Hluê si klei hưn mơ̆ng khua bruă sang čư̆ êa čar Gia Lai, hlăm thŭn 2023. Čar mâo 14/21 hnơ̆ng čuăn bruă duh mkra ala ƀuôn, bruă hluê ngă dŭm hdră êlan bi hơĭt klei hdĭp yang ƀuôn hŏng phung mâo bruă tŭ dưn, gŏ sang knŭk kna dlăng ba, klei êđăp ênang knông lăn, klei êđăp ênang yang ƀuôn dưi rơ̆ng kjăp. Ƀiădah, čar dôk mâo 7 hnơ̆ng čuăn ka mâo msĕ hŏng hdră kčah, klei đĭ kyar bruă duh mkra ka djŏ hŏng klei hmăng hmưi, klei iêo thưr duh bi liê dôk tuôm hŏng lu klei dleh dlan, đa đa klei kpăk gŭn hlăm bruă čuăn mkă, tla hnô, ruh mgaih anôk ala, čuk hli, bruă hluê ngă dŭm hdră ala čar kñăm dôk êmưt…

Čiăng rơ̆ng bi leh dŭm bruă klam bruă duh mkra ala ƀuôn hlăm thŭn 2024, Gia Lai hưn mdah hŏng knŭk kna leh anăn dŭm Phŭn dhar bruă đru mgaih msir dŭm klei kpăk hlăm lu mta bruă msĕ si: mkra mlih hnơ̆ng čuăn yua lăn truh ti thŭn 2025 găl guôp hŏng boh sĭt alŭ wăl, mkŏ mjing hnơ̆ng čuăn bruă duh mkra – hdră mnêč, bruă knuă hlăm bruă ba yua ngăn prăk knŭk kna hlăm bruă mdrao mgŭn, ruh mgaih klei kpăk hlăm bruă hluê ngă hdră ala čar kñăm, brei rŭ mkra êlan dơ̆ng pral Pleiku – Quy Nhơn hluê si hdră duh bi liê bruă knŭk kna… Hlăm bruă pui kmlă doh, Phạm Văn Bình- khua kiă kriê knơ̆ng bruă tuh tia čar Gia Lai lač klă sĭt:

“Gia Lai mâo ai dưi bi êran xuất 3000 MWp, ƀiădah ai dưi ruh mgaih knŏng mâo mă 30 MWp, kyuanăn mkra mjing 10 kdrêč, mkŏ mă sa kdrêč hŏng pui kmlă lăn čar. Thŭn 2020 leh anăn 2021, čar ăt hluê ngă hrăm mbĭt 17 hdră pui kmlă doh hŏng hnơ̆ng 1.200 MWp. Ƀiădah, mrâo anei čuăl mkă pui kmlă mrô 8 knŏng mâo mă 604 MWp kơ wưng 2021 – 2030. Kyuanăn, mkă hŏng klei găl mơ̆ng čar jing ƀiă êdi, čiăng mâo klei uêñ mĭn hĭn mơ̆ng gưl dlông”.

Hlăm mmông mă bruă, bi ala Phŭn bruă êlan klông leh anăn dŭ mdiăng, Phŭn bruă ngăn prăk, Phŭn bruă tuh tia, Phŭn bruă hdră êlan leh anăn duh bi liê, Phŭn bruă hŏng tač êngao, Dhar bruă djuê ana…ăt mâo leh klei hlăk mblang, bi klă đa đa klei hưn mdah, klei akâo mơ̆ng čar dôk hlăm klei dưi kiă kriê, mbĭt anăn, lŏ mđing hmư̆, čih yap dŭm mta phŭn êgao klei dưi čiăng bi mklin, hưn mdah hŏng knŭk kna ksiêm dlăng, mgaih msir kơ čar.

