2 thŭn hŏng anei, yap mơ̆ng leh gơng bi êran pui kmlă hŏng ai angĭn N13 hlăm êpul bruă bi êran pui kmlă hŏng ai angĭn Ia Le 1 mơ̆ng knơ̆ng bruă bi êran pui kmlă hŏng ai angĭn Cao Nguyên 1 dưi bi leh, 5 čô mnuih hlăm gŏ sang amai Phạm Thị Hòa (alŭ Phú Bình, să Ia Le, kdriêk Chư Pưh) hdĭp hlăm klei dôk amâo mâo hơĭt pĭt amâo mâo mđao ôh, kyuadah sang diñu kbưi mă hŏng gơ̆ng bi ểan pui kmlă hŏng ai angĭn hlăm brô 80 m. Jih jang bruă knuă lehanăn klei duh ƀơ̆ng jing ti gŭ dhiăr gơ̆ng bi êran pui kmlă hŏng ai angĭn. Gŏ sang ñu čiăng dưi mbĕ nao dôk kơ anôk mkăn, duah anôk êđăp ênang ƀiădah ka mâo klei găl ôh:

“Dhiăr mơ̆ng gơ̆ng bi êrah pui djŏ hlăm wăl sang hmei truh 70 m, gơ̆ng kbưi hŏng lăn sang hmei hlăm brô 10 m, mơ̆ng mơ̆ng jơ̆ng gơ̆ng truh kơ sang hmei jing hlăm brô 80 m. Ară anei kwang dhiăr guôm jih mnơ̆ng mnuă hmei pla mjing, lehanăn klei hdĭp hmei tinăn sơăi. Kyuanăn yơh amâo mâo klei hơĭt ôh, huĭ snăk, 2 thŭn hŏng anei leh mơĭt hră truh kơ djăp anôk”.

        Tui si mta mtrŭn mơ̆ng phŭn bruă tuh tia mkra mjing ti kdrêč 2, mta 2, hră mtrŭn mrô 02/2019/TT-BCT snăn “Gơ̆ng bi êran pui kmlă hŏng ai angĭn bi kbưi hŏng alŭ wăl mnuih ƀuôn sang hdĭp ƀiă êdi jing 300 m”. Ƀiădah, ară anei Phŭn bruă tuh tia mkra mjing ka mâo ôh klei čiu hnô, lehanăn đru kơ knuă 300 m gŭ jơ̆ng gơ̆ng bi êran pui kmlă hŏng ai angĭn. Mơ̆ng klei anei pô duh bi liê 16 anôk bruă mkra mjing phŭn pui bi êran hŏng ai angĭn mâo mkra mjing leh mơ̆ng hlăk thŭn 2021 ti čar Gia Lai knŏng ngă klei čiu hnô mil 10% ênoh čiu hnô lehanăn mkŏ mkra anôk dôk mrâo mơ̆ng knŭk kna tui si klei čoh čuăn leh ti kdrêč 2 mta 10 klei mklă mtrŭn mrô 09/2018/QĐ-UBND hrue 21-3-2018 mơ̆ng knơ̆ng bruă sang čư̆ êa čar Gia Lai.

        Phan Thị Minh Phượng, mnuih mâo sang dôk hlăm gŭ gơ̆ng bi êran pui kmlă hŏng ai angĭn Ia Le 1 lač, ênoh čih hnô 10% msĕ snăn jing amâo mâo năng ôh:

“Ênhă sang hmei prŏng 180 m2, war bê jing êbeh 540 m2. Hŏng čiu hnô knŏng mil 190 êklăk prăk đuič snăn ti anôk srăng dưi nao. Hŏng ênoh anei amâo mâo djăp ôh nao mbĕ dôk kơ anôk mkăn. Lehanăn knŏng sa anôk anei yơh gŏ sang hmei mâo, snăn ară anei knŏng čiăng bi mâo ênoh čiu hnô bi djŏ, čiăng kơ hmei dưi bi hơĭt klei hdĭp mda”.

