Hlăm brô sa mlan hŏng anei, truh kơ mmăt mlam, ênai hô̆ pui mdiăng čuah mbĭt hŏng măi pom lŏ kwang ti ênao êa knơ̆ng kdơ̆ng bi êran pui kmlă Ia Ly. Lu êdeh kčao, êdeh ben mŭt kbiă amâo mâo mdei msĕ si anôk mă bruă prŏng. Hlăm lu hruê ktuê dlăng, hmei ƀuh grăp mlam mâo êbeh 10 boh hô̆ pui prŏng, hô̆ pui điêt bi mdiăng čuah ba ti anôk bi kƀĭn. Mâo đa đa hô̆ pui ƀuôp mă čuah tuh hlăm êdeh ben leh anăn ba nao čhĭ ti anôk mkăn. Sa čô mnuih ƀuôn sang hdĭp giăm ênao êa Ia Ly (mđăp anăn) brei thâo:

 “Anôk mă čuah anei sui leh, ară anei mlam kơh diñu ƀuôp mă, yang hruê amâo mă ôh, yang hruê hô̆ pui dưm ti kdrŭn dih. Leh ƀuôp mă čuah êran hriê ti hang anei tuh hlăm êdeh ben, amâo mâo anôk mklin ôh, sa boh hô̆ pui sa boh êdeh ben, grăp hruê sơnăn sơăi”.

Lê Xuân Dũng, Khua adŭ bruă ngăn dŏ leh anăn wăl hdĭp mda kdriêk Čư̆ Pah brei thâo, ară anei ti alŭ wăl mâo 10 anôk, hŏng 10 knơ̆ng bruă, anôk bruă duh mkra dưi brei klei dưi mă mnơ̆ng gŭ lăn, hlăm anăn mâo 4 anôk dưi brei mă čuah ti dŭm să Hà Tây, Ia Khươl, Ia Nhin leh anăn Ia Ka. Mơ̆ng akŏ thŭn 2023, bruă sang čư êa kdriêk Čư̆ Pah mkŏ mjing leh sa êpul ngă bruă čiăng ksiêm dlăng, mgaih msir klei hưn kơ bruă mă mnơ̆ng gŭ lăn soh hŏng hdră bhiăn. Ƀiădah hlăm dŭm mmông nao ksiêm dlăng amâo mâo hmao ƀuh sa mta ôh.

 “Mă mnơ̆ng gŭ lăn ti ênao knơ̆ng êa bi êran pui kmlă Ia Ly truh kơ ară anei ka mâo ôh sa anôk bruă mâo ênŭm klei găl hluê si klei čuăn hlăm klei bhiăn lăn čar. Khua gĭt gai bruă sang čư êa kdriêk, kahan ksiêm, Ngăn dŏ leh anăn wăl hdĭp mda nao ksiêm dlăng leh ti ênao êa, ƀiădah hlăm mmông ksiêm dlăng ka mâo ƀuh ôh. Ênao êa jing prŏng êdi bi knông plah wah čar Gia Lai leh anăn Kon Tum, tơdah hmao ƀuh phung ngă soh mâo klei tĭng êlâo leh hlăm djăp boh klei mâo, mâo mă jing dleh dlan sơnăk, diñu tlĕ mă hlăm mmông ktrŏ lu bruă, êngao kơ mmông mă bruă, mmăt mlam”.

Hluê si klei hưn mơ̆ng bruă sang čư êa kdriêk Čư̆ Pah, ară anei ti ênao êa Ia Ly mâo 4 anôk bruă dôk hluê ngă dŭm mta bruă djŏ tuôm hŏng klei mă čuah. Êngao kơ sa anôk bi mklin djŏ hdră bhiăn, lŏ mâo anôk anôk bi mklin mơ̆ng dŭm anôk bruă mkăn hŏng bruă ƀuôr waih ênao êa. Khădah ka dưi čhĭ mnia, dŭ mdiăng ƀiădah klei ƀuôp mă, dŭ mdiăng mâo leh hlăm wưng sui. Nay Kiên, Khua bruă sang čư êa kdriêk Čư̆ Pah brei thâo, bruă bi mklin, dŭ mdiăng soh hŏng hdră bhiăn mâo hlăm mmăt mlam, kyuanăn ngă klei dleh dlan kơ êpul êya ngă bruă

 “Boh klei anei mâo hŏng anei êbeh sa mlan, hŏng dŭm hră brei ngă bruă jing brei ƀuôr waih ênao êa mơ̆ng Phŭn bruă tuh tia. Bi kơ hdră bhiăn anôk bruă anei amâo mâo dưi mdiăng mđuê̆. Ƀiădah hlăm mmăt mlam amâodah êjai êpul êya ngă bruă amâo mâo dưi ksiêm dlăng diñu tlĕ mdiăng mđuê̆. Ti anăp anei, hmei srăng mkŏ mjing êpul ksiêm dlăng 4 hdră bhiăn ti alŭ wăl anei. Sa kdrêč hlăm bruă klam mơ̆ng kdriêk hmei srăng ƀuah mkra tang phĭt, ti kdrêč mơ̆ng čar, amâodah čar riêng gah hmei srăng hưn mdah hŏng čar Kon Tum čiăng ƀuah mkra hluê si klei čuăn”.

Mâo lu êdeh mdiăng čuah soh hŏng hdră bhiăn mdiăng leh čuah đuĕ mơ̆ng êa êa Ia Ly hŏng klei jhŏng kmlăn. Klei êdu êdăk, amâo mâo bruă đua klam hlăm bruă kriê dlăng tinei dôk ngă klei luč liê lu mnơ̆ng gŭ lăn mơ̆ng dŭm alŭ wăl leh anăn ngă truh lu klei amâo mâo jăk mkăn kơ klei êđăp ênang.

Dŭm êpul m3 čuah mjhua dŭ mdiăng čiăng ba čhĭ hlăm grăp hruê amâo mâo djŏ knŏng bi luč mnơ̆ng lu lăn, ngă truh klei hmăi kơ bruă hrui wĭt ngăn prăk alŭ wăl. Đoàn Tiến Cường, Khua kiă kriê knơ̆ng kdơ̆ng êa bi êran pui kmlă Ia Ly (Hlăm êpul grŭp pui kmlă Việt Nam) brei thâo, klei mă čuah soh hŏng hdră bhiăn ti alŭ wăl ngă truh klei hmăi kơ hnơ̆ng tŭ jăk, klei êđăp ênang knơ̆ng kdơ̆ng êa. Hlăm wang 300 kbưi hŏng jơ̆ng knơ̆ng êa, phung mă bruă knơ̆ng bi êran pui kmlă ksiêm dlăng, suôt diñu êjai mâo dŭm kŭm păn. Bi kơ êngao kơ hnơ̆ng anăn mâo klei kriê dlăng mơ̆ng anôk bruă djŏ tuôm kdriêk Čư̆ Pah, knơ̆ng bruă ngăn dŏ leh anăn wăl hdĭp mda, kahan ksiêm wăl hdĭp mda. Khădah klei mă čuah soh hŏng hdră bhiăn ka ngă truh klei hmăi kơ klei êđăp ênang knơ̆ng kdơ̆ng êa, ƀiădah boh klei anei čiăng dưi mgaih msir jih hnơ̆ng, kñăn răng mgang ngăn dŏ gŭ lăn, wăl mnơ̆ng hdĭp ti ênao êa leh anăn rơ̆ng klei bi kna wăl hdĭp mda.