Hlăm klei kƀĭn mtrŭt mđĭ klei duh bi liê thŭn 2026, čar Gia Lai jao klei bi klă hdră êlan duh bi liê leh anăn siñê hră bi hdơr kơ 237 hdră, hŏng ênoh bi liê truh 850.000 êklai prăk (knar hŏng êbeh 33 êklai dolar Mi). Hlăm anăn, 144 hdră mă hdră êlan duh bi liê hŏng ênoh êbeh 230.000 êklai prăk leh anăn 129 hdră siñê hră bi hdơr hŏng êbeh 620.000 êklai prăk. Lu êpul grŭp prŏng sinê dŭm hdră êbâo êklai prăk msĕ si VinEnergo (pui kmlă doh – 210.000 êklai prăk), Êpul grŭp FLC (hiu čhưn ênguê, logistics - 150.000 êklai prăk), Phú Tài ( mnơ̆ng yua mrâo, sang lăn - 26.500 êklai prăk) leh anăn Sun Group (hiu čhưn ênguê, mdei msăn – 20.000 êklai prăk)…Bi ala kơ dŭm knơ̆ng bruă dôk mđĭ kyar lu hdră hnơ̆ng prŏng ti alŭ wăl, Trần Bá Dương, khua êpul gơ̆ng kiă kriê, khua êpul grup Thaco, mâo dŭm klei bi êdah hlăm klei kƀĭn:

          Ti Gia Lai, hlăm 7 thŭn êgao bruă hdră bhiăn kpăk đuôm, leh anăn leh bi mŭt mbĭt čar Gia Lai bruă hdră bhiăn dưi uêñ mĭn ruh mgaih leh anăn mtrŭt mđĭ hŏng klei hur har. Dŭm hdră dưi ngă jăk leh anăn yuôm bhăn hĭn jing klei hrăm mbĭt mơ̆ng bruă knŭk kna dŭm gưl mơ̆ng Gia Lai hlăm wưng êgao hmei ƀuăn srăng ngă pral leh anăn tŭ dưn dŭm hdră, đru mkŏ mjing bruă lŏ hma hơĭt kjăp kơ čar Gia Lai”.

Dŭm ênoh mrô hlăm klei kƀĭn trông jing tur knơ̆ng leh anăn boh kdrŭt brei čar Gia Lai kdlưn hĭn, mâo mtâ kñăm đĭ kyar 2 ênoh mrô mơ̆ng akŏ thŭn 2026. Čiăng bi sĭt dŭm klei ƀuăn, Thái Đại Ngọc, khua bruă Đảng čar Gia Lai gĭt gai dŭm gưl Bruă sang čư̆ êa srăng ngă jăk ruă klam hluê hdră bhiăn 6 klă: klă pô, klă bruă, klă mmông, klă bruă klam, klă boh tŭ dưn leh anăn klă klei dưi, amâo mâo lui dŭm hdră knŏng dôk hlăm hră mơar, ƀuăn mkŏ mjing bruă knŭk kna đru ngă bruă, dlăng klei tŭ jing mơ̆ng knơ̆ng bruă jing klei đĭ kyar mbĭt mơ̆ng čar leh anăn ƀuah mkra ktang dŭm klei ngă bi rŭng phung duh bi liê, mbĭt anăn hmăng hmưi dŭm knơ̆ng bruă amâo djŏ knŏng ngă djŏ hdră kčah, ƀiădah lŏ bi mguôp sui, mpŭ kơ knhuah gru, dhar kreh alŭ wăl leh anăn mđĭ hĭn klei bi mguôp hŏng knơ̆ng bruă hlăm čar čiăng hrăm mbĭt hgŭm êlam hlăm klei mkăp brei tar rŏng lăn. Mơ̆ng dŭm boh tŭ dưn hlăm klei kƀĭn, Khua bruă Đảng čar Gia Lai Thái Đại Ngọc  mñă klă klei gĭt bi sĭt klei ƀuăn duh bi liê jing dŭm hdră êlan klă klơ̆ng, ba wĭt boh tŭ dưn kơ mđĭ kyar bruă duh mkra – ala ƀuôn.

