Hruê kăm dhar kreh – hiu čhưn ênguê Gia Lai thŭn 2023 mkŏ mjing mơ̆ng hruê 11 – 18/11 hŏng klei nao hgŭm mơ̆ng hlăm brô 1000 čô thâo mbruă hlăm leh anăn êngao čar. Hlăm anăn, klei kñăm jing Festival dhar kreh čĭng čhar Gia Lai thŭn 2023 mâo êpul phung thâo mbruă mơ̆ng 17 kdriêk, wăl krah, ƀuôn prŏng hlăm čar leh anăn dŭm čar krĭng Lăn Dăp Kngư. Lŏ dơ̆ng kơnăn jing dŭm knăm mơak msĕ si Knăm mơak mnga kñĭ – čư̆ pui Čư̆ Dang Ya (kdriêk Čư̆ Pah), klei bi lông waih mran ti krĭng Pô Cô 9 (kdriêk Ia Grai). Wưng anei, ti ƀuôn prŏng ăt mkŏ mjing dŭm knăm mơak êlan klông, mkŏ wĭt dŭm mta bruă dhar kreh yang ƀuôn, hdră dhar kreh knhuah gru, rang mdah kdrăp pĕ tông krĭng Lăn Dăp Kngư.

Lŏ dơ̆ng Hruê kăm dhar kreh – Hiu čhưn ênguê Gia Lai, ti ƀuôn prŏng Pleiku mkŏ mjing hruê knăm hiu čhưn ênguê 2023 leh anăn klei bi lông êran Gia Lai City Trail- klei êpei čư̆ čhiăng. Phung tuê leh anăn mnuih ƀuôn sang dưi ktuê dlăng klei rang mdah tông čing ti anăp anôk siam Ea Nueng. Ti gŭ êyui kyâo mtah êđăp jing klei rang mdah Pleiku Êlâo leh anăn Ară anei, hŏng 100 pŏk rup kơ anak mnuih, anôk siam, wăl krah, dhar kreh, knăm mơak ti Pleiku mơ̆ng thŭn 1975 truh kơ ară anei. Ngô Văn Hoà- khua kiă kriê êpul bi mguôp Nai leh anăn hđeh hriăm, pô mă rup anei brei thâo:

“Dŭm pŏk rup hđăp kâo mâo mơ̆ng thŭn 2008 truh kơ ară anei. Rup anei amâo mâo klei kăm ôh, dŭm mbah internet mđung sơăi. Kâo mjing bi knar, kiêng mơ̆ng rup mrâo msĕ kiêng rup hđăp, čiăng kơ arăng thâo bi mkă. Kâo đa đa lač phŭn dô dih siam, mâo mnuih lač Pleiku ară anei mrâo mrang. Kâo čiăng mnuih ƀuôn sang Pleiku lŏ wĭt dlăng rup đưm, phung hđeh ƀuh ƀuôn prŏng Pleiku đĭ kyar msĕ ară anei jing klei đru mguôp lu sơnăk mơ̆ng lu gưl ayŏng ama leh anăn mnuih ƀuôn sang dŭm djuê ana hlăm čar”.

Sa mta kñăm mơ̆ng hruê Knăm hiu čhưn ênguê thŭn 2023 tal anei jing klei bi lông êran Gia Lai City Trail- klei êpei čư̆ čhiăng hŏng klei nao hgŭm mơ̆ng 4000 čô bi lông. Boh taih êlan bi lông 5 km, 10 km, mkrah marathon (21km) leh anăn full marathon (42km) dưi mkra mjing kčưm mơ̆ng anôk siam Ea Nueng, găn dŭm đang pla čê leh anăn đang hngô êtuh thŭn, găn ƀăng jang sang yơng Bửu Minh, truh ti čư̆ pui Čư̆ Dang Ya siam hŏng mnga kñĭ ti kdriêk Čư̆ Pah. Êlan bi lông jing dŭm êlan hlăm ƀuôn prŏng, êlan điêt, êlan čư̆, djŏ hlăm yan siam hĭn mơ̆ng čư̆ čhiăng Gia Lai. Aduôn Nguyễn Thị Hậu Hiền, giăm leh 70 thŭn, mbĭt hŏng gŏ sang mơ̆ng Hà Nội hriê ti ƀuôn prŏng Pleiku hiu čhưn ênguê, nao hgŭm hlăm klei bi lông êran, hơ̆k mơak brei thâo:

 “Čư̆ Pui leh anăn mnga kñĭ, dlăng siam êdimi, mâo đang hngô msĕ sơnei êwa hrip doh êdi. Anak mnuih Pleiku jăk êdi. Anăn klei bi lông êran jing Klei êpei čư̆ čhiăng, anei jing klei êpei mơ̆ng kâo lu thŭn hŏng anei leh. Thŭn anei dưi nao hgŭm bi lông êran tinei hŏng klei siam mbĭt hŏng gŏ sang, kâo hơ̆k mơak êdi”.

