VOV4.Êđê- Aguah hruê 1/4, Klei bi kƀĭn tal 22 pla wah Êpul kahan krĭng 5 (Lĭng kahan yang ƀuôn Việt Nam) lehanăn Kahan krĭng 1 (Lĭng kahan ala mtao Campuchia) mkŏ mjing leh ti Ƀăng jang knông lăn Lệ Thanh (kdriêk Đức Cơ, Gia Lai). Ti anôk bi kƀĭn, Knơ̆ng gĭt gai lĭng kahan krĭng 5 (Lĭng kahan yang ƀuôn Việt Nam) lehanăn Knơ̆ng gĭt gai lĭng kahan krĭng 1 (Lĭng kahan ala mtao Campuchia) bi trông lehanăn bi tŭ ư kơ dŭm mta klei, hdră hgŭm bruă hlăm thŭn 2022.

Hlue anăn, dua tĭng tŭ ư mđĭ hĭn hdră mjuăt bi hriăm, mtô mblang kơ phung knuă druh, lĭng kahan lehanăn mnuih ƀuôn sang dua ala čar, boh nik phung mda asei thâo săng êlam hĭn kơ klei hgŭm mguôp plah wah dua ala čar, lŏ dơ̆ng rơ̆ng kjăp klei êđăp ênang bruă kđi čar, klei êđăp ênang ala ƀuôn ti krĭng knông lăn, gang mkhư̆ klei tlĕ mŭt – kbiă krĭng knông lăn; bi kdơ̆ng hŏng phung ngă soh hluh knông lăn./.

                                                    Pô mblang: H’Nêč Êñuôl