Angĭn êbŭ Kalmaegi jing angĭn êbŭ ktang hĭn tlă hlăm čar hlăm dŭm pluh thŭn êgao, ngă truh klei hmăi kjham. Kyua čŏng pô bi mdrơ̆ng mơ̆ng hnưm, mơ̆ng kbưi, čar mbĕ đuê êđăp ênang êbeh 300 êbâô čô, đru dŏng êbeh 200 čô mơ̆ng krĭng huĭ hyưt, bi hrŏ jih hnơ̆ng klei hmăi kơ mnuih.

Leh angĭn êbŭ, hlăm čar mâo êbeh 50.000 boh sang jhat rai, hlăm anăn 1000 boh sang dlưh rai kluôm, 2 čô djiê, 8 čô êka. Kluôm klei hmăi đăo tĭng êbeh 5.200 êklai prăk. Lu anôk bruă mkŏ mkra, boh nik jing Quy Nhơn, anôk bruă duh mkra, bruă hiu čhưn ênguê mơ̆ng čar rai kjham. Khua Bruă sang čư̆ êa čar Gia Lai iêo mthưr bruă kđi čar, knơ̆ng bruă leh anăn mnuih ƀuôn sang bi lar ai tiê čŏng pô, hrăm mbĭt krŭ wĭt bruă mkŏ mkra, đru kơ mnuih ƀuôn sang, amâo mâo lui sa čô kơ tluôn.