VOV4.Êđê- Hruê 17/5, Kreh gang mkhư̆ klei djiê êka krĭng Asi (AIP) bi hgŭm hŏng Dhar bruă răng mgang klei êđăp ênang êlan klông čar Gia Lai mkŏ mjing leh Hdră tĭng dlăng boh tŭ wưng tal 2 mơ̆ng Hdră “Bi hrŏ hnơ̆ng êran – Sang hră êđăp ênang” ti ƀuôn prŏng Pleiku.  Hdră anei dưi ngă ti Pleiku (Gia Lai) mơ̆ng mlan 7/2020 truh kơ ară anei. Hluê si Lê Văn Hạnh – K’iăng khua knơ̆ng bruă êlan klông – dŭ mdiăng, K’iăng khua dhar bruă răng mgang klei êđăp ênang êlan klông čar Gia Lai, dŭm sang hră ti ƀuôn prŏng Pleiku rơ̆ng leh hnơ̆ng čuăn kơ gru hmô krĭng wăl sang hră êđăp ênang.

Hluê anăn, ti ƀăng jang 29 sang hră ti Pleiku, êpul mkra mđĭ, pŏk mlar, mkra mrâo êbeh 800 êbâo m2 êlan bêtông, mkra êbeh 2.000 m2 ping êlan, dưm 136 pŏk mdhă hưn răng ti ƀăng jang sang hră, treh ling mbha êlan, bi hrŏ hnơ̆ng êran… Mđrĭng hŏng anăn jing mđĭ klei thâo săng mơ̆ng êpul êya lehanăn bi hgŭm hŏng êpul kahan ksiêm êlan klông ƀuôn prŏng Pleiku hiu suang dlăng, ksiêm dlăng phung ngă soh hŏng klei kčah mtrŭn kơ hnơ̆ng êran êdeh ti krĭng wăl sang hră./.

Pô mblang: H’Nêč Êñuôl