VOV4.Êđê - Ti čar Gia Lai, bruă mtô mjuăt phung hđeh điêt, boh nik jing krĭng mnuih djuê ƀiă tuôm hŏng lu klei dleh dlan kyua phung amĭ ama ka thâo săng klă ôh klei yuôm bhăn bruă mtô bi hriăm klei yuăn êlâo kơ brei anak nao sang hră gưl 1. Hlăm lu thŭn hŏng anei, dưi tiŏ nao mtô ti sang hră ti ƀuôn Ia Tông, să Ia Der, kyua mâo klei thâo hlăm bruă hâo hưn, nai Ksor H’Nhiêm ti sang hră hđeh điêt 30/4, kdriêk Ia Grai dưi iêo mthưr leh 100% hđeh điêt nao sang hră mơar, mbĭt anăn dưi mkŏ mjing adŭ mtô bi hriăm ti ƀuôn ƀun ƀin.

Wăt tơdah suăi êmăn hŏng bruă pưk hma, ƀiădah grăp mmăt, ung mô̆ amai Rơ Čhăm (kkiêng thŭn 1993, ƀuôn Ia Tông, să Ia Der, Ia Grai) bi kmlah mbĭt hŏng anak mniê Rčăm H’Nanh (adŭ điêt 4 thŭn) hriăm klei hriăm mơ̆ng nai mtô Ksor H’Nhiêm mơĭt. Leh dlăng dŭm blŭ klei hriăm mŏng nai H’Nhiêm, amĭ H’Lai lŏ mdar video hluê si klei mtô, lŏ mơĭt wĭt kơ nai dlăng. Mơ̆ng mlan 9/2021 truh ară anei, kyua klei ruă Covid-19, anăn ĕ H’Nanh leh anăn 37 čô găp mkăn hriăm adŭ hđeh điêt bi mguôp, ti sang hră ƀuôn Ia Tông, să Ia Dêr, kdrêk Ia Grai ăt hriăm 5 klei hriăm grăp hruê kăm. Wăt tơdah amâo dưi bi tuôm tlă anăp ôh hŏng nai, ƀiădah mơ̆ng hdră hriăm anei, H’Nanh leh anăn phung găp ăt dưi bi blŭ hrăm nanao leh anăn mâo nai H’Nhiêm ksiêm dlăng, păn kjăp boh klei. Jing amĭ ama, amai H’Lai ƀuh ư ai kyua mơ̆ng akŏ thŭn hriăm anăp anei, ĕ hriăm leh lu klei mmuñ, klei kdŏ mrâo leh anăn čang hmăng dŭm klei nai mtô hlăm grăp mmăt: Kâo hơĭt ai tiê snăk kyua mâo nai bi hriăm, mđing dlăng, kâo nao mă bruă ăt hơĭt ai tiê mơh. Anak kâo snăn thâo răk, thâo mmuiñ, thâo săng hĭn lu”,

Amai Rơ Châm H'Yúi- Khua êpul hgŭm phung amĭ ama ti sang hră ƀuôn Ia Tông, să Ia Dêr, kdriêk Ia Drai brei thâo, sui hŏng anei 3 thŭn êlâo, anôk sang hră knŏng mâo sa boh sang prŏng hlăm brô 50 met 2 jhat rai leh. Mta phŭn jing phung amĭ ama hlăm ƀuôn lač, hđeh mơ̆ng 3 truh 5 thŭn ka nao sang hră ôh, anăn nao hriăm sang hră hđeh điêt jing knŏng nao hlăp. Mơ̆ng thŭn hriăm 2018-2029 truh ară anei, nai mtô H’Nhiêm kriê dlăng, mơ̆ng dŭm klei bi kƀĭn phung amĭ ama, bi kƀĭn ƀuôn, nai H’Nhiêm mblang hŏng klei Jrai đru phung amĭ ama thâo săng hĭn phung hđeh điêt nao sang hră amâo djŏ knŏng hlăp lêñ ôh, ƀiădah lŏ dưi hriăm mjuăt lu klei thâo kriê dlăng asei pô, hriăm blŭ klei Yuăn leh anăn hriăm boh hră êlâo kơ nao sang hră gưl sa. Klei anei đru phung hđeh mnuih Jrai jhŏng, ngă bruă jăk hĭn. Leh thâo săng, phung amĭ ama amâo djŏ knŏng brei anak nao sang hră ôh, ƀiădah lŏ iêo jak bi blei ƀrĭk, đru rŭ mdơ̆ng ƀăng jang, tuh ƀê tong, mdơ̆ng trưng gang mđiă čiăng bi êđăp mjing tač hlăp kơ phung anak čô. Amai Rơ Čăm H’Yúi brei thâo: “Êlâo dih sang hră ka siam msĕ snei ôh, ară anei phung nai bi msiam leh, mâo djăp ênŭm mnơ̆ng hriăm hră, phung anak ăt khăp mơh. Êlâo dih ka mâo ôh tač hlăp snei, tač lăn, hđeh hlăp ti êngao čhŏ snăk. Ƀiădah mơ̆ng leh nai Nhiêm nao ti ƀuôn Ia Tong snăn adŭ hriăm tač hlăp siam, doh phung hđeh hlăp amâo čhŏ ôh. Hmei mơak snăk leh anăn bi mni lač jăk kơ nai Nhiêm kyua mtô leh kơ anak kâo hŏng phung hđeh sang hră tinei”.

