VOV4.Êđê - Nguyễn Văn Độ, Khua bruă sang čư êa să Ia Me, kdriêk Čư̆ Prông, čar Gia Lai brei thâo, hlăk tlam mmăt hruê 25/8, anôk bruă mâo leh klei nao čuă, bi juh, mđĭ ai leh anăn đru kơ gŏ sang 2 čô djiê kyua grăm đah. Êlâo kơnăn, aguah hruê 25/8, sa êpul mâo 4 čô hđeh êdam ti ƀuôn Som, să Ia Me mâo: Kpă Tuyên (k’kiêng thŭn 1985), Siu Béo (k’kiêng thŭn 1992), Rơ Mah Đuôm (k’kiêng thŭn 1983), Rơ Mah Hoang (k’kiêng thŭn 1998) nao mă bruă hma ti alŭ wăl hnoh êa ƀuôn Đê Sơ, să Ia Me.

Truh kơ hlăm brô 2 mmông krah tlam hlăm hruê, adiê hjan prŏng, kyuanăn 4 čô nao kđup hjan hlăm pưk. Mmông anăn, mâo grăp đah ti pưk diñu dôk ngă kơ ayŏng Kpă Tuyên leh anăn Siu Béo djiê, Đuôm leh anăn Hoang myun hĕ amâo mâo êka ôh. Leh hmư̆ klei hưn, êpul êya ngă bruă nao truh ti anôk anăn mă asei 2 čô wĭt dơr djiê leh anăn mâo hdră đru. Dưi thâo, gŏ sang 2 čô anei mâo klei hdĭp dleh dlan êdi.

Y-Khem pô mblang