Hluê si klei hưn mdah hlăm klei kƀĭn trông Êpul khua bruă Đảng čar Gia Lai, gưl 12 (pŏk mlar), klei đĭ kyar bruă duh mkra ti čar Gia Lai 6 mlan êgao mâo 5,54% mkă hŏng wưng anei thŭn 2022. Dŭm hnơ̆ng čuăn hnư knŭk kna hrui wĭt mâo 48,7%, mkra mjing bruă tuh tia mâo 44,6%, ênoh knơ̆ng bruă bi klă lŏ wĭt ngă bruă leh anăn ênoh klei duh bi liê lŏ dơ̆ng đĭ, bruă hiu čhưn ênguê lŏ dơ̆ng đĭ kyar jăk.

Ƀiădah, hlăm lu alŭ wăl ti čar Gia Lai ăt dôk tuôm hŏng klei dleh dlan hlăm bruă hrui mă prăk yua lăn ngă truh kơ ênoh prăk kơ dŭm hdră duh bi liê, dleh hluê ngă bruă pla dliê kyua dŭm hdră ară anei ka mâo ôh klei mtrŭt mjhar, êmưt mâo dŭm hdră êlan ba yua lăn, bruă hluê ngă dŭm hdră ala čar kñăm dôk êmưt, msĕ si hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă leh anăn krĭng čư̆ čhiăng.

Knŏng hlăm klei duh bi liê bruă knŭk kna, truh ti jih mlan 6/2023, čar mrâo brei čan giăm 600 êklai prăk hlăm ênoh 4.178 êklai prăk duh bi liê bruă knŭk kna hlăm thŭn, mâo 13,85% hdră kčah. Anei jing bruă mơ̆ng bruă sang čư êa čar Gia Lai leh anăn dŭm knơ̆ng, dhar bruă hlăm čar kñăm hluê ngă tal êlâo hlăm wưng kơ anăp. Bruă sang čư êa čar Gia Lai ăt mkŏ mjing leh 3 êpul ngă bruă ksiêm dlăng, mtrŭt mjhar, mgaih msir dŭm boh klei bluh mâo. Đinh Hữu Hoà- k’iăng khua kiă kriê Knơ̆ng bruă hdră êlan leh anăn duh bi liê čar Gia Lai brei thâo:

“Dŭm knơ̆ng, dhar bruă nao hgŭm bi klă, bi klă hră kač kơ bruă mkŏ mkra, gĭr bi hrŏ mmông bi klă čiăng hưn mdah hdră mkăp, leh anăn rơ̆ng kơ hdră anăn. Tal 5 jing knơ̆ng bruă ngăn dŏ leh anăn wăl hdĭp mda ăt srăng hưn mdah hŏng bruă sang čư êa čar ruh mgaih klei dleh kpăk lăn yua đru kơ hdră ngă bruă. Bi hŏng dŭm êpul ngă bruă ăt srăng mtrŭt mđĭ hmar bruă ksiêm dlăng, bi mguôp hŏng dŭm alŭ wăl hưn mdah hŏng dŭm anôk bruă mâo klei dưi mgaih msir čiăng bi hmar klei mă bruă”.

Ăt hlăm hruê kăm, Êpul gơ̆ng bruă ƀuôn sang čar Kon Tum mkŏ mjing klei kƀĭn tal 5 kñăm bi trông, bi klă boh sĭt bruă duh mkra ala ƀuôn 6 mlan akŏ thŭn, bi klă hdră tă, bruă klam kñăm hlăm 6 mlan knhal jih thŭn 2023 leh anăn bi klă dŭm mta phŭn dôk hlăm klei dưi. Hluê anăn, 6 mlan akŏ thŭn klei đĭ kyar kluôm mnơ̆ng dhơ̆ng hlăm čar mâo 6,8% mkă hŏng wưng anei thŭn dih, dôk tal 22/63 čar, ƀuôn prŏng hlăm kluôm ala leh anăn lu hĭn ti krĭng Lăn Dăp Kngư. Hlăm anăn bruă tuh tia leh anăn bruă mkŏ mkra đĭ 10,88%, bruă lŏ hma, mnơ̆ng hlăm dliê, kan hdang đĭ 5,65, bruă mkăn đĭ 5,31%.

