mkra hlăm ala čar. Ênoh čhĭ ƀêñ Trung thu thŭn anei mơ̆ng 280.000 truh 480.000 prăk/hruh, mta ƀêñ yuôm hĭn mâo ênoh mơ̆ng 560.000 prăk truh 1,7 êklăk prăk.

        Hluê si amai Bùi Thị Thúy Oanh – Pô čhĭ mnia Thúy Oanh, ƀuôn hgŭm Diên Hồng, ƀuôn prŏng Pleiku, êngao mâo lu mta ƀêñ Trung thu hŏng anăn knăl mdê mdê, ƀêñ Trung thu thŭn anei mâo ênoh čhĭ đĭ mơh kyua mta mnơ̆ng yua mkra ƀêñ đĭ ênoh hĭn mkă hŏng yang đar thŭn.

“Tui hluê mnuih blei. Si tô hmô, ƀêñ pô đŭng hruh siam čiăng mđup brei kơ arăng ênoh čhĭ yuôm mơh, bi dŭm mta ƀêñ đŭng hruh gơ̆ pô ênoh mdê mơh. Tui hluê snăn, ênoh čhĭ thŭn anei đĭ hĭn, mâo ƀêñ sa, dua êtuh mâo ƀêñ truh dŭm êtuh êbâo.

        Amai Bùi Thị Lành, pô čhĭ ƀêñ Trung thu Yến sào Khánh Hòa (ti 127 Phan Đình Phùng, ƀuôn prŏng Pleiku) brei thâo, anôk amai čhĭ 10 mta ƀêñ Trung thu mơ̆ng 65.000 prăk truh 110.000 prăk/klŏ, mơ̆ng 148.000 prăk truh 657.000 prăk sa hruh, mâo hruh mơ̆ng 1,2-1,7 êklăk prăk. Hluê amai Lành, kyua thâo klei čiăng mơ̆ng mnuih blei, thŭn anei anôk čhĭ mnơ̆ng amai Lành lŏ mâo dŭm mta ƀêñ Trung thu mrâo čiăng kơ mnuih blei ruah

        “Thŭn anei anôk kâo lŏ mâo 2 mta ƀêñ mrâo, thập cẩm lŏ mâo mta phô mai bi ƀêñ ê’un lŏ mâo mnâo čê.

        Knơ̆ng bruă Kriê dlăng wăl anôk mnia mblei čar Gia Lai gĭt gai leh dŭm Êpul kriê dlăng mđĭ hdră ksiêm dlăng anôk mkra ƀêñ Trung thu. Mbĭt anăn msir mghaih klei čhĭ mnơ̆ng mgưt, amâo tŭ jăk, amâo klă phŭn agha mkra mjing, amâo rơ̆ng klei doh êƀăt mnơ̆ng dhơ̆ng hlăm wưng Têt Trung thu. Lê Hồng Hà, Khua knơ̆ng bruă kriê dlăng wăl anôk mnia mblei čar Gia Lai brei thâo:

          “Hlăm wưng anei hmei mkŏ mjing leh bruă ksiêm dlăng djŏ tuôm kơ hdră têt trung thŭn 2022 čiăng mkhư̆ klei čhĭ ƀêñ Trung thu amâo thâo klă phŭn agha mkra ƀêñ hmăi truh kơ klei doh êƀăt, klei suaih pral mnuih ƀuôn sang. Mbĭt anăn mđĭ hdr ksiêm dlăng jih jang mnơ̆ng dhơ̆ng djŏ tuôm hlăm knăm anei čiăng pral hmao ƀuh, msir mghaih klei ngă soh hlăm dŭm anôk bruă duh mkra mnia mblei ti alŭ wăl kñăm rơ̆ng klei tŭ dưn mnuih blei yua./.

                                                                                    Pô mblang: H’Nêč Êñuôl