VOV4.Êđê - Aguah 27/7, ti ƀuôn prŏng Pleiku, Knơ̆ng bruă sang cư̆ êa čar Gia Lai mkŏ mjing Klei bi kƀĭn bi tguôm hŏng phung mâo ai krŭ kdơ̆ng êdah kdlưn ƀri bi hdơr 75 thŭn hruê phung kahan êka êkeh êngiă asei. Nao hlăm klei bi tuôm anei mâo 75 čô êdah kdlưn, mâo 2 čô amĭ Việt Nam jhŏng ktang, 1 čô pô jhŏng ktang hŏng phung kahan êka êkeh, găp djuê phung êngiă asei bi ala kơ êbeh 12 êbâo čô dưi dưn klei đru kơ phung mâo ai krŭ kdơ̆ng lăn čar ti Gia Lai. Hlăm mmông bi tuôm, phung bi ala hrăm mbĭt lŏ bi hdơr knhuah gru kdrưh kơăm mơ̆ng djuê ana mơ̆ng dŭm klei bi blah.

Khua gĭt gai čar Gia Lai bi êdah klei hdơr knga hŏng gŏ sang knŭk kna dlăng ba, phung mâo ai krŭ kdơ̆ng. Mơ̆ng thŭn 2017 truh ară anei, Gia Lai đru mkra mrâo êbeh 2000 boh sang kơ phung mâo ai krŭ kdơ̆ng dôk dleh dlan, hŏng êbeh 73 êklai prăk. Mkŏ mjing mdrao kơ êbeh 20 êbâo gưl phung mâo ai krŭ kdơ̆ng hŏng ênoh 22 êklai prăk. Mâo 14 čô amĭ Việt Nam jhŏng ktang adôk hdĭp dưi mdơ̆ng brei sang klei khăp leh anăn mâo dŭm anôk bruă rông ba jih klei hdĭp…

H’ Zawut pô mblang