Blŭ hrăm hlăm mmông mă bruă, Khua phŭn bruă Bùi Thanh Sơn lač klă: Thŭn 2024, knŭk kna mâo hdră êlan “Bi mguôp hdră bhiăn, mlih mrâo hŏng klei mbruă, djŏ hdră kčah leh anăn tŭ dưn”. Mơ̆ng boh sĭt hlăm alŭ wăl, mñă kơ čar dưn yua, bi klă dŭm hdră êlan jing klă klơ̆ng. Hluê anăn, čar čiăng kñăm hluê ngă ktang phĭt hdră mtrŭn mrô 23 mơ̆ng Phŭn bruă kđi čar, hluê ngă hdră čuăl mkă čar Gia Lai wưng thŭn 2021 – 2030, ksiêm duah ba mdah dŭm hdră êlan mdê hĭn kơ krĭng Lăn Dăp Kngư, mkŏ mjing hluê ngă dŭm hdră ala čar kñăm, kñăm mlih mrâo klei ngă hră mơar knŭk kna, đru kơ knơ̆ng bruă mkra mjing mnia mblei. Khua phŭn bruă Bùi Thanh Sơn mñă ktang:

“Kâo mñă 3 boh klei čiăng ngă mtam jing: hluê ngă ktang phĭt dŭm hră mơar gĭt gai mơ̆ng gưl dlông Đảng, bruă kƀĭn ala, knŭk kna hluê ngă hrăm mbĭt dŭm hdră êlan mđĭ kyar bruă duh mkra ala ƀuôn leh anăn hdră êlan 5 thŭn. Hlăm anăn dlăng yuôm bhăn hŏng 3 gưl hdră êlan leh anăn 6 bruă klam kñăm 12 êpul hdră êlan mơ̆ng knŭk kna mâo leh, rơ̆ng kơ klei êđăp ênang yang ƀuôn ti alŭ wăl čar, mkŏ mjing bruă duh mkra êngiê, čŏng pô nao mbĭt hŏng ñŭ kma kluôm êlan, klă klơ̆ng, tŭ dưn. Leh anăn tal 3 jing kyua kjăp hdră bhiăn mđĭ boh tŭ dưn hluê ngă dŭm hdră mơar hdră bhiăn lăn čar, hdră mtrŭn mơ̆ng Bruă kƀĭn ala”.

Khua Phŭn bruă mñă klă, thŭn 2024, Gia Lai čiăng nao klă hŏng dŭm hdră êlan mơ̆ng knŭk kna kơ hdră ngă bruă “Bruă klam hdră bhiăn, čŏng pô, mđĭ hĭn klei mbruă leh anăn boh tŭ dưn kjăp”, mbĭt anăn, bi klă anei jing thŭn “Mjêč hĭn” hlăm bruă hluê ngă bruă mđĭ kyar bruă duh mkra ala ƀuôn 5 thŭn čiăng kñăm gĭt gai, ktrâo lač.

Êngao kơ dŭm bruă klam kñăm mâo čar Gia Lai čiăng kñăm hluê ngă, Khua phŭn bruă Bùi Thanh Sơn ăt mñă kơ dŭm Phŭn, dhar bruă, anôk bruă gưl dlông djŏ tuôm lŏ dơ̆ng uêñ mĭn, nao klă hŏng dŭm klei kčĕ, klei hưn mơ̆ng alŭ wăl čiăng kñăm ruh mgaih, mbĭt anăn mâo dŭm klei mtô klă klơ̆ng čiăng kơ čar hluê ngă tŭ dưn 3 hdră ala čar kñăm, mđĭ kyar kjăp bruă pui kmlă doh, bruă tuh tia mkra mjing, bruă lŏ hma kdrăp mrâo mrang, mtrŭt mđĭ klei čhĭ mnia krĭng knông lăn, bruă hiu čhưn ênguê…ăt msĕ mơh đru ksiêm duah đa đa hdră êlan mdê hĭn mđĭ kyar krĭng Lăn Dăp Kngư, hlăm anăn mâo čar Gia Lai./.