VOV4.Êđê- Thŭn hriăm 2022-2023, anôk bruă mtô bi hriăm čar Gia Lai dôk kƀah êbeh 3700 čô nai mtô. Ti anăp klei dleh dlan anei, mâo lu hdră dưi pŏk ngă kñăm mđĭ hnơ̆ng tŭ hdră mtô bi hriăm.

Hlăm thŭn hriăm mrâo anei, sang hră Mầm non Hoa Hồng, ƀuôn prŏng Pleiku ruah 850 hđeh sang hră kơ êbeh 22 boh adŭ hriăm. Nai Trần Thị Thuỷ, Khua sang hră Mầm non Hoa Hồng brei thâo, sang hră dôk kƀah 15 čô nai mtô klă sĭt kơ thŭn hriăm mrâo anăn rŭng răng snăk.

“Ară anei sang hră mrâo knŏng dăp djăp kơ 22 nao mtô rơ̆ntg djăp kơ 1 nai mtô, adôk jing mđing kơ hđeh sang hră 5 thŭn, adôk jing ênoh sang hră mơ̆ng 3-4 thŭn snăn ară anei ênoh phung nai adôk kƀah. Hmei ăt dôk kčĕ kơ adŭ sang hră leh anăn Knơ̆ng bruă sang čư̆ êa ƀuôn prŏng jing leh mphŭn pŏk thŭn hriăm brei rơ̆ng mâo nai mtô čiăng ngă bruă kriê dlăng mtô hđeh”

Phạm Văn Đại -  Khua Adŭ bruă sang hră kdriêk Ia Grai brei thâo: Kluôm kdriêk mâo 46 sang hră hŏng êbeh 1.200 čô knuă druh, nai mtô leh anăn phung mă bruă. Hlăm wưng ară anei, kdriêk Ia Grai adôk kƀah giăm 300 čô nai mtô, mnuih mă bruă. Hlue ngă klei kčah mtrŭn mơ̆ng Hdră mtô bi hriăm gưl 2,3 kluôm 2018, thŭn hriăm 2022-2023 srăng jing thŭn tal êlâo klei Ăngle leh anăn Tin học jing klei hriăm mgô̆ mơ̆ng adŭ 3 hlăm gưl sa, hrô kơ hrŏng ruah msĕ si êlâo adih. Boh sĭt anei ngă kơ kdriêk hlăk kƀah lu nai mtô lŏ tuôm hŏng klei dleh dlan hlăk ka mâo ênŭm ênoh phung nai klam bruă mtô kơ 2 klei hriăm anei.

“Ară anei klei dleh dlan mơ̆ng bruă sang hră mtô hriăm kdriek Ia Grai jing hlue ngă hdră bruă hdruôm hră mrâo hŏng klei hriăm Ăngle adŭ 2 leh anăn tin học adŭ 3 ară anei adôk kƀah. Hŏng ênoh phung nai Ăngle adôk kƀah lu hlăm sa anôk bruă sang hră jing adôk 5 boh sang hră ka mâo ôh nai mtô Ăngle leh anăn 8 boh sang hră ka mâo ôh nai Tin học anăn dleh dlan snăk”.

Rơ̆ng ênoh hđeh sang hră jing sa hdră msir čiăng mdrơ̆ng hŏng bruă kƀah nai mtô hlăm thŭn hriăm mrâo ti Gia Lai

Ăt hlăm thŭn hriăm anei, ƀuôn prŏng Pleiku kƀah êbeh 600 čô nai mtô ti dŭm gưl hriăm. Nguyễn Đình Thức -  Khua adŭ bruă sang hră mtô bi hriăm ƀuôn prŏng Pleiku brei thâo, čiăng rơ̆ng hnơ̆ng jăk mtô leh anăn hriăm, bruă sang hră mtô bi hriăm kƀĭn mđing kơ hdră mkŏ dăp, bi hơĭt êpul nai mtô ti dŭm boh sang hră. Mbĭt anăn, mơ̆ng tur knơ̆ng phung mă bruă dưi jao, pral ngă hră mơar hŏng phung nai, phung mă bruă adôk kƀah.

“Adŭ mă leh bruă hŏng dŭm sang hră čiăng ktuê dlăng sang hră adŭ hriăm leh anăn dăp phung nai mtô ti dŭm sang hră. Ti anăp boh klei kƀah nai mtô hŏng ênoh lu snăn bi trông hŏng dŭm sang hră lŏ mkŏ dăp sang hră, bi mŭt mbĭt sang hră čiăng mkiêtt mkriêm nai mtô dưi jao hlăm klei dưi. Adŭ ăt akâo kơ dŭm gưl mâo klei dưi ksiêm dlăng hlăm ai tiê dŭm hdră kčah mơ̆ng dhar bruă, knŭk kna čiăng dăp djăp ênoh nai mtô ăt msĕ mơh mnuih mă bruă kơ dŭm sang hră čiăng pŏk ngă bruă mtô bi hriăm”

Lê Duy Định –Khua Knơ̆ng bruă sang hră mtô bi hriăm čar Gia Lai brei thâo: Knơ̆ng bruă sang hră mtô bi hriăm dôk bi hgŭm hŏng Knơ̆ng bruă kriê dlăng bruă knuă mă bruă hŏng dŭm alŭ wăl čiăng tĭng yap, kčĕ hŏng Knơ̆ng bruă sang čư̆ êa čar bi mklă bruă mbha mguôp hŏng klei mkŏ dăp, mkŏ mjing adŭ hriăm, lŏ bi mŭt dŭm boh sang hră, mđĭ ênoh hđeh sang hră/adŭ truh ti hnơ̆ng djăp dŭm gưl hriăm. Leh bi leh dŭm boh phŭn kơh lŏ ksiêm yap bruă kƀah, djăp nai mtô hlăm dŭm gưl hriăm čiăng mbha 1.244 hnơ̆ng kčah mơ̆ng Gưl dlông jao.

“Hŏng dŭm adŭ hriăm gưl sa brei mâo 35 čô hđeh sang hră/adŭ, bi hŏng dŭm adŭ ti gưl dua snăn mâo 45 čô hđeh sang hră/adŭ. Dŭm kdriêk hlue ngă bruă bi mŭt dŭm sang hră ăt msĕ mơh rơ̆ng ênoh mrô hđeh sang hră hlăm adŭ snăn čiăng mkiêt mkriêm sa hnơ̆ng nai mtô lu snăk. Leh dưi mbŏ sa hnơ̆ng nai mtô, mbĭt hŏng bruă bi mŭt dŭm sang hră ăt msĕ mơh dăp ênoh hđeh sang hră hlăm adŭ snăn klei găl kơ bruă sang hră čar Gia Lai srăng mâo djăp nai mtô, klă sĭt hnơ̆ng mtô bi hriăm ti čar srăng jăk hĭn.”

Pô mblang: H’Zawut Ƀuôn Yă