VOV4.Êđê- Ti anăp thŭn hriăm mrâo thŭn 2022 – 2023, bruă mtô mjuăt bi hriăm čar Gia Lai dôk hluê ngă hrăm mbĭt lu hdră êlan čiăng rơ̆ng mâo ênŭm phung nai mtô, boh nik jing phung nai mtô hlăm hdră mtô bi hriăm mrâo ti adŭ 3, 7 leh anăn adŭ 10. Hluê si klei ksiêm dlăng mơ̆ng knơ̆ng bruă mtô mjuăt bi hriăm čar Gia Lai, thŭn hriăm 2022 -2023 anei, čar kƀah 3.414 čô nai, yap hluê si ênoh phung hđeh sang hră.

Čiăng rơ̆ng kơ thŭn hriăm mrâo, dŭm kdriêk, wăk krah, ƀuôn prŏng ti čar Gia Lai dôk hluê ngă hră kuôl kă, duah nai mtô klei Angle, knơ̆ng bruă mtô mjuăt bi hriăm mkŏ mjing klei hriăm mbŏ mta hriăm tin học leh anăn công nghệ gưl 1 hŏng phung nai mâo klei thâo, čiăng bi djăp hnơ̆ng mtô bi hriăm kơ anăp. Êngao kơnăn, hluê si klei gĭt gai mơ̆ng bruă sang čư êa čar Gia Lai, dŭm alŭ wăl dôk bi mguôp hŏng bruă mtô mjuăt bi hriăm lŏ dơ̆ng mtrŭt mđĭ bruă mklin adŭ, mklin sang hră, bi hrŏ mnuih mă bruă.

                                                    Pô mblang: H’Nêč Êñuôl