VOV4.Êđê - Ti anăp klei êa săng êa pui đĭ ênoh nanao, ênoh dŭ mdiăng mơ̆ng lu anôk bruă duh mkra ti Gia Lai hlăk dưi mkra mđĭ čiăng djŏ guôp hŏng boh klei mbĭt.

Châu Văn Liên, ti alŭ 2, ƀuôn hgŭm Hôị Phú, ƀuôn prŏng Pleiku blei sa pŏk hră đĭ êdeh mơ̆ng sang êdeh Thuận Tiến mơ̆ng Pleiku nao ti ƀuôn prŏng Hồ Chí Minh hŏng ênoh 350.000 êbâo prăk. Châu Văn Liên brei thâo, mkă hŏng ênoh ñu đĭ êdeh hlăk 4 mlan êlâo, ênoh hră đĭ êdeh ară anei lŏ đĭ leh 50 êbâo prăk. Ênoh hră đĭ êdeh đĭ ngă hmăi truh kơ boh tŭ phung tuê đĭ êdeh, ƀiădah grăp čô mâo sơăi klei bi săng kyua ênoh êa săng, êa pui đĭ ktang ngă kơ dŭm knơ̆ng bruă dŭ mdiăng mâo lu klei kpĭ. Châu Văn Liên lŏ brei thâo: “Êlâo đĭ kâo nao, êa săng knŏng êbeh 20 êbâo hlăm sa lit, ară anei êa săng knŭk kna truh leh giăm 34 êbâo. Knơ̆ng bruă arăng mnia mblei srăng mâo prăk mnga kơh. Mrâo anei wưng klei ruă tưp knơ̆ng bruă dŭ mdiăng ăt dleh dlan mơai. Hluê si ênoh êa săng knơ̆ng bruă mđĭ ênoh, kâo ƀuh ăt dưi mơh.”

Lač kơ bruă mđĭ ênoh hră đĭ êdeh, Nguyễn Hồng Hải, khua kiă kriê knơ̆ng bruă dŭ mdiăng Hồng Hải brei thâo: Leh sa wưng mdei ngă bruă kyua klei ruă tưp Covid-19, knơ̆ng bruă ăt čiăng rơ̆ng ênoh hră đĭ êdeh čiăng mâo lu phung tuê. Ƀiădah leh dưi ksiêm dlăng klei ruă tưp, ênoh êa săng, êa pui lŏ đĭ ktang ngă kơ ênoh prăk duh bi liê kơ grăp wưng mdiăng ăt đĭ ktang mơh, kyuanăn yơh mđĭ hĕ ênoh prăk hră đĭ êdeh.  “Mơ̆ng anôk anei nao truh ti ƀuôn prŏng Hồ Chí Minh jih 400 lit êa pui, êlâo dih hmei mă 300 êbâo hlăm sa pŏk hră đĭ êdeh, ƀiădah ară anei êa pui truh kơ 31 êbâo, đĭ găm 2 blư̆, hră đĭ êdeh knŏng mđĭ mđĭ mă 50 êbâo hlăm sa pŏk kyua klei dleh dlan mbĭt hlăm yang ƀuôn. 400 lĭt êa pui hlăm grăp dưi nao leh anăn wĭt truh kơ 12 êklăk prăk, lŏ mâo prăl êlan BOT, prăk mlan phung mgăt êdeh, prăk jưh mdei, ară anei

Ăt djŏ tuôm hŏng bruă mđĭ ênoh hră đĭ êdeh, aduôn Trần Thị Ánh, k’iăng khua kiă kriê knơ̆ng bruă dŭ mdiăng Mai Linh Gia Lai brei thâo: Bruă mđĭ ênoh hră êdĭ êdeh jing klei amâo dưi dêč ôh hŏng dŭm knơ̆ng bruă dŭ mdiăng kyua ênoh êa săng, êa pui đĭ ktang. Ƀiădah anôk bruă ăt mđĭ hlăm ênoh djŏ guôp, rơ̆ng bi kna boh tŭ kơ phung tuê leh anăn knơ̆ng bruă. “Ti anăp ênoh êa săng êa pui đĭ ktang sơnăn ngă kơ knơ̆ng bruă mđĭ ênoh prăk hră đĭ êdeh čiăng bi djŏ guôp hŏng boh sĭt. Anôk bruă mđĭ ênoh prăk hră đĭ êdeh mrâo hĭn ti hruê 20/6, đĭ kah knar 16% mkă hŏng êlâo dih. Wưng êdei klei ruă tưp jing dleh dlan êdi, msĕ si ênoh êa săng, êa pui đĭ ktang msĕ ară anei ngă kơ knơ̆ng bruă knŏng mâo êlan mđĭ ênoh prăk hră đĭ êdeh, mđĭ ênoh ăt ngă lu klei dleh kpăk, ƀiădah tơdah čiăng hdĭp srăng mđĭ hluê hnơ̆ng anăn yơh”

Mơ̆ng akŏ thŭn truh kơ ară anei, ênoh êa săng, êa pui hlăm ala čar mâo leh 12 blư̆ đĭ, 3 blư̆ trŭn leh anăn dôk ti ênoh kdlưn hĭn ka tuôm mâo mơ̆ng êlâo truh kơ ară anei. Čiăng rơ̆ng klei ngă bruă, 25 knơ̆ng bruă dŭ mdiăng leh anăn knơ̆ng bruă taxi ti alŭ wăl čar Gia Lai mđĭ leh sơăi ênoh mdiăng tuê đĭ êdeh, ênoh pŏk ƀăng. Hnơ̆ng ênoh prăk hră đĭ êdeh mơ̆ng dŭm knơ̆ng bruă anei đĭ kah knar jing 15%.

Hluê si knơ̆ng bruă êlan klông leh anăn dŭ mdiăng čar Gia Lai: anôk bruă mâo leh hră hưn mdah bruă mđĭ ênoh prăk hră đĭ êdeh mơ̆ng lu knơ̆ng bruă dŭ mdiăng tuê ti alŭ wăl čar. Leh tŭ mă, knơ̆ng bruă mtă leh kơ dŭm anôk bruă ngă bruă bi klă ênoh leh anăn mă djŏ hŏng ênoh ba mdah leh, bruă mđĭ ênoh hră đĭ êdeh srăng djŏ hŏng hnơ̆ng ênoh êa săng, êa pui… Nguyễn Bá Minh, k’iăng khua kiă kriê alŭ bruă hdră êlan – ngăn prăk – dŭ mdiăng – knơ̆ng bruă êlan klông leh anăn dŭ mdiăng čar Gia Lai brei thâo: “Leh tŭ mă dŭm hră mơar hưn mdah mđĭ ênoh, knơ̆ng bruă mtă leh kơ dŭm anôk bruă ngă bruă bi klă ênoh leh anăn mă djŏ hŏng ênoh ba mdah hluê si hdră bhiăn... mbĭt anăn gĭt gai kơ dŭm kdrŭn êdeh, êpul êya ngă bruă ksiêm dlăng bruă anei čiăng rơ̆ng djŏ hŏng klei bhiăn ala čar.”