"Gia Lai ƀuăn hrăm mbĭt, mkŏ mjing klei găl ngă jăk hĭn čiăng kơ dŭm knơ̆ng bruă, phung duh liê hơĭt ai tiê ngă bruă, mkă mjing, mnia mblei, hrăm mbĭt đĭ kyar leh anăn tŭ dưn. Hmei hmăng hmưi leh anăn đăo knang čar Gia Lai amâo djŏ knŏng jing anôk truh êđăp ênang, ƀiădah lŏ jing anôk đru kơ dŭm hdră kpưn đĭ, klei mĭn duh bi liê jing klei sĭt, čiăng kơ phung duh bi liê kpưn đĭ jing dŭm knơ̆ng bruă nao êlâo hlăm bruă pô.”

Nao hgŭm leh anăn gĭt gai klei kƀĭn, k’iăng Khua knŭk kna Hồ Quốc Dũng bi myuôm dŭm klei gĭr mơ̆ng čar Gia Lai, boh tŭ dưn hlăm klei kƀĭn brei ƀuh klei đăo knang mơ̆ng êpul êya phung duh bi liê hlăm hdră êlan mđĭ kyar čar. K’iăng Khua knŭk kna mñă kơ čar iêo jak klei duh bi liê mâo hrŏng ruah hluê hdră bhiăn “3 amâo mâo” (amâo mâo mlih hŏng wăl anôk mă klei đĭ kyar, amâo mâo mă hdră yua mnuih amâo mâo thâo/ kdrăp yua đưm, amâo mâo ruah pô duh bi liê amâo mâo klei thâo) leh anăn mđing kơ dŭm hdră êlan FDI ênuk mrâo msĕ si AI, bán dẫn. Mbĭt anăn, k’iăng Khua knŭk kna mñă kơ čar Gia Lai srăng dlăng bruă duh mkra êngao knŭk kna jing boh kdrŭt yuôm bhăn hĭn, mtrŭt mđĭ klei mlih mrâo hră mơar knŭk kna hluê hdră mkŏ mjing, đru ngă bruă čiăng mă klei sa ai mơ̆ng knơ̆ng bruă jing giê mkă leh anăn ƀuăn rơ̆ng hrăm mbĭt, ruh mgaih klei dleh dlan kơ phung duh bi liê:

Hyuă kjăp ai tiê đĭ kyar bruă duh mkra êngao knŭk kna jing sa boh kdrŭt yuôm bhăn hĭn mơ̆ng bruă duh mkra. Mkŏ mjing klei găl čiăng kơ knơ̆ng bruă êngao knŭk kna mđĭ kyar wăt kơ hnơ̆ng prŏng leh anăn hnơ̆ng jăk, mtrŭt mhar mkŏ mjing dŭm knơ̆ng bruă mâo ai bi ktưn, mtrŭt mđĭ klei bi mguôp plah wah knơ̆ng bruă hlămlăn čar hŏng knơ̆ng bruă FDI, ƀrư̆ ƀrư̆ nao hgŭm êlam hlăm klei mkra mjing leh anăn mkăp brei tar rŏng lăn. Drei srăng lač sĭt, ngă sĭt, ngă truh knhal tuč, ngă mâo boh tŭ dưn, čiăng ba čar Gia Lai drei đĭ kyar kdlưn hĭn hlăm wưng kơ anăp.”.

Hŏng klei ƀuăn ktang mơ̆ng bruă knŭk kna mbĭt hŏng klei đăo knang leh anăn hrăm mbĭt mơ̆ng êpul êya knơ̆ng bruă, Klei kƀĭn mtrŭt mđĭ klei duh bi liê thŭn 2026 amâo djŏ knŏng ba wĭt ênoh mrô êdah êdi kơ Gia Lai, ƀiădah lŏ pŏk klei hmăng hmưi kơ sa wưng đĭ kyar mrâo. Mơ̆ng tur knơ̆ng anăn, Gia Lai dôk ƀrư̆ ƀrư̆ bi klă kơhưm ing anôk truh jăk hŏng ênoh duh bi liê, mđing truh mta kñăm đĭ kyar ktang, tŭ dưn leh anăn ñŭ kma êlam hlăm boh tŭ tar rŏng lăn hlăm wưng kơ anăp.