Tui si knơ̆ng bruă sang čư̆ êa čar Gia Lai, hlam mkrah thŭn 2025, ênoh mâo hrui wĭt hlăm čar (GRDP) giăm 7,5%. Anei jign ênoh năng bi mđĭ ai, boh nik leh čar mrâo găn klei bi mŭt mbĭt, dôk čiăng hrue mlan bi hơĭt bruă knuă, lehanăn hdră êlan kiă kriê.

Kơ ênoh ngăn prăk mâo ba wĭt kơ knŭk kna êbeh 13.600 tỷ đồng, đĭ hĭn mkă hŏng wưng anei thŭn dih. Klei năng mđing êdi, klei đru mguôp mơ̆ng alŭ wăl Bình Định êbeh kơ 10.000 êklai prăk, bi ti Gia Lai hđăp knŏng mâo 3.600 êklai prăk. Klei bi mnia mblei hŏng ala tač êngao mâo giăm 1,7 tỷ USD, đĭ prŏng. Hjăn Gia Lai (hđăp) klei bi mnia mblei hŏng ala tač êngao đĭ giăm dua blư̆ mtam, lu jing kphê, mta phŭn mơ̆ng bruă lŏ hma.

Klei bi knăl jăk mơ̆ng Gia Lai mrâo jing kbiă hriê mơ̆ng dŭm mta bruă prŏng mâo duh bi liê, msĕ si bruă rŭ mkra êlan dơ̆ng pral Quy Nhơn – Pleiku, kdrŭn Phù Mỹ, lehanăn lŏ mkra êlan êdeh phiơr đĭ trŭn mrô 2 tač êdeh phiơr Phù Cát.  Dŭm bruă anăn amâo mâo djŏ knŏng jing yuôm bhăn kơ klei mđĭ kyar duh mkra, ƀiădah lŏ đru mguôp yuôm bhăn kơ klei găn êro, kơ logistics, iêo jak lu klei duh bi liê hlăm ala čar lehanăn mơ̆ng ala tač êngao.

Siămdah, tui si Hồ Quốc Dũng, Khua bruă Đảng čar Gia Lai, čar leh klei bi mŭt mbĭt dôk hŏng lu klei lông dlăng, mâo klei awăt kƀah. Êdah êdi jing klei kơ êlan klông, knơ̆ng mbông êa, bruă mdrao mgŭn, lehanăn bruă sang hră mơar ăt ka bi sa hnơ̆ng ôh. Klei mdê mơ̆ng klei kaĭ kriê plah wah dua alŭ wăl ăt hmăi mơh kơ boh tŭ dưn klei kiă kriê mơ̆ng     Gia Lai (mrâo). Čiăng mghaih msir jih klei awăt êdu anăn, čar Gia Lai mâo leh asăp mtrŭn mrâo, hŏng hdră êlan “Klă mnuih – klă bruă – klă mnơ̆ng dhơ̆ng mâo – klă mngač hnơ̆ng mă bruă – klă mngač bruă đua klam – klă mngač klei dưi” anăn yơh jing giê knhâo ktrâo êlan mă bruă. Mơ̆ng anăn, ênoh čuăn kơ bruă duh mkra ala ƀuôn mâo jao klă mngač truh kơ grăp boh ƀuôn hgŭm boh nik mđing hĭn kơ dŭm krĭng dleh dlan. Hồ Quốc Dũng lač: “Hŏng klei gĭr hlăm thŭn anei bi mâo klei đĭ kyar 8%. Ksiêm dlăng jih klei dleh dlan, klei gun kpăk, čiăng mâo hdră êlan ruh mgaih. Brei mâo klei mlih mrâo ktang mơ̆ng klei mĭn hdră kiă kriê bruă sang čư̆ êa hŏng klei mbruă, pioh mă bruă jăk kơ mnuih ƀuôn sang lehanăn phung duh mkra, jing bruă ngă mtam mơ̆ng nah gŭ. Mă klei tŭ dưn bruă knuă, lehanăn klei sa ai mơ̆ng mnuih ƀuôn sang mjing giê mkă kơ klei tŭ jing mơ̆ng pô”.

Knơ̆ng bruă sang čư̆ êa čar Gia Lai mâo leh dŭm hdră êlan čiăng kiă kriê lehanăn gĭt gai. Tal êlâo jing mđĭ kyar bruă mrô hlăm klei kiă kriê. Jih jang bruă kiă kriê lehanăn ênoh čuăn kơ klei duh mkra ala ƀuôn  srăng dưi mă bruă hŏng kdrăp mrô sơăi srăng đru kơ dŭm ƀuôn hgŭm ênưih hlăm klei tui duah, lehanăn mă bruă. Phạm Anh Tuấn, Khua knơ̆ng bruă sang čư̆ êa čar Gia Lai lač: “Jih jang dŭm knơ̆ng dhar bruă bi hơĭt klei jao bruă, lehanăn eneoh čuăn hŏng klei klă mngač truh hŏng grăp alŭ wăl. Boh nik, khua kiă kriê, k’iăng khua kiă kriê dŭm knơ̆gn dhar bruă bi mâo bruă klam kơ boh tŭ dưn knhal tuič mơng anôk bruă pô tui si ênoh kčah mâo jao, mjuăt bi hriăm, ktrâo atăt alŭ wăl hdră mă bruă jing mghaih msir bruă knuă kơ mnuih ƀuôn sang, lehanăn mđĭ kyar klei duh mkra ala ƀuôn. Dŭm mta bruă anăn bi mă bruă hŏng kdrăp mrô sơăi truh ênŭm hlăm grăp boh ƀuôn hgŭm, truh hŏng dŭm knơ̆ng dhar bruă, dlăng mơ̆ng anăn thâo mghaih msir bruă knuă hŏng klei djŏ”./.