VOV4.Êđê- Hlăm wưng êgao, čar Gia Lai kreh mâo klei djiê mngăt hlăm êa pap êdi, lu jing phung hđeh hriăm hră. Boh klei anei dôk čiăng anôk bruă djŏ tuôm, yang ƀuôn lehanăn gŏ sang mđing hĭn hlăm bruă răng mgang lehanăn dlăng kriê phung hđeh, boh nik hlăm yan mdei prŏng.

Hlăm sa boh sang điêt ti alŭ 2, să Tra Đa, ƀuôn prŏng Pleiku, amai Nguyễn Thị Thanh Hương dôk ti kjhiêk sang dlăng kơ rup anak êkei ñu djiê kyua mngăt êa ti alŭ Tây Hồ, să Bàu Cạn, kdriêk Čư̆ Prông hlăk hruê 14/6 mrâo êgao. Amai Hương lač, mâo klei truh anei kyua gŏ sang ka mâo klei găl brei anak nao hriăm luê êa leh anăn dŭm klei thâo gang mkhư̆ klei mngăt êa.

    “ Mrâo anei gŏ sang brei ĕ wĭt sang aduôn, ti năn mâo wăt anak adei kâo, diñu dua ăt kreh hlăp mbĭt nanao. Hruê 14/6 mrâo êngao, nao čưng boh ƀiădah tač čưng boh amâo mâo mnuih anăn yơh diñu dua nao hlăp ti ênao êa, leh kơnăn tăm têč hnêč lĕ hlăm êa, êa anăn êlam truh kơ 7 met, diñu dua amâo thâo lŏ đĭ ôh. Gŏ sang amâo mâo klei găl leh anăn kăn mâo mmông lei, nao mă bruă nanao amâo lŏ mâo mmông brei diñu nao hriăm luê êa, knŏng brei duah hlăp giăm sang đuč”

            Klei mngăt êa dôk jing phŭn agha tal êlâo ngă truh klei djiê hlăm phung hdeh leh anăn hđeh thŭn êdam ngiêk ti čar Gia Lai, ba kơ gŏ sang klei ênguôt hnĭng amâo mâo dưi mjưh. Kyuanăn, bruă mđĭ kyar hdră mtô bi hriăm klei luê êa leh anăn dŭm klei thâo gang mkhư̆ klei mngăt êa kơ phung hđeh leh anăn yang ƀuôn jing bruă mjêč êdi, čiăng mâo klei nao hgŭm mơ̆ng dŭm gưl bruă, dhar bruă, gŏ sang leh anăn kluôm yang ƀuôn.

Mơ̆ng akŏ mlan 6/2022, knơ̆ng bruă dhar kreh, mjuăt ktang asei mlei leh anăn hiu čhưn ênguê čar Gia Lai bi mguôp hŏng dŭm anôk bruă djŏ tuôm mkŏ mjing knăm Olympic hđeh lăk leh anăn mtrŭt mjhar jih jang mnuih ƀuôn sang hriăm luê êa, gang mkhư̆ klei mngăt êa. Phung hđeh sang hră dưi mkă brei klei hriăm leh anăn mtô kơ dŭm mta bruă msĕ si: klei đru dŏng mnuih mngăt êa, dŭm hdră đru dŏng sĭt mâo klei êka êkeh, đru dŏng sĭt mâo mnơ̆ng uôl hlăm kŏng đŏk, tăp ƀơ̆ng mnơ̆ng ruă… Adei Bạch Thị Mai Uyên, hđeh sang hră adŭ 8, sang hră gưl 2 Nguyễn Du, ƀuôn prŏng Pleiku brei thâo: Dŭm mta bruă ngă hlăm yan mdei prŏng thŭn anei jing jăk êdi. Hlăm anăn, luê êa jing mta hriăm adei srăng gĭr hriăm jăk hĭn:

“Hmei mâo phung nai mdah brei dlăng dŭm mta bruă kreh mâo hlăm bruă gang mkhư̆ klei mngăt êa, mơ̆ng anăn adei dưi mâo klei hriăm, klei thâo kơ pô, tơdah tuôm hŏng dŭm klei msĕ sơnăn adei thâo hdră mdrơ̆ng leh anăn đru kơ grăp čô ăt msĕ hŏng kâo pô. Hlăm yan mdei prŏng anei, adei srăng ruah klei hriăm luê êa jing mta hriăm čiăng mđĭ hĭn ai ktang asei pô, mbĭt anăn gang mkhư̆ klei mngăt êa tơdah mâo klei truh”.

