VOV4.Êđê - Tlam mbruê, Êpul ngă bruă mơ̆ng Dhar bruă Dhar kreh, mtô mjuăt bi hriăm mơ̆ng bruă kƀĭn ala mơ̆ng khua kiă kriê Dhar bruă Tạ Văn Hạ ba anăp mâo leh mmông mă bruă hŏng bruă sang čư êa čar Gia Lai kơ bruă “Hluê ngă dŭm hdră êlan, klei bhiăn ala čar kơ bruă gang mkhư̆ klei mgăt êa hlăm phung hđeh”. Hluê si klei hưn hlăm klei kƀĭn, wưng thŭn 2016 truh kơ ară anei, ênoh phung hđeh djiê kyua klei truh êka ti čar Gia Lai jing 5456 čô, hlăm anăn mâo truh 401 čô hđeh djiê kyua mngăt êa. Lu phung hđeh djiê kyua amâo thâo luê êa, kƀah klei thâo hlăm bruă gang mkhư̆ klei mngăt êa.

Čiăng bi hrŏ klei truh mngăt êa, mơ̆ng thŭn 2016 truh kơ ară anei, čar Gia Lai hluê ngă leh klei bi hmô “Sang hdĭp êđăp ênang – gang mkhư̆ klei kpĕ êka kơ phung hđeh”, mtô mjuăt, bi hriăm, hâo hưn, mtrŭt mjhar 14.500 gŏ sang hlăm 20 să, wăl krah. Mơ̆ng thŭn 2018, bruă sang čư êa čar Gia Lai mkăp brei leh 13 êklai 500 êklăk prăk čiăng mkŏ mkra dŭm boh ênao hriăm luê êa thâo mĭn ti dŭm sang hră hlăm čar. Ară anei, kluôm čar mâo 90 ênao luê êa mơ̆ng knŭk kna leh anăn êngao knŭk kna.

Y-Khem pô mblang