Ară anei, ti 7 să mơ̆ng 3 kdriêk knông lăn čar Gia Lai mkŏ mjing leh alŭ wăl răng mgang kjăp ti 49 alŭ ƀuôn, hŏng ênoh mnuih ƀuôn sang knông lăn êbeh 11.700 gŏ. Tinei, Bruă Đảng čar, bruă sang čư êa čar Gia Lai gĭt gai leh dŭm knơ̆ng bruă, dhar bruă, bruă sang čư êa alŭ wăl hrăm mbĭt bi mguôp hŏng êpul lĭng kahan răng mgang knông lăn ngă klei mjĕ mjing, đru kơ dŭm alŭ ƀuon hluê ngă lu hdră msĕ si “Sang mđao knông lăn”, sang dôk kơ mnuih ƀuôn sang krĭng knông lăn, plao ksĭ, êmô mjeh kơ phung ƀun ƀin, Hrăm mbĭt hŏng phung mniê krĭng knông lăn… Knuă druh, lĭng kahan knông păn kah prăk mlan, hŏng ênoh jih jang dŭm êtuh êklăk prăk grăp thŭn čiăng hluê ngă klei bi hmô “Atăt adei nao sang hră – anak rông kđông kahan knông lăn”. Hluê anăn, đru rông ba 52 čô hđeh sang hră knông lăn, hđeh mâo klei hdĭp dleh dlan dưi nao sang hră mơ̆ng adŭ 1 truh kơ adŭ 12, mtô boh hră kơ phung hđeh krĭng taih kbưi. Khua mduôn Ksor H'Lâm, ti să knông lăn Ia Mơr, kdriêk Čư̆ Prông brei thâo:

          “Bi hŏng mnuih ƀuôn sang knông lăn msĕ si să hmei, knông lăn jing sang leh. Grăp bruă điêt msĕ si ngă sang, jah ênă, mkŏ wĭt kdrăn lŏ, lĭng kahan knông lăn mâo klei đru, tơdah mâo klei amâothâo bi djŏ ăt knang kơ lĭng kahan knông lăn hriê mgrăng brei, êngoh duam, ruă asei mlei ăt knang kơ lĭng kahan knông lăn”.

Mbĭt hŏng anăn, êpul lĭng kahan knông lăn ăt mbĭt  hŏng bruă sang čư êa alŭ bi mguôp hluê ngă jăk dŭm hdră đru kơ mnuih ƀuôn sang mđĭ kyar bruă duh mkra, lăm lui klei ư êpa, bi hrŏ ƀun, bi mlih knhuah mĭn, hdră ngă bruă hlăm mkra mjing. Klei anei đru mđĭ kyar bruă duh mkra – ala ƀuôn ti krĭng knông lăn, mkŏ mjing klei sa ai mơ̆ng mnuih ƀuôn sang leh anăn bruă sang čư êa alŭ wăl hlăm bruă bi mguôp răng mgang klei êđăp ênang alŭ wăl knông lăn.

          Blŭ hlăm klei kƀĭn trông, Trương Hải Long – k’iăng khua bruă Đảng čar, khua bruă sang čư êa čar Gia Lai yap yuôm bhăn dŭm boh tŭ dưn hlăm bruă mkŏ mjing anôk răng mgang knông lăn hlăm wưng êgao. Mbĭt anăn mnă klă, klei dưi kiă kriê knông lăn ala čar jing yuôm bhăn leh anăn amâodưi čhuak, mñă kơ lĭng kahan knông lăn lŏ dpưng bi lar bruă klam mơ̆ng anôk bruă thơ̆ng kơ bruă kriê dlăng, răng mgang knông lăn, mđĭ hĭn klei mjĕ giăm, bi mguôp hŏng mnuih ƀuôn sang, mtrŭt mđĭ bruă hâo hưn, mtô kơ klei dưi kiă kriê, knông lăn ala čar, bi myuôm bruă mkŏ mjing anôk bruă kjăp ktang, kluôm dhuôm, rŭ mjing să knông lăn kjăp hlăm djăp mta bruă, đru răng mgang klei êđăp ênang ti alŭ wăl.

Bi kơ lĭng kahan knông lăn, Thiếu tướng Nguyễn Đức Mạnh, k’iăng khua knơ̆ng gĭt gai lĭng kahan knông lăn Việt Nam lač jăk kơ Bruă Đảng čar, bruă sang čư êa čar leh anăn dŭm alŭ wăl, knơ̆ng dhar bruă mơ̆ng čar Gia Lai leh anăn mnuih ƀuôn sang alŭ wăl knông lăn mâo klei bi mguôp, đru kơ lĭng kahan knông lăn bi leh bruă klam. Hluê si Thiếu tướng Nguyễn Đức Mạnh, boh sĭt tar rŏng lăn leh anăn alŭ wăl mâo lu klei mlih, mâo dŭm knơ̆ng čuăn mrâo, čiăng mđĭ hĭn ai ktang jih jang mnuih ƀuôn sang, mkŏ mjing hdră kjăp mơ̆ng jih jang mnuih ƀuôn sang leh anăn bruă kđi čar nah gŭ ênuah ênô, kjăp ktangk luôm dhuôm.

Hlăm anăn, êpul lĭng kahan knông lăn bi lar nanao bruă klam bi mguôp, đru kčĕ hŏng mnuih ƀuôn sang leh anăn mnuih ƀuôn sang mơ̆ng čar čiăng bi leh dŭm mta kñăm mbĭt:

 “Bi hŏng lĭng kahan knông lăn čar Gia Lai mñă leh kơ phung ayŏng adei ngă jăk bruă đru kčĕ kơ bruă Đảng gĭt gĭt gai lĭng kahan leh anăn bruă Đảng čar, Êpul gơ̆ng bruă ƀuôn sang, bruă sang čư êa čar hlăm bruă gĭt gai, ktrâo lač dŭm gưl bruă, dhar bruă, dŭm êpul êya leh anăn mnuih ƀuôn sang mđĭ lar ai ktang bi mguôm hlăm bruă nao hgŭm mđĭ kyar bruă duh mkra, lăm lui klei ư̆ êpa, mkŏ mjing bruă kđi čar nah gŭ bi leh jăk bruă klam mkŏ mjing, kriê dlăng leh anăn răng mgang klei dưi kiă kriê, klei êđăp ênang knông lăn ala čar.”

Wưng anei, Knơ̆ng gĭt gai lĭng kahan knông lăn Việt Nam, bruă sang čư êa čar Gia Lai mđup brei leh hră pah mni, Knơ̆ng gĭt gai lĭng kahan knông lăn čar Gia Lai mđup brei mêđai bi hdơr kơ dŭm êpul êya, grăp čô êdah êdi mâo klei đru mguôp hlăm hdră./.