VOV4.Êđê - Mđing truh kơ Mlan êdam êra, phung êdam êra čar Gia Lai mâo leh lu bruă ngă tŭ yuôm, bi êdah ai tiê ba anăp, mĭn mrâo. Mlan êdam êra thŭn 2022, bruă Đoàn čar Gia Lai hluê ngă leh lu bruă, êdah êdi jing hdră “Mlan êdam êra” thŭn 2022 lehanăn hdră bi ktưn kkuh m'ak Klei bi kƀĭn bruă Đoàn êdam êra Cộng sản Hồ Chí Minh dŭm gưl, wưng thŭn 2022 – 2027 dưi mkŏ mjing ti Sang hră gưl 1 Lê Hồng Phong, să Ia Trôk, kdriêk Ia Pa (Gia Lai).

Hlăm hdră anei, dŭm êpul êya mđup brei leh 135 hnư mnơ̆ng kơ phung hđeh, ba jao 1 gru hmôn “Wăl anôk dlăng hră lehanăn bi mjĕ mjuk bruă Đội” mâo ênoh 50 êklăk prăk, ba jao 2 boh sang “Khăn quàng đỏ” kơphung hđeh mâo klei hdĭp dleh dlan. Êngao anăn, êpul ăt mkŏ mjing lu hdră bruă kyua êpul êya msĕ si: Myơr êbeh 400 mrô êrah doh, đru hruê ai mă bruă, mkra êlan krĭng ƀuôn sang, rŭ mdơ̆ng sang khăp čiăng, dŭm bruă đru kơ hdră gang mkhư̆ klei ruă Covid 19....

H’Nêč pô mblang