Hluê ngă “Hdră bruă Quang Trung” mâo Khua knŭk kna mtrŭt mjhar, mơ̆ng hruê 1/12, dŭm êpul kahan ti alŭ wăl čar Gia Lai mđrăm mbĭt pŏk hdră đru mdơ̆ng 100 boh sang kơ dŭm gŏ sang dlưh pưk sang hlăm gưl adiê hjan êa lip leh êgao.

Hlăm hdră anei, Quân đoàn 34 srăng rŭ mdơ̆ng 70 boh sang, Knơ̆ng gĭt gai lĭng kahan čar Gia Lai mdơ̆ng 30 boh sang adôk. Dŭm êpul bi hgŭm kjăp hŏng bruă knŭk kna alŭ wăl ksiêm dlăng mnuih dưi dưn hdră anei, mprăp eneŭm mnơ̆ng, mnuih mă bruă, anôk dôk lehanăn kdrăp mnơ̆ng kơ êpul mă bruă. Dŭm êpul êya gĭr ngă leh, ba jao jih 100 boh sang êlâo kơ hruê 31/1/2026, đru kơ mnuih ƀuôn sang dưi drông Têt djuê ana hlăm dŭm boh sang mrâo, hơĭt kjăp.

Hrue mbrue 1/12, Khua knơ̆ng bruă sang čư̆ êa čar Lâm Đồng Hồ Văn Mười kiă kriê leh klei bi kƀĭn online hŏng dŭm alŭ wăl, bi pral lŏ rŭ mdơ̆ng pưk sang dôk kơ mnuih ƀuôn sang tuôm hŏng klei jhat rai kyua êa ngă hlăm gưl êa lip leh êgao. Kluôm čar mâo truh 76 boh sang klưh jih ƀhut, lehanăn 749 boh sang jhat rai, hlăm anăn ƀuôn hgŭm D’ran jing alŭ wăl mâo klei luič liê kjham hĭn mâo truh 46 boh sang jhat rai, 17 boh sang klưh, lehanăn 6 gŏ sang djiêu hnoh krông Đa Nhim mbĕ đuĕ kơ anôk mkăn, dôk hlăm ênoh mkŏ mkra anôk dôk mrâo. Čar bi tŭ ư leh bi liê 120 êklăk prăk hŏng grăp boh sang klưh, lehanăn 20–40 êklăk prăk kơ dŭm boh sang lŏ mkra wĭt, lehanăn mtă kơ djăp alŭ wăl ba yua prăk knŭk kna bi liê anei bi djŏ, lehanăn pral mkăp anôk dôk mrâo kơ dŭm gŏ sang amâo lŏ mâo anôk dôk, rơ̆ng bruă mkra wĭt pưk sang bi leh êlâo kơ   Tết Nguyên đán 2026.