Hrue mbrue (22/1), Adŭ bruă kahan ksiêm êlan klông - Kahan ksiêm čar Gia Lai hgŭm leh hŏng sang mkra mjing sĭk An Khê mkŏ mjing klei bi trông mtrŭt mjhar lehanăn ƀuăn hlue gưt djŏ klei bhiăn êđăp ênang êlan klông hŏng Sang mkra mjing sĭk An Khê, hŏng grăp čô mnuih, anôk bruă dŭ mdiăng hlăm yan kbâo thŭn 2023 – 2024.   

Ti anôk ngă klei kuôl kă, tĭng kơ Sang mkra mjing Sĭk An Khê, phung duh mkra, êpul hgŭm bruă dŭ mdiăng ăt ngă leh klei kuôl kă kơ klei bhiăn hgŭm hlue ngă dŭm ênoh čuăn klei dŭ mdiăng, dăp mnơ̆ng hlăm êdeh, ngă bi djŏ hŏng mta mtrŭn. Ti anôk bi kƀĭn, mgăt êdeh Nguyễn Tấn Chung, să Nghĩa An, kdriêk Kbang lač, yan kpĭ kbâo thŭn anei, sang mkra mjing sĭk An Khê mbha leh hră blei kbâo bi djŏ guôp, đru kơ bruă hrui blei kbâo kơ mnuih ƀuôn sang bi hơĭt. Mơ̆ng anăn, amâo mâo lĕ ôh hlăm klei êbeh đei, amâodah kƀah êdeh dŭ mdiăng, huĭdah bi ksŭn kbâo truh kơ klei dăp mdiăng ktrŏ êgao hnơ̆ng./.