VOV4.Êđê - Anăp anei, anôk bruă mdrao mgŭn čar Gia Lai mprăp leh klei găl čiăng tlŏ vaccine COVID-19 kơ phung hđeh mơ̆ng 5 truh gŭ 12 thŭn. Nguyễn Đình Tuấn – K’iăng khua knơ̆ng bruă mdrao mgŭn čar Gia Lai brei thâo: Ară anei, čar Gia Lai mâo êbeh 212.000 čô hđeh mơ̆ng 5 truh gŭ 12 thŭn. Kñăm mprăp klei găl čiăng tlŏ vaccine COVID-19 kơ êpul hđeh anei, hlăm wưng êgao, knơ̆ng bruă mdrao mgŭn čar Gia Laị jao kơ Anôk bruă ksiêm dlăng klei ruă tưp čar mjuăt bi hriăm kơ phung knuă druh bruă mdrao mgŭn gưl nah gŭ wĭt mă bruă ksiêm mkă dlăng, tlŏ lehanăn msir mghaih klei mâo leh tlŏ, mjuăt bi hriăm kơ hdră kah mbha, bi mklă dữ liệu, rơ̆ng klei êđăp ênang hdră tlŏ mgang. Mĭn tĭng, bruă tlŏ mgang srăng dưi mkŏ mjing ti dŭm sang hră lehanăn anôk mdrao mgŭn nah gŭ leh Phŭn bruă mdrao mgŭn kah mbha vaccine, phung hđeh mơ̆ng 5 truh gŭ 12 thŭn srăng dưi tlŏ vaccine tơdah mâo klei tŭ ư mơ̆ng phung amĭ ama amâo dah pô dlăng kriê./.

H’Nêč pô mlang