Khădah čar Kon Tum mâo hnơ̆ng đĭ kyar hĭn ti krĭng Lăn Dăp Kngư, ƀiădah ăt dôk ƀiă hĭn mkă hĭn mkă hŏng mta kñăm đĭ 10% mơ̆ng čar bi êdah leh hlăm thŭn anei. Êngao kơnăn, 6 mlan akŏ thŭn hnư knŭk kna hrui wĭt mâo giăm 1.840 êklai prăk, knŏng mâo mă giăm 41% hdră kčah, bruă ruh mghaih anôk ala kơ dŭm hdră ngă bruă, bruă mkŏ mkra ăt dôk tuôm hŏng klei dleh dlan…

Blŭ pŏk klei kƀĭn, Dương Văn Trang, khua hlăm bruă Đảng gưl dlông, khua bruă Đảng čar, khua kiă kriê Êpul gơ̆ng bruă ƀuôn sang čar Kon Tum lač, čiăng mâo dŭm hdră êlan ktang phĭt hĭn hlăm bruă mkra mlih, mgaih msir dŭm klei êdu kƀah, awăt êdu, boh nik hlăm bruă ƀuah mkra, ka djŏ hdră bhiăn, ñĕ đuê, mplĕ kơ pô mkăn, huĭ đua klam mơ̆ng đa đa phung knuă druh, phung mă bruă knŭk kna hlăm klei ngă bruă… čiăng đru bi leh dŭm mta kñăm, hnơ̆ng čuăng mđĭ kyar bruă duh mkra ala ƀuôn thŭn 2023:

“Phung bi ala Êpul gơ̆ng bruă ƀuôn sang čar kñăm hlăk mblang klă klơ̆ng, bi klă djŏ boh sĭt kơ dŭm boh tŭ dưn dưi mâo leh, dŭm klei dleh dlan, kpăk gun hlăm bruă hluê ngă dŭm klei čuăn mđĭ kyar bruă duh mkra ala ƀuôn leh anăn ai dưi bi leh dŭm mta kñăm đĭ kyar hlăm thŭn 2023, boh nik jing iêo jak klei duh bi liê, klei brei čan duh bi liê bruă knŭk kna leh anăn hluê ngă dŭm hdră ala čar kñăm. Bi klă phŭn agha hlăm bruă ba mdah dŭm hră mtrŭn bi klă dŭm hdră êlan mơ̆ng gưl dlông leh anăn bruă mkŏ mjing, hluê ngă ti dŭm gưl bruă, dhar bruă”.

Ăt hlăm gưl kƀĭn tal 5, Êpul gơ̆ng bruă ƀuôn sang čar Kon Tum gưl 12, wưng thŭn 2021 – 2026 mâo leh klei ksiêm dlăng, bi klă hŏng 32 mta phŭn bruă sang čư êa čar hưn mdah hlăm klei kƀĭn, hlăm anăn mâo đa đa hdră êlan yuôm bhăn msĕ si: hnơ̆ng đru hluê ngă bruă dăp anôk dôk kơ mnuih ƀuôn sang krĭng yan adiê ngă, krĭng dleh dlan, knông lăn, phung đuê̆ dôk êngiê, dliê knŭk kna mkuôm ti alŭ wăl čar, mkăp brei ngăn prăk đru mđĭ kyar êpul hgŭm bruă, mkra mlih hdră êlan hluê ngă dŭm hdră ala čar kñăm thŭn 2022, 2023 leh anăn mĭn tĭng hdră êlan duh bi liê bruă knŭk kna thŭn 2024.