Leh bi mŭt mbĭt, Gia Lai dưi mkŏ mjing gru kruăk hŏng knăm mơak “Boh tŭ mơ̆ng čư̆ dliê êa ksĭ bi kƀĭn”. Mơ̆ng dŭm ƀuôn sang, čĭng čar truh truh kơ êa ksĭ, kdŏ čhuang maŏ mbĭt hŏng khnuah gru, mnŭ ăm, êsei brông ti čư̆ čhiăng mbĭt hŏng kah hdang êa ksĭ. Klei hâo hưn mơ̆ng Gia Lai jing hlăm anei jing čar srăng mkŏ dhar kreh dua krĭng Ngŏ – Yŭ, bi mguôp knhuah gru nao mbĭt hŏng bruă hiu čhưn ênguê wăl mnơ̆ng hdĭp, dhar kreh, hƀuê ênuk leh anăn ksĭ mtah. Pô mbruă Rčom Bus, ti Pleiku bi êdah klei hơ̆k mơak êjai tông čing ti hang ksĭ Quy Nhơn

 “Ƀuh knăm mơak jing jơr leh anăn jăk êdi êjai bi kna mbĭt knăm mơak hmei ti Gia Lai krĭng čư̆ čhiăng, tinei Gia Lai krĭng êa ksĭ ñŭ kma mbĭt hmei ƀuh klei rang mdah mbruă leh anăn jăk hĭn”.

Ti anăp wăl đĭ kyar mrâo, dŭm knơ̆ng bruă hiu čhưn ênguê čar Gia Lai pral nao hgŭm. Hoàng Thị Thu Sen, Khua kiă kriê Vietravel anôk bruă Bình Địh brei thâo, knơ̆ng bruă amâo djŏ knŏng pŏk thiăm adŭ bruă ti Pleiku, ƀiădah lŏ mkra mjing lu mta mnơ̆ng hiu čhưn ênguê nao hlăm dliê, nao ti êa ksĭ. Hluê nu, knŏng sa hlăm hdră, phung tuê dưi ktuê dlăng yan adiê kpleh yan Ngŏ Yŭ Trường Sơn, ktuê dlăng knhuah dhar kreh, hƀuê ênuk Lăn Dap Kngư, leh anăn mdei msăn ti hang ksĭ taih êbeh 130km mơ̆ng Ngŏ čar.

 “Ti nah Yŭ čar Gia Lai hmei dưi mkŏ mjing mta dŭm mta mnơ̆ng dhơ̆ng mrâo ba tuê hriê tinei, plah wah êa ksĭ leh anăn dliê hmei dưi mkŏ mjing mnơ̆ng dhơ̆ng đing kơ dhar kreh – hƀuê ênuk, nao êlam hlăm tour anei. Dŭm anôk truh ti Gia Lai ăt čiăng duh bi liê. Ti anôk čuă dlăng msĕ si čư̆ pui Đăng Ya, êlan anăn 45 mdhô̆ ƀiădah knŏng dưi nao mă sa êlan, ana kyâo dua tĭng čiăng jah waih hĕ, hmei srăng mkŏ mjing klei găl kơ knơ̆ng bruă hiu čhưn ênguê ba phung tuê. Ksiêm dlăng anei hmei srăng ba nao êlam hĭn plah wah mnơ̆ng dhơ̆ng dhar kreh hƀuê ênuk.

Hŏng knơ̆ng bruă hiu čhưn ênguê, klei bi mguôp Gia Lai – Bình Định dưi dlăng jing hdră mkŏ wĭt klei mĭn đĭ kyar. Nguyễn Tấn Thành, khua êpul bruă hiu čhưn ênguê Gia Lai mnă klă, anei amâo djŏ knŏng jing klei mkŏ dăp anôk bruă knŭk kna, ƀiădah yuôm bhăn hĭn jing pŏk mlar klei găl mkŏ mjing hdră hiu čhưn ênguê mlir krĭng, ba yua jih hnơ̆ng ngăn dŏ. Klei mdê mơ̆ng yan adiê leh anăn yan pla mjing pla wah êa ksĭ leh anăn dliê ăt đru kơ anôk hiu čhưn ênguê dưi pŏk hlăm thŭn.

