Êpul kiă kiê bruă răng mgang dliê ti ƀuôn Keo, să Ayun, kdriêk Čư̆ Sê tŭ mă bruă răng mgang truh êbeh 100ha dliê mơ̆ng anôk bruă kiă kriê dliê răng mgang Čư̆ Sê. Dŭm čuê dliê tinei lu jing kdrăn rơ̆k krô, suah mbô mnơ̆ng ênưih pui ƀơ̆ng. Bùi Văn Khánh, hlăm êpul kiă kriê dliê ƀuôn Keo, să Ayun lač:

 “Ayŏng adei kreh hiu suang dlăng nanao, boh nik hlăm dŭm hrue adiê hlơr msĕ si ară anei. Tơdah tăp mâo hĕ klei amâo mâo jăk pral hưn mtam kơ anôk kiă kriê dliê, lehanăn dŭm dhar bruă djŏ tuôm mâo hdră mghaih msir”.

Čhuang hlăm krah yan bhang thu krô, Êpul kiă kriê dliê răng mgang Čư̆ Sê lŏ bi kjăp leh truh 7 êpul gak răng, mâo nanao klei hiu suang êwăng ti dŭm čuê dliê ênưih lĕ hlăm klei pui ƀơ̆ng. lehanăn čuh tir êlan gang pui jŭm gah găn hlăm ênha êbeh 400 ha dliê pla, lehanăn dliê čŏng mâo ênưih lĕ hlăm klei pui ƀơ̆ng ti 3 să: Bar Maih, Ayun lehanăn H’Bông. Đinh Mạnh Phong, Khua anôk bruă kiă kriê dliê răng mgang Chư Sê, čar Gia Lai brei thâo, bruă čuh rơ̆k rung krô hlăm dŭm anôk dưi kiă kriê đru leh kơ bruă gang mkhư̆ klei pui ƀơ̆ng.

          “Truh yan bhang không, hla kyâo rơ̆k ktơ̆k jing mnơ̆ng ênưih snăk pui ƀơ̆ng, kyua anăn tơdah pô tir êlan pui čuh hĕ êlâo hlăm klei dưi kiă kriê, snăn amâo srăng truh ôh kơ klei pui ƀơ̆ng prŏng, mơ̆ng anăn dliê pô ăt dôk hrông’.

Êpul bruă kiă kriê dliê răng mgang ti dua kdriêk Ia Pa lehanăn Phú Thiện, čar Gia Lai, hŏng giăm 19 êbâo héc tar dliê. Phạm Đắc Vịnh, K’iăng khua anôk bruă kiă kriê dliê răng mgang Čư̆ A Thai lač: Ară anei hlăm alŭ wăl anei, jing dôk hlăm klei răng mjêč mrô 5 leh, jing ti hnơ̆ng huĭ hyưt êdi kơ klei pui ƀơ̆ng dliê.

 “Anôk bruă jao leh kơ 5 mâo klei bi mguôp hŏng 125 gŏ sang tŭ mă phăn jao kiă kriê, lehanăn gang mkhư̆ klei pui ƀơ̆ng dliê. Hlăm dŭm čuê dliê êdrah, jing anôk êpul bruă kiă kriê, snăn êlâo kơ mŭt hlăm yan bhang không, snăn êpul êya bruă mkŏ mjing leh klei tir čuh êlan gang pui, kñăm bi hrŏ jih hnơ̆ng djah hla rơ̆k krô, jing mnơ̆ng ênưih lĕ hlăm klei pui ƀơ̆ng, kñăm čiăng tlaih mơ̆ng klei pui ƀơ̆ng hlăm adiê hlơr”.

Čiăng dưi gang mkhư̆ klei pui ƀơ̆ng dliê hŏng klei tŭ jing, mơ̆ng thŭn    2023 truh ară anei, knơ̆ng bruă sang čư̆ êa kdriêk Ia Grai mbĭt hŏng jih jang êpul êya pô dliê, mâo klei bi mguôp hŏng bruă sang čư̆ êa alŭ wăl mkŏ mjing 15 gưl mjuăt bi hriăm klei bhiăn, kiă kriê, răng mgang dliê ti 5 să mâo dliê hŏng êbeh 1000 gưl čô mnuih nao hriăm, mâo klei ƀuăn rơ̆ng răng kriê dliê bi jăk, gang mkhư̆ pui arôk hŏng dŭm êtuh gŏ sang hdĭp giăm dliê, mbha hră hliê hâo hưn mtă mtăn kơ mnuih ƀuôn sang dŭm să mâo dliê, bi đru gang mkhư̆ pui arôk hŏng dliê.   Đỗ Văn Đông, K’iăng khua knơ̆ng bruă sang čư̆ ea kdriêk Ia Grai, čar Gia Lai lač:

“Knơ̆ng bruă sang čư̆ êa kdriêk mkŏ mjing leh klei nao ksiêm hlăm čuê dliê, ti dŭm êpul êya pô dliê, kñăm mđĭ hĭn bruă klam kơ bruă răng mgang dliê, boh nik gang mkhư̆ klei pui ƀơ̆ng dliê”./.