Trần Ngọc Nhung – Khua kiă kriê knơ̆ng bruă dhar kreh, mjuăt asei mlei leh anăn hiu čhưn ênguê čar Gia Lai brei thâo, čar dôk mâo hdră mtrŭt mđĭ bruă jih jang mnuih ƀuôn sang hriăm luê êa, gang mkhư̆ klei mngăt êa. Mta kñăm truh ti thŭn 2025, srăng mâo 50% hđeh mơ̆ng 6 – 16 thŭn thâo luê êa, rơ̆ng klei êđăp ênang hlăm wăl êa.

    “ Hdră jih jang mnuih ƀuôn sang hriăm luê êa, boh nik jing hŏng phung hđeh jing sa mta bruă yuôm bhăn êdi. Klei mngăt êa hlăm phung hđeh ti hruê mmông êgao hlăm kluôm ala leh anăn wăt čar Gia Lai jing kjham êdi. Jih jang mnuih ƀuôn sang, dŭm êpul bruă kđi čar yang ƀuôn, dŭm alŭ wăl leh anăn čar Gia Lai srăng mđĭ hĭn klei thâo săng, bruă klam pô hŏng bruă mtô mjuăt klei luê êa kơ phung hđeh leh anăn jih jang mnuih ƀuôn sang čiăng bi hrŏ jih hnơ̆ng klei mngăt êa hlăm mnuih ƀuôn sang ăt msĕ hŏng phung hđeh.”

Lu sang hră ti Gia Lai mkŏ mjing bi hriăm luê kơ hđeh sang hră

Mơ̆ng akŏ thŭn truh kơ ară anei, kluôm čar Gia Lai mâo leh 17 klei mngăt êa ngă kơ 23 čô hđeh djiê. Boh nik mơ̆ng wưng yan mdei prŏng truh kơ ară anei mâo nao dơ̆ng 5 klei mngăt êa ngă kơ 7 čô hđeh djiê. Lu hlăm anăn kyua hđeh kƀah kleui thâo luê êa, klei thâo rơ̆ng klei êđăp ênang, gang mkhư̆ klei mngăt êa leh anăn čŏng duah nao hlăm dŭm anôk mâo êa krông, hnoh êa, dŭm ƀăng êa êlam hlăp lêñ ƀiădah amâo mâo mnuih prŏng ktuê dlăng.

Čiăng hrăm mbĭt gang mkhư̆ klei mngăt êa hlăm phung hđeh, srăng mâo klei hrăm mbĭt mơ̆ng kluôm yang ƀuôn, grăp gŏ sang čiăng uêñ mĭn hĭn hlăm bruă răng mgang leh anăn kriê dlăng hđeh, boh nik hlăm wưng yan mdei prŏng kñăm dêč kơ dŭm klei truh amâo mâo năng mâo hŏng phung hđeh, boh nik jing klei mngăt êa. Võ Như Minh Quang – khua adŭ bruă răng mgang, kriê dlăng hđeh leh anăn klei mtăp mdơr êkei mniê – knơ̆ng bruă mnuih mă bruă leh anăn knap mñai čar Gia Lai brei thâo:

    “Djŏ sĭt bruă mtô mjuăt dŭm mta klei thâo hlăm klei hdĭp, dŭm klei hriăm kơ phung hđeh dôk mâo lu klei dleh kpăk, bruă ba klei hriăm luê êa hlăm dŭm sang hră ăt ka mâo ôh boh tŭ dưn, kyuanăn klei mngăt êa ăt dôk mâo nanao. Srăng gĭr ktưn si srăng ngă čiăng ngă bruă hâo hưn truh kơ grăp gŏ sang, kluôm yang ƀuôn mđĭ hĭn klei thâo săng hlăm bruă gang mkhư̆ klei kpĕ êka, klei mngăt êa hlăm phung hđeh. Dŭm knơ̆ng kdơ̆ng êa, ênao êa, hnoh êa, krông êa mâo klei huĭ hyưt ngă truh djiê mnuih srăng kpơ̆ng mdhă hưn brei răng. Hlăm klei dưi srăng ba hđeh nao hlăm dŭm prŏng hriăm luê êa brei diñu hlăp lêñ, hrăm luê êa čiăng mâo klei thâo răng mgang kơ pô”.

            Hŏng klei gĭr ktưn mơ̆ng Dhar bruă djŏ tuôm, mtrŭt mđĭ bruă hâo hưn, mđĭ hĭn bruă mtô luê êa leh anăn dŭm klei hriăm srăng đru mguôp yuôm bhăn hlăm bruă gang mkhư̆ klei mngăt êa hlăm phung hđeh. Êngao kơ năn, čiăng mâo êdi klei uêñ mĭn, kriê dlăng mơ̆ng phung amĭ ama, čiăng dêč kơ dŭm klei mngăt êa.

Pô mblang: Y-Ƀel Êban