“Kyua anôk mnia mblei dưi pŏk mlar hlăm thŭn. Êjai jing 1 čar bruă hiu čhưn ênguê srăng mâo mlan ƀiă mơ̆ng čar Bình Định hđăp jing lu leh anăn ăt mklăk hŏng anăn kyuanăn drông thŭn tuê hlăm jih thŭn. Nao sa hdră ƀiădah dưi mâo 2 wăl anôk hdĭp, kyuanăn srăng mâo lu bruă hiu čhưn ênguê dưi pŏk, mbĭt anăn pŏk bruă hiu čhưn ênguê jơr hĭn, đru kơ phung tuê dưi ruah lu hĭn”.

Ăt msĕ hŏng knơ̆ng bruă, mnuih ƀuôn sang ti dŭm ƀuôn êlan čar Gia Lai, mơ̆ng bruă lŏ hma, êpul êya điêt, ăt mdưm klei hmăng hmưi mkŏ hŏng êa ksĭ mtah, ba mnơ̆ng phŭn mơ̆ng pô kơ phung tuê. Amai H’Uyên Niê, ti ƀuôn hiu čhưn ênguê Ia Mnông, ƀuôn hgŭm Ia Ly lač, tơdah bruă sang čư̆ êa klă sĭt nao mbĭt hŏng mnuih ƀuôn sang, đru kơ mnuih ƀuôn sang ngă bruă hiu čhưn ênguê srăng thơ̆ng kơ bruă hĭn, amâo mâo dleh ôh kơ mnuih ƀuôn sang dưi drông phung tuê mơ̆ng êngao.

 “Čiăng kluôm dhuôm hĭn, kâo pô ăt hmăng mâo klei hriăm êjai mâo phung tuê ala tač êngao, mnuih ƀuôn sang alŭ wăl dưi mkra êa mnăm găl guôp hŏng diñu, boh nik jing dŭm mta mnơ̆ng ƀơ̆ng čiăng găl guôp hŏng phung tuê China, Ơrôp.

Hlue si klei hưn mdah kđi čar Klei kƀĭn  kluôm bruă Đảng čar wưng thŭn 2025 – 2030, bruă hiu čhưn ênguê srăng jing 1 hlăm 5 kmeh gơ̆ng bruă duh mkra mơ̆ng čar. Mta kñăm klă klơ̆ng jing truh thŭn 2030 srăng drông 18,5 êklăk čô tuê hlăm thŭn, hlăm anăn mâo êbeh 1 êklăk čô tuê ala tač êngao. Čiăng dưi mâo mta kñăm anei, Dhar bruă dhar kreh leh anăn hiu čhưn ênguê ba mdah leh 4 hdră êlan phŭn. Đỗ Thị Diệu Hạnh, khua knơ̆ng bruă dhar kreh, mjuăt asei mlei leh anăn hiu čhưn ênguê čar Gia Lai brei thâo:

“Kñăm kriê pioh, bi lar dŭm boh tŭ dhar kreh, anôk sim hƀuê ênuk. Kñăm mkŏ mjing anăn knăl bruă hiu čhưn ênguiê, kñăm mkŏ Ngŏ – Yŭ, mđĭ kyar bruă hiu čhưn ênguê êa ksĭ, bruă hiu čhưn ênguê yang ƀuôn. Kñăm duh bi liê ai dưi leh anăm mtrŭt mđĭ dŭm hdră ară anei ti čar čiăng iêo jak phung tuê hiu čhưn ênguê mơ̆ng ară anei truh kơ jih wưng păn bruă. Knhal tuč jing mkŏ mjing ai dưi mđĭ kyar bruă hiu čhưn ênguê, mkŏ mjing mnơ̆ng hiu čhưn ênguê jăk hlăm êdei anăp.

Dưi ƀuh, knŏng hlăm wưng bhiâo, Gia Lai mâo dŭm bruă ktang phĭt: mkŏ mjing dhar kreh, mtrŭt mđĭ dŭm knơ̆ng bruă ksiêm dlăng, mnuih ƀuôn sang kčĕ leh anăn ƀrư̆ ƀrư̆ mđĭ hnơ̆ng gru hmô, truh kơ klei čuăl mkă hdră êlan leh anăn mta knăm wưng sui. Nah êngao klei kƀĭn kluôm bruă Đảng čar, Gia Lai mprăp kơ êlan nao mrâo, ba bruă hiu čhưn ênguê jing boh kdrŭt đĭ kyar, đru mkŏ mjing čar jing anôk bruă knơ̆ng mơ̆ng Lăn Dap Kngư leh anăn kwar krah.