Hlue si klei ksiêm yap, grăp čô mnuih mă bruă dôk đuôm prăk mlan mơ̆ng 30 êklăk prăk truh 50 êklăk prăk. Lê Tấn Thanh, ti să Dăk Wer, kdriêk Dak Rlâp, čar Dak Nông brei thâo: Hlăm mlan 10/2023, ñu iêô jak giăm 70 čô mnuih mă bruă mơ̆ng čar Dak Nông, Phú Yên, Bình Phước leh anăn dŭm čar kwar Yŭ nao đru rŭ mdơ̆ng war ŭn. Truh ară anei giăm 4 mlan leh, anôk bruă mưn knŏng tla 1 kdrêč ƀiă. Thanh lu blư̆ bi blŭ hrăm ƀiădah knŏng hmư̆ klei ƀuăn đuč:

 “Ară anei pô rông ayŏng adei dŭm mlan leh, mơ̆ng hruê 16/10/2023 truh ară anei, mâo sa gưl knơ̆ng bruă Vương Anh Thắng brei mă êlâo 600 êklăk, truh ară anei prăk mlan mnuih mă bruă leh anăn mưn kdrăp mnơ̆ng hlăm brô 3 êklai  2 êtuh êklăk prăk. Kâo mâo blư̆ blŭ hrăm hŏng pô bi liê snăn diñu ƀuăn hŏng kâo hruê 20-12 ayŏng adei đru kơ hruê kăm êdei srăng mâo prăk leh anăn ƀuăn tal anei truh tal mkăn truh ară anei ăt ka mâo mơh, amâo lŏ dưi rông ayŏng adei ôh. Čang hmăng anôk bruă djŏ tuôm srăng mjing klei găl čiăng kơ kâo mâo prăk tla kơ ayŏng adei wĭt ƀơ̆ng Tết ti ƀuôn sang. Bi jih jang grăp bruă êdei anei bi kčut kđi êdei snăn leh Tết msir mgaih, kyua giăm Tết leh, atyŏng adei wĭt kơ ƀuôn sang drông Tết.”

Msĕ snăn mơh, ayŏng Trần Minh Hướng (ti Tây Ninh) ăt ayŏng adei mơ̆ng ƀuôn sang hriê mă bruă ti anôk rông ŭn. Êbeh 3 mlan anei, ñu pô hŏng ayŏng adei dôk đuôm nư giăm 5 êtuh êklăk prăk mlan.

 “Hriê tinei giăm 3 mlan leh, tal êlâo snăn ăt êbeh 10 čô, 20 čô, ară anei ayŏng adei wĭt leh adôk 8 čô, amâo prăk, amâo prăk tla kơ ayŏng adei wĭt ƀuôn sang. Kah knar sa čô 12 êklăk prăk kơ phung kăp đru, phung mkra phŭn jing 15 êklăk, čang hmăng mâo prăk čiăng kơ ayŏng adei wĭt ƀuôn sang ƀơ̆ng Tết snăn ară anei amâo thâo ôh si srăng ngă čiăng kơ ayŏng adei dưi wĭt ƀơ̆ng Tết.”

Hồ Công Anh Tuấn, ti kdriêk Čư̆ Sê, čar Gia Lai, mă rŭ mdơ̆ng 6 war ŭn ana ăt lĕ hlăm boh klei msĕ snăn mơh.

 “Tlâo mlan leh ăt ka tĭng tla prăk kơ ayŏng adei mă bruă. Yuôm bhăn hĭn jing pô bi liê leh anăn rŭ mdơ̆ng snăn si ngă kâo kăn thâo rei. Ƀiădah ară anei êmuh Vương Anh Thắng  (pô rŭ mdơ̆ng) snăn diñu lač kơ pô bi liê ka bi liê prăk. Ƀiădah ară anei kâo knŏng ngă hră kuôl kă hŏng Vương Anh Thắng,amâo thâo ôh hlei pô bi liê. Čang hmăng mâo hdră ƀiă hĭn jing djăp prăk mlan kơ ayŏng adei kbưi ƀuôn sang, digơ̆ tinei 3 mlan leh, ti sang mâo mô̆, anak, ară anei amâo mâo prăk, giăm Tết si thâo mâo prăk wĭt buôn sang ăt pap mơh”

 Hdră bruă anôk rông ŭn ana mđai ti alŭ Cây Xoài (să Ia H'la, kdriêk Čư̆ Pưh, Knơ̆ng bruă Phát Tài Gia Lai ngă pô bi liê. Ênoh bi liê hdră bruă hlăm brô 80 êklai prăk, knơ̆ng bruă Vương Anh Thắng ngă pô rŭ mdơ̆ng.Bruă êmưt tla prăk mlan kơ phung mă bruă, dưi lač jing kyua Knơ̆ng bruă Phát Tài Gia Lai leh anăn anôk bruă rŭ mdơ̆ng Vương Anh Thắng mâo lu klei gun kpăk djŏ tuôm kơ klei ngă soh hdră kčah hlue si hdră kuôl kă dŭm tĭng siñê leh êlâo anăn.

 Kyua anăn, ka mâo ôh klei bi tŭ ư hlăm bruă knuă, anăn ăt ka bi tŭ ư kơ hnơ̆ng bruă hlue ngă, anăn knơ̆ng prăk ka msir mgaih ngă kơ phung mă bruă đuôm prăk mlan nanao.

Rơ Lan Hoen,  Khua knơ̆ng bruă sang čư̆ êa să Ia H’la brei thâo, Knơ̆ng bruă sang čư̆ êa să păn kjăp boh klei dŭm pluh čô mnuih ƀuôn sang đuôm prăk mlan. Êlâo hĭn, Knơ̆ng bruă sang čư̆ êa să jao leh kơ êpul kahan ksiêm păn kjăp boh klei leh anăn rơ̆ng êđăp ênang. Mbĭt anăn srăng blŭ hrăm hŏng dŭm tĭng djŏ tuôp hmao msir mgaih klei gun kpăk kơ mnuih ƀuôn sang. Leh anăn srăng mâo klei hưn mdah hŏng Knơ̆ng bruă sang čư̆ êa kdriêk Čư̆ Pưh leh anăn dŭm bruă djŏ tuôm kơ bruă anei./.