Adei Hoàng Thị Anh Thơ – ti adŭ 12C1, sang hră gưl tlâo Phạm văn Đồng, să Ia Sao, kdriêk Ia Grai, čar Gia Lai brei thâo, klei bi lông kơ anăp mâo boh tŭ bi klă kơ êdei anăp. Kyuanăn, ñu čŏng ksiêm wĭt klei hriăm mơ̆ng hnưm čiăng mâo mă boh tŭ dưn hĭn:

“Kâo lŏ bi klă thiăm gưl hriăm kơ sang, lông ngă klei bi lông. Tal dua jing huă mnăm leh anăn mdei msăn djăp čiăng rơ̆ng mâo klei êngal hĭn, lŏ dơ̆ng hriăm lu hĭn. Bi kơ bruă bi klă mŭt hriăm gưl prŏng mâo sang hră mtô klă nik, ksiêm wĭt hră mơar lu blư̆. Kyuanăn kơ klei ngă hră mơar kâo ngă jih leh.”

Lač kơ bruă mprăp ti anôk bi mrô mrô 11 mơ̆ng čar Gia Lai, nai Nguyễn Trọng Tuấn- k’iăng khua kiă kriê sang hră gưl tlâo Phạm Văn Đồng – să Ia Sao, kdriêk Ia Grai brei thâo:

“Truh kơ ară anei, 186 čô hđeh ngă leh hră mơar bi klă bi lông bi ruê̆ gưl tlâo hlăm phần mềm. Bi kơ mnơ̆ng yua, sang hră mprăp ênŭm leh 12 adŭ bi lông, dŭm anôk dưm klei bi lông, adŭ mă bruă mơ̆ng êpul gơ̆ng, pui kmlă, gang mkhư̆ klei pui ƀơ̆ng ăt dưi ksiêm dlăng, mkra wĭt.”

Bi ti sang hră gưl tlâo Hà Huy Tập, kdriêk Kông Chro, nai Phạm Hữu Hùng- khua kiă kriê sang hră brei thâo, thŭn anei anôk bi lông mâo 57/246 čô bi lông jing mnuih djuê ƀiă. Mbĭt hŏng bruă ksiêm wĭt klei hriăm leh anăn mprăp ênŭm klei găl, sang hră mơar ăt dăp anôk huă ƀơ̆ng, anôk dôk đru kơ phung hđeh mơ̆ng kbưi:

“Sang hră ngă klei hưn mdah mơĭt kơ bruă sang čư êa kdriêk akâo đru kơ sa čô bi lông 400.000 prăk hlăm 3 hruê mkŏ mjing klei bi lông. Bi kơ sang hră, gĭt gai phung êdam êra bi mguôp hŏng bruă đoàn răng kriê kơ 57 čô hđeh bi lông mnuih djuê ƀiă huă ƀơ̆ng ti sang huă sang hră. Grăp thŭn leh anăn thŭn anei msĕ mơh, sang hră mâo 12 adŭ dôk mbĭt kơ phung hđeh dleh dlan čiăng dôk tinăn. Phung wĭt kơ sang mâo êpul ngă bruă nao drông atăt hlăm wưng bi lông.”

Mĭn tĭng klei bi lông bi ruê̆ gưl 3 thŭn 2024 ti čar Gia Lai mâo êbeh 15.200 čô bi lông. Hlăm anăn mâo 14.400 čô hđeh adŭ 12 leh anăn 800 čô hđeh bi lông êngiê. Čar dăp 41 anôk bi lông klă klơ̆ng leh anăn đa đa anôk bi lông mkăp ti 17 kdriêk, wăl krah, ƀuôn prŏng. Knơ̆ng bruă sang hră mơar čar Gia Lai bui mguôp kjăp hŏng kahan ksiêm, bruă mdrao mgŭn, pui kmlă…mprăp răng mgang klei êđăp ênang mơ̆ng klei bi lông.

Bruă kah mbha hdră bhiăn leh anăn hdră mkŏ mjing klei bi lông, phần mềm kriê dlăng klei bi lông, hră mơar klei bi lông kơ êbeh 15.200 čô bi lông dưi ngă leh. Nguyễn Văn Long- k’iăng khua knơ̆ng bruă sang hră mơar čar Gia Lai lŏ brei thâo:

“Mơ̆ng ară anei truh kơ hruê bi lông, knơ̆ng bruă ksiêm wĭt klei čih phung bi lông, mkŏ mjing bruă mtô hdră bhiăn dlăng klei bi lông, hyuă kjăp hdră bhiăn kơ phung knuă druh, phung nai dlăng klei bi lông leh anăn phung nao bi lông. Dŭm bruă anei dưi ngă jêñ jêñ, mơ̆ng ară anei truh kơ hruê bi lông. Knơ̆ng bruă sang hră mơar bi mguôp hŏng bruă sang čư êa dŭm kdriêk bi klă grăp anôk bi lông, klei găl, kdrăp yua truh kơ grăp čô bi lông čiăng mâo klei đru găl guôp”.

Hŏng klei mprăp klă nik, Gia Lai dôk mđing kơ gưl bi lông bi ruê̆ gưl 3 thŭn 2024 êđăp ênang leh anăn tŭ dưn hĭn./.