Hluê si êpul mkŏ mjing, jing klei bi lông êran trail – êran bi mguôp hŏng klei đĭ čư̆ gưl tal êlâo dưi mkŏ mjing ti Gia Lai, klei bi lông thŭn anei dưi mkŏ mjing ai iêo jak hŏng êpul êya yang ƀuôn kluôm ala. Hlăm phung bi lông êran thŭn anei mâo lu phung bi lông tuôm mâo boh tŭ dưn hlăm dŭm klei bi lông kluôm ala ăt msĕ hŏng nao ti lông ti ala tač êngao. Klei bi lông mâo klei uêñ mĭn, sa ai mơ̆ng 35 anôk bruă, knơ̆ng bruă hŏng êbeh 1 êklai prăk leh anăn lu mta mnơ̆ng mkăn. Êngao kơ bruă yua hlăm bruă mkŏ mjing, sa kdrêč ênoh prăk dưi yua hlăm bruă bi hơĭt klei hdĭp yang ƀuôn ti ƀuôn prŏng Pleiku leh anăn đru mguôp hlăm kreh prăk “Ao mđao kơ adei”.

Nguyễn Xuân Hà – Khua dhar bruă dhar kreh hâo hưn ƀuôn prŏng Pleiku, čar Gia Lai brei thâo: Hŏng lu mta bruă dhar kreh, mjuăt asei mlei, klei kdŏ mmuñ jăk yâo, hruê knăm dhar kreh hiu čhưn ênguê 2023 mơ̆ng ƀuôn prŏng Pleiku ba wĭt leh dŭm klei ktuê dlăng jăk hŏng mnuih ƀuôn sang leh anăn phung tuê. Anei ăt jing wưng čiăng kơ alŭ wăl hưn mdah rup anak mnuih jăk yâo, wăl hdĭp mda leh anăn dhar kreh mơ̆ng Pleiku.

 “Dŭm hruê êgao, dŭm anôk bruă, dŭm să, ƀuôn hgŭm, phung thâo mbruă mâo leh klei hur har bi hriăm, hmăng hmưi duh myơr kơ phung tuê leh anăn phung bi lông ti dŭm krĭng kwar dưi ƀuh knhuah dhar kreh jăk siam leh anăn klei drông tuê mơ̆ng mnuih ƀuôn sang Pleiku. Hluê anăn, ƀuôn prŏng hmăng hmưi mơĭt hâo hưn ƀuôn prŏng Pleiku jăk yâo jum tuê leh anăn čư̆ čhiăng mtah kyua klei suaih pral.”

Hruê knăm Hiu čhưn ênguê ƀuôn prŏng Pleiku thŭn 2023 mkŏ mjing mơ̆ng hruê 17 – 19/11 ti wăl Anôk hiu čhưn ênguê Ea Nueng, să Ea Nueng, ƀuôn prŏng Pleiku. Hriê hŏng knăm mơak, phung tuê dưi kma mbĭt hŏng ai êwa dhar kreh mơ̆ng djuê ana hŏng dŭm klei rang mdah tông čing, mkŏ wĭt đa đa klei bhiăn dhar kreh đưm mơ̆ng dŭm djuê ana mnuih djuê ƀiă, rang mdah rup Pleiku đưm leh anăn ară anei, rup hiu čhưn ênguê Pleiku…Êngao kơnăn, nao hlăm hruê mơak, phung tuê lŏ dưi ktuê dlăng, lông ƀơ̆ng dŭm mta mnơ̆ng ƀơ̆ng phŭn mơ̆ng Gia Lai, dŭm mta mnơ̆ng dhơ̆ng OCOP. Hŏng dŭm mta bruă dhar kreh dưi mkŏ mjing hlăm mlan 11/2023, dưi bi êdah knhuah dhar kreh lu jơr, jăk yâo mơ̆ng mnuih ƀuôn sang dŭm djuê ana. Mbĭt anăn hưn mdah klei găl hiu čhưn ênguê mơ̆ng čar Gia Lai.