VOV4.Êđê- Hruê 23/2, čar Gia Lai mâo 662 čô mnuih djŏ Covid-19. Anei jing ênoh mnuih djŏ lu hĭn hlăm wang 1 hruê ti čar yap mơ̆ng mphŭn mâo klei ruă tưp truh ară anei. Hluê anăn, ƀuôn prŏng Pleiku jing alŭ wăl mâo ênoh mnuih ruă lu hĭn hlăm čar. Dŭm kdriêk mâo ênoh mnuih ruă lu êdei anăn jing kdriêk Čư̆ Pah (67 čô), kdriêk Kbang )58 čô), kdriêk Čư̆ Prông (50 čô). Nguyễn Đình Tuấn - K’iăng Khua Knơ̆ng bruă mdrao mgŭn Gia Lai brei thâo, mta phŭn jing kyua êlâo tết leh anăn hlăm Tết nguyên đán, phung wĭt ti čar Gia Lai lu leh anăn mnuih ƀuôn sang ngă ngơi mang kyua tlŏ leh vaccin.

Wăt tơdah ênoh djŏ Covid-19 đĭ, ƀiădah êbeh 94% ênoh mnuih ruă ti hnơ̆ng hdjul, amâodah amâo mâo klei bi knăl; ênoh mnuih ruă kjham đĭ, ênoh mnuih djiê ƀiă. Snăn yap mơ̆ng hruê 26/4/2021 truh hruê 23/2/2022, čar Gia Lai yap mâo êbeh 16.900 čô mnuih djŏ Covid-19. Ară anei mâo 45 čô mnuih djiê leh anăn adôk mâo êbeh 1.400 čô mnuih dôk mdrao ti dŭm anôk mdrao mgŭn ti čar.

Pô mblang: H’Zawut Ƀuôn Yă