VOV4.Êđê - Knŏng adôk hlăm brô sa mlan jing truh wưng bi lông jih gưl 3 gưl ala čar thŭn 2022.  Dhar bruă sang hră mơar čar Gialai hlăk jih ai tiê prăp êmiêt kơ klei bi lông čiăng dưi mâo klei êđăp ênang lehanăn djŏ klei bhiăn. Nao bi lông gưl anei, kluôm čar Gialai mâo êbeh 14 êbâo 100 čô hđeh hriăm hră ngă leh hră mơar bi lông, hlăm anăn mâo giăm 13 êbâo čô hđeh hriăm truăn gưl 3, lehanăn 384 čô hđeh hriăm ti sang hră mjuăt bi hriăm nanao, dŭm adôk jing phung nao bi lông êngiê. Hlăm klei bi lông anei mâo êbeh 13 êbâo čô hđeh ngă hră mơar akâo hrŏng mŭt hlăm sang hră Gưl prŏng, lehanăn Gưl krah.

Mkă hŏng hnơ̆ng hđeh nga hră mơar bi lông, čar Gialai mâo leh hdră mkŏ mjing truh kơ 40 anôk bi lông, đĭ sa boh adŭ bi lông mkă hŏng thŭn 2021, hŏng 623 adŭ bi lông, tiŏ nao truh 2 êbâo 400 čô knuă druh, phung nai dlăng klei bi lông. Ară anei knơ̆ng bruă mâo gĭt gai leh jih jang hdră mjut bi hriăm bi djŏ hŏng hdră. Mbĭt hŏng anăn, grăp boh sang hră ksiêk mkă hnơ̆ng hđeh hriăm hră čiăng mâo hdră êlan lŏ bi hdơr klei hriăm bi mâo klei tŭ dưn hĭn, čiăng kơ phung hđeh hơĭt ai tiê hlăm klei bi lông./.

Y – Khem pô mblang