VOV4.Êđê- Hruê mmông êgao, mčhua klei ka thâo săng klă leh anăn klei knap mñai mơ̆ng mnuih ƀuôn sang jing mnuih djuê ƀiă ti să Čư̆ Dang Ya, čar Gia Lai, mâo phung jhat ngă klei mplư plah mmiă klei dưi yua lăn. Klă klơ̆ng, dŭm klei anăn knŏng dưi hmao ƀuh êjai phung mplư anăn ngă hră mơar ba jao kơ pô tal 3 amâodah ngă hră mơar ba mgrơ̆ng čan prăk knơ̆ng bruă ngăn prăk, kyuanăn mâo klei hmăi amâo jăk dleh dưi mgaih msir.

 Ƀô̆ mta ênguôt dhuôt, amai Kưm, kkiêng thŭn 1978, ti ƀuôn Xoă, să Čư̆ Dăng Ya, kdriêk Čư̆ Pah, čar Gia Lai brei thâo, pô dôk huĭ srăng luič jih 5 sao lăn kphê. Amai Kưm yăl dliê, thŭn 2018, kyua čiăng prăk duh ƀơ̆ng, amai tư̆ ư brei mnuih mbĭt ƀuôn jing Vũ Thị Hằng mưn yua lăn hlăm wang 10 thŭn, hŏng ênoh 100 êklăk prăk. Hlăm wưng anei, Hằng brei kơ amai siñê dŭm mta hră m’ar čiăng kuôl kă klei mưn yua lăn. Bi mĭn 10 thŭn êdei srăng lŏ pla mjing ti krĭng lăn pô, ƀiădah truh mlan 1/2022, hlăk Adŭ bruă bi mklă lăn ala kdriêk Čư̆ Pah nao ti sang bi mklă, amai thâo lăn pô jao leh kơ Hằng mơ̆ng mlan 8/2020, ară anei pô anei dôk ngă hră m’ar lŏ ba jao lăn anei kơ pô tal tlâo:

           “Bi mĭn ăt ruă akŏ mơh, pĭt kăn h’ĭt mơh. Pô brei mưn yua, si ngă bi mlih jing anăn ñu lĕ, amâo lŏ thâo ôh. Diñu iêu adei kluč, amĭ ama kđăm kngan, lŏ mkra hră djă yua lăn pô kăn thâo lei. Ñu lač mkra hră djă yua lăn mrâo. Tơdah Hằng amâo brei hră djă yua lăn kơ kâo, kâo srăng ngă hră kčŭt hưn ñu ti să”.

Ung mô̆ Kưm rŭng răng kyua huĭ luič 5 sao lăn

        Ti ƀuôn Xoă, gŏ sang ayŏng Chang, kkiêng thŭn 1981 ăt dôk huĭ srăng luč jih đang war êbeh 300 m2 dôk hdĭp. Kyua thŭn 2020, gŏ sang ñu jao hră djă yua lăn brei kơ Hằng ngă hră čan prăk ti knơ̆ng prăk. Mơ̆ng anăn truh kơ ară anei, gŏ sang Chang ka mâo mă prăk ôh ƀiădah hră djă yua lăn kăn lŏ ƀuh. Truh knhal jih mlan 2/2022, hlăk mâo êpul mnuih amâo thâo kral hriê ti sang mă prăk nư 140 êklăk prăk, ung mô̆ ñu thâo yơh hră djă yua lăn pô mâo Hằng mgơ̆ng mă čan prăk arăng.

 “Arăng hriê mă hnư, lač kâo tla 140 êklăk prăk kơh dưi mă hră djă yua lăn. Kâo lač amâo tuôm mă prăk anei ôh. Hmei nao sang Hằng, ñu lač ñu mă čan, ñu srăng tla, duah prăk tla wĭt kơ arăng lehanăn lŏ mă hră djă yua lăn. Kâo bi mĭn măng ai, pĭt kăn h’ĭt. Kâo mrâo hưn hŏng khua ƀuôn, ka nao hưn hŏng anôk bruă sang čư̆ êa alŭ wăl ôh”.

Ung mô̆ ayŏng Chang, ti ƀuôn Xoá, să Čư̆ Dăng Ya, Čư̆ Pah

         Hoàng Anh Tuệ - Khua adŭ bruă bi mklă lăn ala kdriêk Čư̆ Pah, čar Gia Lai brei thâo, hlăm thŭn 2021, Vũ Thị Hằng mâo lu blư̆ hruê ngă klei bi mlih hdră djă yua lăn. Akŏ thŭn 2022, Hằng lu blư̆ ngă hră m’ar čan prăk ti knơ̆ng prăk lehanăn ngă hră m’ar lŏ ba jao klei dưi djă yua lăn kơ pô tal tlâo. Ƀuh mâo klei mdê, anôk bruă djŏ tuôm hluê ngă bruă klei ksiêm dlăng hŏng 4 boh klei ti să čư̆ Dăng Ya snăn jih 4 anei hưn amâo duah čhĭ lăn ôh. Hluê si Hoàng Anh Tuệ, ƀuh klei anei srăng hmăi prŏng truh kơ klei tŭ dưi mnuih ƀuôn sang, kyua anăn anôk bruă mâo leh hră m’ar brei anôk bruă sang čư̆ êa dŭm să mđĭ klei đua klam đru kơ mnuih ƀuôn sang djuê ƀiă hluê ngă hră m’ar djŏ tuôm kơ klei lăn ala:

 “Hŏng dŭm să krĭng mnuih djuê ƀiă snăn knuă druh mă bruă brei mđĭ hĭn klei đua klam. Leh hluê ngă dŭm klei tŭ dưi kơ mnuih ƀuôn sang snăn brei răk kơ jih 2 tĭng hmư̆, êmuh čhĭ mơ̆ lăn, bi mlih pô dưi djă yua lăn mơ̆ amâo dah h’aĭ, đa đa êmuh sĭt mơ̆ ih čhĭ lăn kơ pô anei. Mnuih djuê ƀiă amâo thâo săng klei Yuăn snăn iêu knuă druh mnuih djuê ƀiă mblang brei kơ klei anei.

          Nguyễn Văn Nội – Khua anôk bruă sang čư̆ êa să Čư̆ Dăng Ya, kdriêk Čư̆ Pah, brei thâo: Ară anei bruă knŭk kna alŭ wăl lehanăn êpul êya bruă dôk ksiêm dlăng, bi mklă bruă bi mlih pô dưi djă yua lăn ti alŭ wăl hlăm wưng giăm anei, mbĭt anăn bi hgŭm mtô mblang kơ mnuih ƀuôn sang mđĭ klei răng hlăm bruă ngă hră m’ar lăn.

           “Leh hmao ƀuh klei anei, hmei gĭt gai kahan ksiêm lehanăn anôk bruă djŏ tuôm nao truh ti grăp boh sang, grăp boh ƀuôn, mtrŭt mjhar mtô mblang, čiăng kơ grăp gŏ sang, mnuih amâo lĕ hlăm klei mplư̆ msĕ snăn.

        Leh hmư̆ klei hâo hưn, ară anei anôk bruă sang čư̆ êa kdriêk Čư̆ Pah, čar Gia Lai mtă kơ dŭm anôk bruă brei mdei êjai klei ngă hră m’ar lăn čiăng kơ kahan ksiêm kdriêk ktuê ksiêm, bi mklă boh klei anei djŏ tuôm kơ mnuih djuê ana ƀiă ti să Čư̆ Dăng Ya./.

Pô mblang: H’Nêč Êñuôl