VOV4.Êđê - Jing čar mâo lu mnuih djuê ƀiă, bruă duh mkra dôk dleh dlan, hlăm wưng sui, lu mnuih ƀuôn sang djuê ƀiă ti alŭ wăl hlăm čar Gia Lai dưi mkăp hră Ênua mdrao mgŭn amâo mă prăk. Mơ̆ng hdră đĭ kyar bruă duh mkra - ala ƀuôn alŭ wăl, lu krĭng ƀuôn sang tlaih leh mơ̆ng klei dleh dlan, amâo lŏ dưi đru kơ hră Ênua mdrao mgŭn kluôm dhuôm, kyua anăn ênoh mnuih nao hgŭm blei hră Ênua mdrao mgŭn hrŏ, mnuih ƀuôn sang tuôm hŏng klei dleh dlan tơdah tĭng tla prăk mkă dlăng klei ruă. Ti anăp klei anei, anôk bruă djŏ tuôm čar Gia Lai hluê ngă leh lu hdră lehanăn phŭn tal êlâo mđĭ leh ênoh mnuih djuê ƀiă nao hgŭm blei hră Ênua mdrao mgŭn.

Gŏ sang amai Kpă Bli ti alŭ Plei Tel B, să Ia Sol, kdriêk Phú Thiện, čar Gia Lai, bi mklă lŏ blei hră ênua mdrao mgŭn čiăng răng mgang klei suaih pral pô leh anăn jih gŏ sang. Hlue si amai Kpă Bli, êlâo adih, gŏ sang ñu dưi đru 100% hră ênua mdrao mgŭn, khădah snăn êbeh 1 thŭn hŏng anei kbiă leh mơ̆ng klei dưi đru. Hlăm wưng anăn, sa kdrêč kyua bruă duh mkra dleh dlan kyua Covid-19, mta mkăn jing kyua ngă ngơi mang anăn amai Bli amâo blei hră ênua mdrao mgŭn. Snăn mrâo anei, leh nao đih mdrao kyua klei ruă êngoh siêu vi leh anăn tla prăk đih sang êa drao hŏng ênoh lu, ñu ƀuh klei čiăng êdi mơ̆ng bruă blei hră ênua mdrao mgŭn:Êlâo adih snăn Knŭk kna đru hră ênua mdrao mgŭn, ƀiădah ară anei Knŭk kna amao đru ôh hră ênua mdrao mgŭn. Mrâo anei kâo čŏng nao ti sang êa drao snăn tla 100% prăk mdrao, gưl nao đih sang êa drao jing 1 êklăk 2 êtuh êbâo prăk. Tơdah mâo hră ênua mdrao mgŭn snăn kâo amâo liê prăk snăn ôh. Hriê tinei, kâo mă klei thâo pô srăng bi mklă blei hră ênua mdrao mgŭn”

Msĕ snăn mơh, amai Rmah H’Brang ti alŭ H’Lil 2, să Ia Mrơn, kdriêk Ia Pa, čar Gia Lai ăt mrâo blei hră ênua mdrao mgŭn. Amai H’Lil brei thâo, êlâo adih gŏ sang mâo knŭk kna đru 100% prăk tla hră ênua, anăn ka tuôm rŭng răng ôh kơ prăl đih mdrao. Ară anei, hnơ̆ng đru knŏng adôk 40%, gŏ sang bi mklă blei kơ jih 7 čô mnuih kyua ƀuh klei tŭ klă sĭt mơ̆ng bruă blei hră ênua mdrao mgŭn:Kyua jing grăp čô hlăm gŏ sang khăng nao mă bruă anăn amâo thâo ôh klei amâo myun truh kơ gŏ sang pô, kyua anăn, brei pô mgang kơ gŏ sang pô čiăng hơĭt ai tiê hĭn sĭt pô nao mă bruă”

