Găn 42 thŭn mkŏ mjing, đĭ kyar truh kơ ară anei alŭ mâo 210 gŏ sang hŏng 950 čô mnuih ƀuôn sang, mâo 27 čô đảng viên. Hlăm anăn, hnơ̆ng gŏ sang ƀun ƀin knŏng adôk hlăm brô 6%, hlăm alŭ mâo 3 djuê ana hdĭp mda jing Tày, Bahnar leh anăn Jarai.

Mnuih ƀuôn sang hlăm alŭ hdĭp hŏng bruă lŏ hma, pla mdiê lŏ mâo 146ha, ana hbei ƀlang 180ha, pla ktơr, êtac êbai 6ha, hnư hrui wĭt kah knar grăp čô mâo hlăm brô 41 êklăk prăk sa čô hlăm sa thŭn. Dŭm thŭn êgao, dŭm êpul bruă kđi čar yang ƀuôn leh anăn mnuih ƀuôn sang alŭ Plei Kte Prŏng A mâo klei sa ai leh anăn hluê ngă dŭm klei mtrŭt mjhar, hdră bi ktưn khăp kơ lăn čar ti alŭ wăl, mta kñăm jing klei mtrŭt mjhar “Jih jang mnuih ƀuôn sang bi mguôp mkŏ mkra krĭng ƀuôn sang mrâo, wăl krah mrâo mrang”, bi mlih knhuah mĭn, hdră ngă bruă hlăm mnuih ƀuôn sang jing mnuih djuê ƀiă čiăng ƀrư̆ ƀrư̆ tlaih mơ̆ng klei ƀun ƀin”.