VOV4.Êđê- Leh tlâo mlan hluê ngă, hdră bruă hđeh êdam êra yan mdei prŏng thŭn 2022 ti čar Gia Lai dưi bi ruê̆ hŏng lu mta bruă yuôm bhăn, kyua yang ƀuôn mơ̆ng phung hđeh êdam êra. Hdră bruă hđeh êdam êra ti čar gang mkhư̆ dưi mkŏ mjing mơ̆ng akŏ mlan 6 truh kơ ară anei, hŏng dŭm mta bruă hlăm 3 mlan yan mdei prŏng msĕ si: “Đru kčĕ – đru hlăm yan bi lông, Klei mdei hrah, mnga kting hrah, trun kơ bruă mtah, yan mdei prŏng mtah”.

Dŭm bruă ngă, bruă mkŏ mkra dưi kñăm kơ dŭm să knông lăn, dŭm să, alŭ, ƀuôn gĭr mâo ênŭm hnơ̆ng čoh čuăn krĭng ƀuôn sang mrâo hlăm thŭn 2022 leh anăn anôk dôk, mă bruă knuă, hriăm hră mơar mơ̆ng phung hđeh êdam êra, hđeh sang hră. Hluê ngă hdră bruă, phung mda asei čar Gia Lai dưi ngă leh lu bruă yuôm bhăn msĕ si, mkra bi jăk, mkra mrâo 27 km êlan krĭng ƀuôn sang, mkă dlăng, mdrao gŭn, brei êa drao amâo mâo mă prăk kơ 1400 gưl čô mnuih ƀun ƀin, plah mrâo giăm 170 êbâo ana kyâo mtah, rŭ mdơ̆ng 6 boh sang klei khăp, sang bi mguôp, mtô mjuăt hdră čô̆ kơ bruă, ba jao kdrăp mrâo mrang kơ dŭm êbâo gưl čô hđeh êdam êra krĭng ƀuôn sang.

Pô mblang: Y-Ƀel Êban