VOV4.Êđê - Ară anei, hđeh sang hră ti alŭ wăl krĭng Lăn Dăp Kngư lŏ wĭt nao hriăm ti sang hră leh hruê mmông dleh kpăk kyua klei ruă tưp Covid-19. Knơ̆ng bruă mtô mjuăt bi hriăm dŭm alŭ wăl dôk kñăm bi kjăp klei hriăm, rơ̆ng kơ bruă mtô mjuăt, mbĭt anăn lŏ duh bi liê kơ bruă mkŏ mkra dŭm sang hră, adŭ hriăm, rơ̆ng kơ bruă mtô mjuăt bi hriăm mâo boh tŭ dưn hĭn.

Hlăm êpul mnuih ti anăp ƀăng jang sang hră gưl sa Nguyễn Công Trứ, ƀuôn hgŭm Tân Lập, ƀuôn prŏng Ƀuôn Ama Thuôt, amai Trương Thị Ngọc Ánh atăt anak mŭt hriăm adŭ 1, ăt mâo lu klei mđing mĭn:Atăt anak nao sang hră kâo ƀuh m’ak mơh. Mbĭt anăn, kâo ăt bi mĭn kơ anak kyua dôk điêt, ka dưi tlŏ vaccine. Čang hmăng hŏng klei mprăp djăp ênŭm mơ̆ng sang hră, anak kâo srăng dưi hriăm jăk ti sang hră”

Tĭng kơ sang hră, mtô bi hriăm ti sang hră hlăm wưng adôk mơ̆ng thŭn hriăm anei jing klei yuôm bhăn, kñăm bi kjăp klei thâo săng kơ phung hđeh, boh nik hŏng phung hđeh adŭ 1 lehanăn 5, leh 1 thŭn dôk hriăm online. Hluê si Bùi Thị Hương, khua sang hră gưl sa Nguyễn Công Trứ, čiăng mtô bi hriăm ti sang hră dưi mkŏ mjing hŏng klei jăk, sang hră mđing êdi kơ hdră gang mkhư̆ klei ruă tưp: “Hmei ksiêm kjăp truh kơ jih phung nai mtô mđing lŏ bi hriăm thiăm mbŏ klei thâo mơ̆ng akŏ thŭn hriăm truh kơ ară anei mđrĭng hŏng klei hriăm adôk hlăm thŭn. Phung amĭ ama sa ai, phung nai mtô jih ai tiê mtô čiăng kơ phung hđeh bi leh hdră hriăm mơ̆ng pô hlăm thŭn hŏng klei jăk hĭn êdi.

Hŏng gưl hđeh điêt, klei amâo dưi nao hriăm ti sang hră giăm 1 thŭn êgao jing sa klei ênguôt êdi, boh nik hŏng hđeh 5 thŭn dôk čiăng hriăm lu mta klei êlâo kơ mŭt adŭ 1. Hlăm ênoh anăn, phung hđeh 5 thŭn ti dŭm boh ƀuôn mnuih djuê ƀiă dôk čiăng hriăm êdi kơ Tiếng Việt dưi ba wĭt boh tŭ hlăm gưl hriăm ti anăp. Kyua anăn, sang hră gưl hđeh điêt ti Dak Lak mâo bruă klam mđĭ klei hriăm Tiếng Việt kơ phung hđeh hlăm wưng ti anăp. Nai mtô Đặng Thị Tuyến, Khua sang hră gưl hđeh điêt Tân Lập, ƀuôn prŏng Ƀuôn Ama Thuôt brei thâo: “Adŭ mâo hđeh mnuih djuê ƀiă, hmei brei sa čô nai mnuih djuê lar lehanăn sa čô nai mnuih djuê ƀiă mđĭ klei mtô bi hriăm Tiếng Việt kơ phung hđeh kñăm ba wĭt klei jăk găl hĭn. Hđeh yua boh blŭ mnuih djuê lar kjăp leh, raih leh mâo leh nai mtô mnuih djuê lar, bi tơdah hđeh amâo thâo săng, knŏng thâo klei blŭ amĭ kkiêng mâo leh nai mtô mnuih djuê ƀiă kăp đru čiăng kơ hđeh ƀrư̆ mâo klei thâo săng, snăn hđeh srăng mâo klei jăk găl hĭn tơdah mŭt hriăm adŭ 1.