Aduôn Đỗ Thị Nga- Khua sang hră gưl hđeh 30/4, să Ia Dêr, kdriêk Ia Grai brei thâo, mơ̆ng thŭn 2018 kơ êlâo, ti sang hră Ia Tông knŏng mâo ti gŭ 10 hđeh mơ̆ng 3 truh 5 thŭn nao sang hră. Ƀiădah mơ̆ng thŭn hriăm 2019-2020 truh ară anei, adŭ hriăm mâo djăp 38 čô hđeh hlăm gưl hđeh nao samg hră. Bruă ngă anei lu jing kyua nai mtô Ksor H’Nhiêm.

Êngao kơ bruă čung ba, hâo hưn, nai H’Nhiêm lŏ dưi mâo nai mtô gưl kdriêk, gưl čar hlăm lu thŭn hriăm. Klei năng mpŭ, nai H’Nhiêm lŏ mđing mtô blŭ hrăm hŏng klei Yuăn, ƀiădah hlăm klei hlăp lêñ ñu mđing bi mguôp, hưn thâo kơ hđeh klei jăk siam dhar kreh djuê ana mnuih Jrai, si tôhmô čing čhar, kdrăp tong ayŭ, kdrăp čŭt hơô. “Boh nik, nai H’Nhiêm khăp snăk kơ hđeh sang hră, êdu êun, grăp mnĭt mmông êmhač tlao hŏng phung hđeh. Hlăm dŭm thŭn êgao, ñu jing nai mtô phŭn ti sang hră, mâo nai mtô gưl čar, gưl kdriêk, jing gru hmô êda kdlưn kơ knhuah hdĭp leh anăn gĭr ktưn hlăm klei thâo. Mơ̆ng thŭn nai H’Nhiêm wĭt ngă bruă, hnơ̆ng jăk hriăm klei Yuăn dưi mđĭ, hnơ̆ng đĭ adŭ 1 ti sang hră gưl 1 dưi tŭ yap.”

Nai Ksor H’Nhiêm yăl dliê, kâo pô mâo sa klei čang hmăng jing phung amaĭ ama hđeh Jrai ƀrư̆ hruê mđing hĭn kơ bruă anak čô pô hriăm hră, đru kơ anak čô pô ƀrư̆ mâo klei hdĭp jăk hĭn mơ̆ng bruă hriăm hră: “Kâo ƀuh tinei dleh dlan snăk, mâo ƀiă hđeh nao sang hră. Ƀuh snăn kâo ênguôt snăk, kâo čang hmăng anak čô mnuih djuê ƀiă nao sang hră, thâo boh hră, thâo blŭ klei Yuăn. Mâo phung amĭ ama amâo brei ôh anak nao sang hră kyua gŏ sang dleh dlan, anăn kâo nao iêô jak, đru phung hđeh nao sang hră, čiăng kơ phung hđeh hriăm thâo, thâo săng lu hĭn”

Dŭm klei nai mtô hđeh Ksor H’Nhiêm gĭr amâo mdei amâo djŏ knŏng mâo phung amĭ ama leh anăn hđeh sang hră ti sang hră hđeh điêt ƀuôn Ia Tông, să Ia Der, kdriêk Ia Grai tŭ yap ôh, ƀiădah mrâo êgao, bruă sang hră čar Gia Lai ăt mtă kơ Phŭn bruă sang hră mtô bi hriăm mđup brei anăn knăl Nai mtô êdah kdlưn thŭn hriăm 2020-2021./.