VOV4.Êđê-  Hlăm hrue mbruĕ (12/8), Knơ̆ng bruă sang čư̆ êa čar Gialai pŏk klei bi kƀĭn kơ bruă hriăm hră mơar thŭn hriăm 2022 – 2023. Ti anôk bi kƀĭn anei, phung khua kiă kriê knơ̆ng bruă sang čư̆ êa čar mtă kơ knơ̆ng bruă sang hră mơar, lehanăn djăp alŭ wăl mprăp jăk kơ thŭn hriăm mrâo, amâo mâo lui ôh hđeh hriăm hră dôk hlăm klei dleh dlan kbiă sang hră mơar. Tui si klei čih yap, thŭn hriăm 2022 – 2023 ti Gialai srăng kčưm hriăm mơ̆ng hrue 29/8/2022 lehanăn mâo giăm 400 êbâo čô hđeh hriăm hră. Čiăng dưi mprăp jăk kơ thŭn hriăm mrâo, čar bi liê leh êbeh 623 êklai prăk blei mprăp djăp mta mnơ̆ng kơ bruă sang hră mơar, bi mŭt mrâo truh 1 êbâo 244 čô nai kơ djăp gưl.

Ti anôk bi kƀĭn, aduôn Nguyễn Thị Thanh Lịch, k’iăng khua knơ̆ng bruă sang čư̆ êa čar Gialai mtă kơ knơ̆ng bruă sang hră mơar hgŭm kjăp hŏng dhar bruă mdrao mgŭn mđĭ ênoh tlŏ vaccine gang mkhư̆ klei ruă tưp Covid 19, lehanăn ngă jăk bruă răng mgang klei ruă tưp hlăm sang hră, bi kjăp jih jang phung nai mtô, mă bruă hŏng klei tŭ jing, rơ̆ng mâo klei mkiêt mkriêm hŏng 3 mta bruă ala čar kñăm djŏ tuôm hŏng sang hră mơar, lŏ dơ̆ng mđĭ hnơ̆ng kjăp bruă mtô bi hriăm hlăm krĭng mnuih djuê ƀiă./.

         Pô mblang: Y-Khem Niê