Bi ti kdriêk Đăk Pơ, čar Gia Lai mkăp leh 1,6 êklai prăk čiăng mkra dŭm anôk bruă nah gŭ, blei mprăp kdrăp mnơ̆ng yua hlăm hdră mtô bi hriăm kơ hđeh. Nai Thái Thị Cẩm Linh, nai mtô klei blŭ ala tač êngao ti Sang hră gưl sa Trần Phú, să Tân An, kdriêk Đăk Pơ brei thâo, sang hră duh bi liê mprăp leh kơ adŭ hriăm hŏng 21 boh maĭtĭng lehanăn jhưng mdah hdră mtô ênuk mrâo. Mơ̆ng anăn truh kơ ară anei, đru mguôp mđĭ leh hnơ̆ng tŭ jăk klei mtô bi hriăm. Mơ̆ng anăn, đru kơ phung hđeh khăp hriăm hĭn, nai mtô ăt dưi mtô bi hriăm lu klei thâo săng hĭn kơ phung hđeh. “Kâo ƀuh jăk êdi hlăm klei mtô bi hriăm. Ênai, pŏk rup siam đru leh kơ hdră mtô bi hriăm mbŏ klei thâo truh kơ phung hđeh pral, ênưih hĭn. Kdrăp maĭ mâo rơ̆ng kjăp, dưi ba yua nanao hlăm hdră mtô bi hriăm.

Hlăk kdrăp mtô bi hriăm ti sang hră gưl sa Trần Phú ba yua ăt jăk, snăn 40 boh maĭ tĭng, jhưng mdah kdrăp mrô ênuk mrâo mơ̆ng Sang hră gưl dua Chu Văn An amâo lŏ jăk êbeh mkrah wah. Čiăng rơ̆ng kơ bruă mtô bi hriăm, phung hđeh bi dôk mbĭt dua, tlâo čô yua sa boh maĭ tĭng. Nai mtô Nguyễn Cao Trí, Khua sang hră gưl dua Chu Văn An, kdriêk Đăk Pơ brei thâo: “Êjai ka mâo prăk blei mprăp snăn hmei ăt mkra nanao kyua anăn ăt dưi mtô bi hriăm mơh kơ phung hđeh. Khă snăn, dŭm kdrăp anei gơ̆ mơ̆ng sui leh kyua anăn ba yua amâo đei jăk ôh mkă hŏng kdrăp ênuk mrâo”

Dŭm thŭn êgao, dŭm anôk bruă mtô bi hriăm ti kdriêk Đăk Pơ, čar Gia Lai pral čih mkra hdră kriê dlăng, ba yua dŭm adŭ hriăm lehanăn kdrăp yua djŏ guôp hŏng klei mâo mơ̆ng grăp anôk bruă, rơ̆ng mđĭ lar tuič hnơ̆ng boh tŭ ba yua. Truh ară anei, 22 boh sang hră dŭm gưl ti kdriêk Đăk Pơ, čar Gia Lai dưi duh bi liê djăp ênŭm anôk bruă nah gŭ, kdrăp mnơ̆ng. Nguyễn Thị Như Thủy, K’iăng khua anôk bruă mtô bi hriăm kdriêk Đăk Pơ brei thâo: Hluê si hdră kčah, hlăm thŭn 2022, kdriêk Đăk Pơ duh bi liê leh êbeh 1.6 êklai prăk đru kơ dŭm sang hră ti alŭ wăl duh bi liê anôk bruă nah gŭ, kdrăp mnơ̆ng mkăp kơ hdră mtô bi hriăm. Mơ̆ng anăn, ƀrư̆ ƀrư̆ mkăp djŏ hŏng bruă klam mlih mrâo hlăm bruă mtô bi hriăm hlăm boh klei mrâo.  “Thŭn hriăm 2020-2021, Anôk bruă ăt mkŏ mjing hdră nao ksiêm dlăng kdrăp mnơ̆ng lehanăn thâo klă klei mâo mơ̆ng grăp sang hră. Dưi ba mdah hŏng anôk bruă sang čư̆ êa kdriêk kơ kdrăp mnơ̆ng lehanăn lŏ akâo mkăp prăk blei thiăm. Ară anei akŏ thŭn 2022, kdriêk duh kơ grăp sang hră mơ̆ng 60 truh kơ 80 êklăk prăk čiăng blei mrâo amâo dah lŏ mkra dŭm kdrăp mnơ̆ng mkăp kơ hdră mtô bi hriăm ti sang hră.

Leh 1 thŭn hriăm, lu jing hriăm online ară anei lŏ nao hriăm ti sang hră, dŭm anôk bruă mtô bi hriăm ti krĭng Lăn dap kngư pral dôk bi h’ĭt hdră mkŏ mjing, krơ̆ng kjăp ênoh hđeh nao sang hră, duh bi liê kơ anôk bruă nah gŭ, hnêč hŏng wưng phung hđeh nao hriăm ti sang hră anei mkŏ mjing hdră mtô bi hriăm jăk, tŭ dưn kñăm bi leh jih bruă klam mâo kčah mtrŭn hlăm thŭn hriăm./.