Nguyễn Hữu Hạ -  Khua Anôk bruă ênua ala ƀuôn kdriêk Ia Pa brei thâo, mơ̆ng leh pŏk ngă Hdră mtrŭn mrô 861/QĐ-TTg gruê 4/6.2021 mơ̆ng Khua knŭk kna bi mklă anăn dŭm să krĭng III, krĭng II, krĭng I hlăm krĭng mnuih djuê ƀiă leh anăn krĭng čư̆ čhiăng wưng thŭn 2021-2025, kluôm kdriêk hrŏ giăm 10 êbâo čô blei hră ênua mdrao mgŭn, lu jing mnuih ƀuôn sang djuê ƀiă ti dŭm să krĭng II leh anăn krĭng III ară anei jing krĭng I. Čiăng msir mgaih klei anei, anôk bruă gĭr bi hgŭm hŏng bruă sang čư̆ êa dŭm gưl mđĭ hâo hưn mtô mblang čiăng kơ muih ƀuôn sang thâo săng hĭn kơ klei dưi leh anăn klei tŭ dưn sĭt blei hră ênua mdrao mgŭn, leh anăn lŏ blei hră ênua mdrao mgŭn.Mơ̆ng akŏ thŭn 2022, Hră ênua ala ƀuôn kdriêk Ia Pa bi hgŭm hŏng bruă sang čư̆ êa alŭ wăl ti dŭm să, êpul hgŭm ti kdriêk mđĭ ktang bruă hâo hưn mtô mblang mnuih ƀuôn sang blei hră ênua mdrao mgŭn, boh nik kƀĭn hlăm phung mnuih djuê ƀiă hrŏ hră ênua mdrao mgŭn kyua hmaĭ mơ̆ng hdră êlan. Mơ̆ng akŏ thŭn truh ară anei, mơ̆ng bruă hâo hưn mtô mblang, mtrŭt mjhar snăn kluôm kdriêk ăt mâo klei đĭ kyar kơ hră ênua mdrao mgŭn, yap truh wưng ară anei kluôm kdriêk mâo hlăm brô 47.600 čô blei hră ênua mdrao mgŭn, mâo ƀiă êdi 80% ênoh mnuih ƀuôn sang blei hră ênua mdrao mgŭn.”

Kluôm čar Gia Lai ară anei mâo giăm 1,27 êklăk čô blei hră ênua mdrao mgŭn, mâo hnơ̆ng kluôm 82% ênoh mnuih ƀuôn sang. Čar ăt gĭr truh jih thŭn 2022 mâo 90% ênoh mnuih ƀuôn sang blei hră ênua mdrao mgŭn. Êngao kơ bruă hâo hưn mtô mblang, mtrŭt mjhar hlue ngă “Nao djăp êlan, nao grăp boh sang”, anôk bruă ênua ala ƀuôn čar Gia Lai ăt dôk bi hgŭm hŏng dŭm knơ̆ng, dhar bruă, êpul bruă pŏk ngă jăk lu hdră msir kñăm mđĭ ênoh mnuih ƀuôn sang hgŭm. Êlâo hĭn, anôk bruă srăng pŏk ngă lu hdră msir đru blei hră ênua mdrao mgŭn kơ mnuih ƀuôn sang dleh dlan, mnuih ƀuôn sang djuê ƀiă. Lê Quốc Khánh –  K’iăng Khua Anôk bruă hră ênua ala ƀuôn čar Gia Lai, brei thâo: “Hlăm thŭn 2022 anei, bruă ênua ala ƀuôn Gia Lai kčĕ leh kơ Êpul gơ̆ng bruă ƀuôn sang čar mâo Hdră mtrŭn mrô 11 čiăng đru kơ dŭm êpul dleh dlan. Gĭr ngă, leh anăn mđĭ ênoh mnuih blei lu. Êngao anăn, Hră ênua ala ƀuôn Gia Lai ăt bi hgŭm hŏng Bruă Đảng dŭm êpul hgŭm anôk bruă, kčĕ kơ Bruă Đảng dŭm anôk bruă leh anăn Anôk bruă duh mkra čar mâo Hdră kčah mrô 48 iêô jak dŭm anôk bruă đảng, dŭm anôk bruă đru kơ mnuih ƀuôn sang hgŭm./.