        Dôk hnĭng kyua klei tŭ dưn kơ pô ka dưi mghaih msir, dŭm gŏ êsei mnuih ƀuôn sang ti să Ia Le, kdriêk Čư̆ Pưh mâo leh lu blư̆ mơĭt hră truh hŏng lu anôk. Tŭ mă klei kwưh akâo mơ̆ng mnuih ƀuôn sang, knơ̆ng bruă sang čư̆ êa čar Gia Lai mâo leh hră akâo kơ knŭk kna, êpul khua bi ala bruă kƀĭn ala čar ăt mâo leh mơh klei bi klin jih jang klei blŭ mơ̆ng mnuih ƀuôn sang ba mtruh hŏng anôk bruă kƀĭn ala. Krah mlan 4/2023, phung khua kiă kriê knơ̆ng bruă sang čư̆ êa čar Gia Lai mâo leh klei bi blŭ hrăm hŏng mnuih ƀuôn sang să Ia Le. Truh knhal jih mlan 5/2023 anei, Knơ̆ng bruă sang čư̆ êa čar Gia Lai mbĭt hŏng dŭm dhar bruă djŏ tuôm mơ̆ng čar srăng mâo klei ngă bruă hŏng dŭm knơ̆ng bruă, kñăm tui duah hdră mghaih msir hĕ bi leh, rơ̆ng ba wĭt klei tŭ dưn kơ mnuih ƀuôn sang.

Nguyễn Minh Tứ- K'iăng khua knơ̆ng bruă sang čư̆ êa kdriêk Čư̆ Pưh, čar Gia Lai brei thâo, êjai dôk guôn dŭm phŭn dhar bruă mơ̆ng gưl dlông mâo klei ktrâo atăt, snăn bruă sang čư̆ êa alŭ wăl mâo nanao klei mtă mtăn kơ mnuih ƀuôn sang, đăm ngă ôh klei bi kčŭt lu mnuih, ngă luič klei êđăp ênang yang ƀuôn.

“Leh mâo mă klei mnuih ƀuôn sang kwưh akâo, snăn bruă sang čư̆ êa alŭ wăl jih ai tiê mtrŭt mjhar, čiăng bi mghaih msir djăp mta boh klei hŏng klei jăk kơ mnuih ƀuôn sang. Ară anei mâo 17 gŏ êsei mâo leh sang pưk, lehanăn mnơ̆ng rŭ mkra gŭ gơ̆ng bi êran pui kmlă hŏng ai angĭn, hmăi amâo mâo jăk kơ klei hdĭp mda. Čar mbĭt hŏng kdriêk lu blư̆ leh mă bruă hŏng dŭm knơ̆ng bruă, akâo kơ gưl dlông mâo hdră mghaih msir kơ jih klei anei”.

Êlâo anăn, mnuih ƀuôn sang ti să Ia Pếch, kdriêk Ia Grai, čar Gia Lai ăt lač, dŭm ƀĕ gơ̆ng bi êran pui kmlă hŏng ai angĭn ngă hmăi amâo mâo jăk ôh hŏng boh mnga jih jang mnơ̆ng pla mjing. Msĕ si, mnuôr mđuĕ êa mơ̆ng gơ̆ng bi êran pui kmlă kur kroh jih lăn ala anôk mnuih ƀuôn sang pla mjing, gơ̆ng dhiăr bi êran êjai bi êran ba klei ngañ prŏng hŏng klei hdĭp mda mnuih ƀuôn sang giăm anăn. Kyuanăn, năng mâo mtam klei đru mbĕ mnuih ƀuôn sang, đuĕ nao dôk kơ anôk êđăp ênang mơ̆ng gơ̆ng bi êran pui kmlă hŏng ai angĭn. Mnuih ƀuôn sang ti đa đa să hlăm kdriêk Čư̆ Prông, čar Gia Lai ăt hưn leh mơh kơ klei ngañ mơ̆ng gơ̆ng bi êran pui kmlă hŏng ai angĭn, kyua jĕ hŏng sang digơ̆.

Knơ̆ng bruă tuh tia mkra mjing čar Gia Lai akâo leh mơh kơ phŭn bruă tuh tia mkra mjing mâo hră mơar ktrâo atăt, amâo dah ya mta hră mơar kčĕ đru tui si hdră mtrŭn klă mngač kñăm răng mgang gơ̆ng bi êran pui kmlă hŏng ai angĭn, lehanăn čiu hnô, đru ba ti dŭm ênhă lăn, lehanăn ngă dŏ mnuih ƀuôn sang djŏ tuôm hŏng dŭm anôk rŭ mkra gơ̆ng bi êran pui kmlă hŏng ai angĭn hlăm wăl êđăp ênang anôk rŭ mdơ̆ng gơ̆ng bi êran pui kmlă hŏng ai angĭn. Čiăng bi mâo klei ktrâo atăt hŏng klei djŏ, tĭng mkă ênoh čiu hnô kơ lăn ala, sang pưk, mnơ̆ng rŭ mkra mkăn, mnơ̆ng pla, war rông mnơ̆ng... mjing knơ̆ng kơ bruă tĭng tla čiu hnô, mơ̆ng anăn đru bi hơĭt klei êđăp ênang ti dŭm alŭ wăl mâo anôk rŭ mkra gơ̆ng bi êran pui kmlă hŏng ai angĭn ti čar Gia Lai.