Ti dŭm sang čhĭ mnia mnơ̆ng yua mkŏ mkra ti ƀuôn hgŭm Phù Cát, dŭm hruê leh angĭn êbŭ mrô 13, phung tuê nao blei lu hĭn hŏng yăng đar, boh nik jing phung nao blei čuôr leh anăn tôl. Nguyễn Văn Cát  ti alŭ Phú Kim mrâo blei dŭm êtuh klŏ brĭk čuôr. Ñu brei thâo, klei yuôm bhăn hĭn ară anei jing mnơ̆ng dhơ̆ng hmao mkăp brei kơ mnuih ƀuôn sang čiăng hnưm mkra wĭt pưk sang êjai dơ̆ng mŭt hlăm wưng hjan lu hĭn.

“Kâo ƀuh ênoh kăn lŏ đi lu hĭn. Klei yuôm hĭn jing sang čhĭ mnia mâo mnơ̆ng nanao, mnuih ƀuôn sang čiăng hlŏng mâo mtam čiăng lŏ păng čuôr sang, amâo mâo guôn ôh!”

Ti dŭm sang čhĭ mnia, ênoh dưi čih ti anăp ƀăng bhă, đru kơ mnuih ƀuôn sang ênưih ktuê dlăng leh anăn bi mkă. Lu phung čhĭ mnia brei thâo, mmông êdei angĭn êbŭ jing wưng đru bi gui klei dleh dlan, amâo mâo duah bi mđĭ ênoh. Amai Nguyễn Thị Thu Thúy, Pô sang čhĭ mnia Sơn Quân, alŭ Phú Kim lač:

 Ênoh mâo mơ̆ng êlâo leh, đa đa boh boh sang dŭm êbâo klŏ ăt ênoh anăn, dua tlâo klŏ ăt ênoh anăn, đa đa blei ƀiă hmei amâo mâo mă prăk ôh”.

Nguyễn Ngọc Minh, Pô anôk čhĭ mnia nmnơ̆ng yua mkŏ mkra Quy Nhơn Nam brei thâo, êjai hlăm internet mâo lu klei hưn klei ƀrik čuôr kƀah hin, ênoh đĭ 2 blư̆, 3 blư̆, ƀiădah ti Gia Lai jing mklăk hŏng anăn. Dŭm anôk čhĭ mnia hlăm alŭ wăl ăt adôk mâo mnơ̆ng êlâo kơ angĭn êbŭ.

       “Ăt msĕ hŏng êlâo amâo mâo mđĭ ênoh ôh, tôl leh anăn rôč, 2 mta anăn ƀuh mlih lu, pô dôk mnơ̆ng hđăp čhĭ ênoh hđăp amâo mâo mđĭ ênoh ôh”.

Čiăng mkhư̆ klei mkăm pioh mđĭ ênoh, êpul kriê dlăng anôk mnia mblei čar Gia Lai ksiêm dlăng leh anăn brei giăm 400 gŏ sang čhĭ mnia mnơ̆ng mkŏ mkra bi hơĭt ênoh, amâo mâo mjhua čiăng mđĭ ênoh, mbĭt anăn mđĭ hĭn klei ksiêm dlăng mlir dhar bruă čiăng rơ̆ng kơ mnơ̆ng dhơ̆ng. Ayŏng Lê Đình Tân, Pô ksiêm dlăng mơ̆ng êpul kiă kriê anôk mnia mblei mrô 4, Anôk bruă ksiêm dlăng anôk mnia mblei čar Gia Lai brei thâo:

“Dŭm knơ̆ng bruă ƀuăn hŏng êpul bruă djŏ tuôm srăng bi hơĭt ênoh kơ mnuih ƀuôn sang, êpul kriê dlăng anôk mnia mblei hŏng kahan ksiêmm bi mmguôp mtô kơ gŏ sang čhĭ mnia đru kơ mnuih ƀuôn sang brei găl guôp čiăng găn wưng dleh dlan mơ̆ng yan adiê”.

Dŭm knơ̆ng bruă, gŏ sang čhĭ mnia ti čar Gia Lai čŏng pô krơ̆ng ênoh, bi hơĭt, mbĭt hŏng klei nao hgŭm mơ̆ng êpul bruă djŏ tuôm, đru kơ mnuih ƀuôn sang hnưm mkra wĭt pưk sang, bi hơĭt klei hdĭp leh angĭn êbŭ mrô 13./.